Kyaté né wlori be néli ta lé lo
6
Pocé se néli, kyaté né nbóng ta re félé po bóténé nje ni wlólo. Nturi mépiné ma félé. 2 Pocé fajé reni món-món ta rtebé yama sorogaa rémnaw mépiné mya né fié-fié, se mépin ta i pua i ta mgo wlori i, bóngo réfsóo róri si. 3 Se Jou Lahatala néceg faje, “Nte kyaté-kyaté né, Ya nase kpo si fié pana, bo rhidup sogado fajé néli le. Si kyat si se mare rmóté. Si riri umuré né, nase nwómo i taun nuén witéncó re yóféluw pana re rmóté.”4 Ta món-món yama soroga né réfsóo mépin ta po bóténé nje wlólo né, si nturi re gburi né kyat ta rémógé re rpélóyé. Kyat ta né ta délé rkuat re rémtat gélesó esó pa, tagare si ma tatubé lima lesu re ngósnori.
5 Pocé Jou Lahatala néngóto, “Kyat ta po bóténé nje ni né, ta délé re rdadi kyat léo si. Po wlori wlólo né ma rénuta be ta lé. 6-7 Beé, ga bangéné mewé. Re ktulada mewé, kfatoléné mew po bóténé nje ni, nópé ga fdadi kyat léo mewé né!” Bóngo wlo njé némjakém sogado néceg faje, “Bo kuné ta fajé, nase ktulada si pa. Se Ya nase bo kfamóté keé farimé kyat re haiwan ta ktulada né!” 8 Masolo Noké le ta nfamgo re Jou Lahatala wlo né.
Jou Lahatala nané Nuhe
9-10 Nete bo téfétén Noké. Noké ntu món sételé: Sem, Ham re Yafet. Noké wlo méteglo Jou Lahatala. Bo i re kyat ta pocé né, maduga i le ta renó sélsól pa. Nfan re ntoléné né, wlo njé i be po Jou ni.
11 Kyat ta iglé né ga, rérénpe be ta lé po bóténé njé wlólo. 12 Se Jou Lahatala néngóto si né, fatuw-fatuw ta rénpe né reni ta fié esó pa, sababta farimé kyaté né rpe be wódól ta lé.
13 Pocé bóngo Jou Lahatala nécego Nok faje, “Ya bo kfamóté keé kyat ta ktulada si né ndimé, sababta bóténé nje re nbékbako be si róri sélsólé né se. Ya bo kfamóté keé si, re kfadiré keé bóténé nje nuéncó le. 14 Se, Noké, kané awé bo méyówé ay gofirb bo msalé nim fóféné, bo mpe nim kapal faisó ta npélóyé. Po miné né mpe reni kamar-kamaré. Rewóré, métim i ga mélulo i gétgité né po min re po tó, bo ma ncelé na. 15 Kapalé njé ni mlóngo né fameter witéncó re yófétel re pételé, msóo né fameter yóféluw re péluwé, mógo né fameter yófésó re pételé. 16 Kapalé njé mpe dek faabén tel néya, re mpe ni ngówén faisó po ni lapo lo né. Fófén ta mfaket po ya né, mfamasoa fasenti yóféfót re pefóté, sogado néli rére lo né. 17 Ta mulo kané aw mpe fajé né, Ya nase bo kpe félfélé bo kfamóté keé sói néli ta po langét pópo nje ni. Ta féléo ta po bóténé nje wlólo nte, nase rmóté ndimé. 18 Masolo awé ga, Ya nase bo kpo aw jaji isó. Aw re nim pégelé re ntim re nim mélófé nesté bo fsung némin kapalé njé ni wlólo bo ma fmót na. 19-20 Fajé nóté, mfasaplo haiwan némin kapalé njé wlólo né, bo ma rmót na. Farimé haiwané né us esó, món faisó re pégelo faisó. 21 Tagare mut farimé nómi yélén re haiwané né róri mnóm.” 22 Pocé Noké npe ndimé sói néli ta Jou Lahatala nané i né.