Jou Lahatala ni jaji po Nuh ni
9
Rewóré ta né, Jou Lahatala nfabarakat Nok i re ntu né, néceg faje, “Awé mare ntim re gbim fafélé, bo ffabékbak bóténé nje. 2 Mané, in re haiwan-haiwan ta nésé né, nase farimé rémtaté mewé. Ya kpo mewé bo fkuasa keé. 3 Farimé ta né ma ndadi ménómi mnómé. Tatubé, masolo ayé wlu lé ta Ya kpo mewé bo ndadi nómi mnómé. Mayta nte, ta féléo i né Ya kpo mewé ndimé bo fó.4 Masolo esó ta mewé mati fó na, né haiwan wóngto ta rfaselé ni léló pafule, mati fó na, sababta farimé ta ktulada né, ni léló né ta sogado rhidupé. 5 Ta mulo né, iga kyat pari haiwané npuné kyat, Ya nase kpo i sélsól sogado nmóté. 6 Kyaté né ktulada si, riri modélé né dolo Ya. Necé ta mulo ga pai le ta npuné kyaté, i ma nó sélsólé né, nase kyaté rpuné keé i nóté. 7 Mewé ga, mare ntumi re gbumi fafélé, bo ffabékbak bótén lóyé nje.”
8 Rewóré ta né, Jou Lahatala nécego Nok i re ntu nesté faje, 9 “Nte Ya bo kpe jaji po aw re ntim re gbim nópé né, 10 re farimé haiwan ta aw re si ffadéréré fsópén po kapalé wlólo né. 11 Ya nik jaji po mew ni né ta dolo faje: Farimé ta ktulada né, kfadiré be nuéncó ta nte le. Ya nase kfadiré bóténé nje pana. 12-13 Kéjaji ta nte po mew re farimé kyat re haiwan ta mew re si né se nópé. Se nte kpe bo sogado funé re fémnaw ta kéjaji né fatuwé. Kfapél rantub po ya ngawa-ngawa lo bo iga fémnaw i, né nase mewé re farimé kyat re haiwan ta nópé né funé ro ta nik jaji njé sogado ga fajé néli le. 14 Nuén téptipéné iga kfaket langété njé re méliké, bóngo témnaw rantubé njé, 15-17 Ya nase klolmo nik jaji né po mew re farimé kyat re haiwan po bóténé nje ni né ta Ya nase kfadiré keé bóténé nje pana, sogado fajé néli le. Iga kémnaw rantubé njé, kfatélolmo Ya nik jaji po mew ni né myangés pa.”
Nuhé i re ntu né
18 Noké ntu ta rcópén po kapalé njé ni né, ngósnori né Semé, Hamé re Yafeté. (Hamé njé, Kanaané ni papa i). 19 I mdio Noké ntu sételé nesté si ta sogado reni farimé kyat po bótén lóyé nje ni né.
20 Noké ni yabé né npe be bété. I ta faywóbno npe bét angguré né. 21 Nuéncó Noké niném angguré se némse. Bóngo nésólé keé ni kabaya né ndimé se nyénéf i po min ni umé wlólo né wóngét bóto i. 22 Hamé ncung néminé némnaw ta ni papa wóngét bóto i né, bóngo ncópén nétó nfabingo fténo séluwé nesté. 23 Bóngo Semé i re Yafeté réyó juba isó, réwóté i néya jéjólori lo né, rcung némin umé lo, rfané né résué si. Néminé, régiwé si nésé bo ma rémnawé riri papa ta wóngét bóto i né na, bóngo rfura riri papa re juba njé.
24 Ta Noké ni mse né dolo re myangésé né ga nuné sói ta ntu ta téwyóy i njé npe po i ni né, 25 bóngo néceg faje, “Jou Lahatala nase nfasól awé, Hamé, se ntim Kanaané njé nase ndadi beyak ta re mulo pa po i rémó re fténo nesté ni. 26 Ya ktail Jou Lahatala ta Semé ndéréré I njé. Kanaané nase ndadi beyak po Sem ni. 27 Jou Lahatala nbóng Yafeté ni kawasa se géwgów ta i ntolno né, nase nbóng ta npélóyé. Ntu re gbu ta ntebé nópé né, nase rfatolné si re Semé ntu re gbu né. Kanaané i re ntu re gbu né ga nase rdadi beyak po Yafeté ntu re gbu né ni.”