Candi po Babele
11
Ta faywóbno né, farimé kyat po langét pópo nje ni né riri méitén be esó le, reni méitén ta nésé pa. 2 Kyaté-kyaté né rtoléné rfawluwo si néli re lima po faspal ngancóo, sogado rwómo lóté isó po Babiloniaa, se rtolén si pocé.3 Pocé bóngo kyaté né rfalécego faje, “Mew lima, tpe tela ga ttapéné bo métuwé.” Rtapén tela né rewóré, ryó gétgité, bo rfawawét tela né, ga rélulo gétgité bo nfatatéf fié. 4 Rewóré ta né, bóngo rfalécego nóté, “Eh, mew lima bo tfawoslé pnuw ta pélóy faisó pa? Bo ma tfaksaké it néli re lima le na. Bóngo tpe candi faisó ta i wómo né nétit néya langété lo. Fajé, bo kyat néli lima né rtail ité.”
5 Rfakéwelé riri yabé né, pocé ga Jou Lahatala ntebé bo némnaw pnuw ta npélóyé njé re candi ta rfawoslé i njé, 6 bóngo néceg faje, “Kyaté nesté riri gae re gele be isó, re riri méitén be ésó le. Ta faywóbno dunia njé ndadi i se lima, nte ga tagare rpe pnuw ta npélóyé nje re candi ta némógé nje. Bo tfamól si, nase bo rfakéwelo sói néli ma ndadi i ndimé. 7 Ta fié né ttebé nópé bo tfafélé riri méiténé né bo rfaméitno si né, rcae néli re lima nóté na.”
8 Pocé fajé bóngo Jou Lahatala nfafélé riri méiténé né se rfaksaké si néli re lima po bóténé nje ni bóngo pnuw ta rpe i njé ma ndadi i pana. 9 Pnuwé njé rfangósno i “Babelé”. (Babelé né méitén ésó ta tlongé né, re bo nfamgo re méitén Ibrani ta ni ngale ‘tcae néli re lima pa’). Rfangósno i ta né sababta po géwgów ta njé, Jou Lahatala niwéné keé farimé suku né riri méiténé né, se rfalcaé pana. Re po géwgów ta njé i ro ta Jou nfasaké keé si néli re lima po bótén lóyé njé wlólo né.
Semé ntu re gbu
10 Bo kéfétén Semé ntu re gbu né, fanfaje: Jou Lahatala nfadiré bótén lóyé nje rewóré, se i mnuwo taun nuén luwé nóté, Semé ni umuré né re taun nuén witéncó, bóngo nduké ntu món ta ngósno Arpaksadé. 11 Né télapésé, nduk ntu iglé nóté, sogado ni taun nuén witénwonémé ga nmóté.
12 Arpaksadé ni umur taun nuén yófétel re limé, nduké ntu món ta ngósno Sela. 13 Rewóré ta né, Arpaksadé nduké ntu món re mépin iglé nóté. Sogado ni umur taun nuén witén fót re yófétel re walé ga nmóté.
14 Sela ni umur taun nuén yófételé, nduk ntu món ta ngósno Eber. 15 Pocé se néli Sela nduké ntu món re mépin iglé nóté. Sogado ni taun nuén witén fót re yófétel re telé, nmóté.
16 Eberé ni umur taun nuén yófétel re fóté, nduké ntu món ta ngósno Peleg. 17 Rewóré ta né, Ebere nduké ntu món re mépin iglé nóté. Sogado ni taun nuén witén fót re yóféwoném re fóté, ga nmóté.
18 Pelegé ni umur taun nuén yófételé, nduké ntu món ta ngósno Rehu. 19 Pocé se néli Pelege nduk ntu món re mépin iglé nóté. Sogado ni umur taun nuén witénluw re yófétel re popété, ga nmóté.
20 Rehu ni umur taun nuén yófétel re luwé, nduké ntu món ta ngósno Serugé. 21 Pocé se néli, Rehu nduké ntu món re mépin iglé nóté. Sogado ni umur taun nuén witénluw re yófétel re popété, ga nmóté.
22 Ta Serugé ni umur taun nuén yófételé, nduké ntu món ta ngósno Nahoré. 23 Pocé se néli Serugé nduk ntu món re mépin iglé nóté. Sogado ni umur taun nuén witénluw re yófételé, ga nmóté.
24 Nahoré ni umur taun nuén yóféluw re popété, nduké ntu món ta ngósno Tera. 25 Pocé se néli Nahoré nduk ntu món re mépin iglé nóté, se ni taun nuén witéncó re yóféfót re walé, ga nmóté.
26 Tera ni umur taun nuén yóféfité, nduké ntu món isó, ngósno Abramé. Rewóré ta né, nduk ntu séluwé nóté, isó ngósno Nahor, isó ngósno Harané.
Tera ntu re gbu
27-29 Néte bo kéfétén Tera ntu re gbu né. Tera ntu né Abram, Nahor, re Harané. Harané ntu món isó ngósno Lot, isó ngósno Yiska, re ntu mépin isó ngósno Milka. Tera nmót pafule, i ntu Harané re nmót po pnuw Ur ta i ntubo i njé, po bótén Babilonia. Abramé néfsóo mépin isó ngósno Sarai. Nahoré ga néfsóo Harané ntu ta ngósno Milka. 30 Mayta Sarai re ntu pa.