Wóé njé nbaké se nfadiré keé bóténé
7
Pocé fajé bóngo, Jou Lahatala nécego Nok faje, “Masolo awé le, kyat isó ta wlemé métegél po Ya ni. Se aw re nim dél umé wlólo si farimé fsungé ro némin kapalé njé ni. 2 Bóngo mfauto haiwané né nae ta usé. Haiwan ta kécegé halalé né, mut món re pégelo, faabén fité.a Ta haramé né ga mut be món re pégelo, faesó le. 3 Kané awé mfauto haiwané né, bo félfélé njé re ntébéné, haiwan ta né ta bo rfapéké re rfantuné bo rfélé nmulé po bóténé njé ni. 4 Góli be ngané fité, Ya bo ktebo félfélé ta re tébtébno pana, i mnuwo né ngané yóféfóté, bo farimé ta Ya ktulada né rmóté ndimé.”5 Ta Jou Lahatala nané né, Noké npe ndimé.
6 Ngénngan ta félé njé bo ndadi i ro né, Noké ni umur re taun nuén witénwonémé. 7 Noké i re ni pégelé, re nturi re riri pégelé né, rcung po kapalé njé wlólo, bo wóé njé mati nyó si na. 8-9 Haiwané né ma nae ta usé. Us esó món isó re pégelo isó. Haiwan ta rfan pari rcaléy po bóténé lo re ta rénopé, reni haiwan ta halal reni ta haram. Farimé famwómo i lima Nok ni se rdéréré si rcung némin kapalé njé ni ta dolo Jou re nané né.
10 Ngané fité né re télapésé, bóngo félfélé njé ma ndadi i. 11 Mgo po tanggal yófésó re péfité, po sni séluwé né, bóngo farimé wóé mtó ta po bétbété wlólo né nfatépówo i se nbébibél néya. Fajé nóté, wóé mtó ta po ya langété lo né ma nfatépówo i se téfrór nópé. 12 Npe félfélé ta pélóyé, i mnuwo ngané yóféfót re dorém yóféfóté. 13 Ngénngan ta né, Nok i re ntu, Sem, Ham re Yafet, si re riri pégelé né re si po kapalé wlólo. 14 Haiwan ta rdé si se rcung po kapalé lo né, nae ta usé, ta rmémuf sogado ta rmasésro, ta myaku re ta pélóyé, re farimé haiwan ta rénopé. 15 Farimé haiwan, us esó món isó re pégelo isó nfawómo i lima Nok ni po kapalé njé ni ta dolo Jou Lahatala nané né. 16 Bóngo Jou Lahatala nakété keé kapalé ni ngówéné njé se wóé njé ncung pa.
17 Wóé njé nbóng ta nbaké, i mnuwo ngané yóféfóté, nawét néya né ta délé mógé. Se nfapuréyé keé kapalé njé néya. 18 Wóé njé nawété se nbóng ta nbékbak néya, sogado kapalé njé némyalén i néli re lima po wóé pépo lo né. 19 Nawét sogado métét-métét ta mógé né ma mdiré ndimé. 20 Wóé njé nawét sogado néliw métét pépo meter péfité. 21-23 Pocé bóngo farimé kyat re haiwan ta Jou ntulada né nfatmóto i.b Ta rmót pa né, masolo Noké i re farimé kyat re haiwan ta rcapél po kapalé njé ni né. 24 Wóé njé nénbak i fajé ro, i mnuwo ngané witéncó re yófélimé.