Wóé ta nbaké njé bo nlósé
8
Pocé Jou Lahatala nuta Noké, i re farimé haiwan ta po min kapalé njé ni wlólo né, bóngo npe moré, se wóé njé ma nlós léwlów-léwlów nópé. 2 Wóé mtó ta po bétbét wlólo né, re wóé ta po yama langété lo né ma, nfatébéné keé, se félfélé njé ma ntébéné. 3 Wóé njé nlós léwlów-léwlów, sogado ngané witéncó re yófélimé tabóngo 4 kapalé njé nésisé i po métét Araraté ni pépo lo, mgo po tanggal yófésó re péfité, po sni ta séfité né. 5 Pocé wóé njé ma nbóng be nlós nópé, se mgo po tanggal pusó, sni ta yófésó né, métét-métét pépo né re rémnawé ro.6 Pocé se néli sogado ngané yóféfóté nóté, ga Noké népil kapalé njé ni jalena isó, 7 bóngo nfaopé mané gokgok isó. Mané njé nénopé i néli re lima le, néléy néli kapalé lo pana, sogado bóténé njé némangé. 8 Rewóré ta né, Nok nfaopé mané pombo isó nóté, bo nuné ta wóé njé re nlós pari tisé. 9 Mané pombo njé nopé i mayta wóé njé nbékbaké lesu, se nduké ni géwgów pa ta bo nétingo, bóngo néléy néli kapalé lo nmulé. Noké nyó i, se nfasung i néminé nmulé. 10 Pocé ngané fité télapésé, bóngo nfaopé mané pombo njé nóté. 11 Ni mérimé né mané njé néléo i lima, po sumo lo né reni ay zaituné wlu gélólo mut có. Né bóngo Noké nuné ta wóé njé re nlósé. 12 Rewóré ta néi, i mnuwo ngané fité nóté, bóngo nfaopé mané pombo ta njéi nóté. Nfaopé i ta né, mané njé néléo i lima pana.
13 Ta Noké ni umur taun nuén witénwoném re pusó né, mgo po tanggal pusó po sni ta isó, bóténé njé re bo némang. Pocé Noké népil kapalé njé ni fófén ta po ya né bóngo néngóto néli re lima. Némnaw ta bóténé njé re némang cuci. 14 Mgo po tanggal yóféluw re péfité, sni ta séluwé né, bóténé njé re némangé ndimé.
15-16 Pocé bóngo Jou Lahatala nécego Nok po kapalé njé ni faje, “Aw re nim pégelé, ntim re nim mélófé nesté, fsópén óro. 17 Haiwan-haiwan ta myaku sogado ta pélóyé, farimé fsópné si, bo rfapéké re rfantuné bo rfabékbak bóténé nje nmulé.”
18 Pocé bóngo Noké i re ni pégelé, nturi re ni mélófé nesté ma rcópén po kapalé njé ni. 19 Farimé haiwan rfadéréré nae ta usé, rcópén lima kapalé wlólo né.
Nuhe npe ni sadaka
20 Nétó bóngo Noké nfajólo lóy lima, nfarén néya, nfakéwelo géwgów ta bo ntapéné ni sadaka bo nfapélóy Jou Lahatala. Pocé Noké nyó haiwan ta Jou Lahatala nécegé riri halalé né, us esó nyó isó, bóngo nfapel néya géwgów ta re nfakéwelo i njé ni se ntapéné npe ni sadaka.a 21 Ni sadaka ta ntapéné né pépu mnó, se Jou Lahatala mgo wlo, bóngo néceg po wlo wlólo faje, “Masike kyaté né rpe sélsól félé, Ya nase kfamót si ta dolo nte pana, sababta Ya kuné kyaté né rémyaku lesu sogado rpélóyé né, félé be ruta ta lé. Ya nase kpe pana bo kfamóté keé farimé ta Ya ktulada né, ta dolo Ya kpe ta taga nte né. 22 Bóténé nje nase fajé i le se kyaté né nase rfalté, rfalingété, rbósém bébobél re rbósém mafyanésé, reni félfélé re ngénngané wlólo, reni dorém re ngénngané. Técegé nte bóténé njé halé re tiso i.”