Adamé ntu re gbu
5
1-2 Faiwóbno ta Jou Lahatala ntulada kyaté né, riri modélé né dolo I. Ntulada si né món re mépiné. Nfabarakat si bóngo nfangósno si, “Kyaté” (ta rmaméitén Ibrani né réceg, “adam”). Nte bo téfétén Adamé ntu re gbu ta nópé né.3 Ta Adamé ni umur taun nuén witéncó re yófételé né, nduké ntu món isó ta ni model dolo i ro, bóngo nfangósno i Seté. 4 Seté ntubé rewóré, Adamé nduké ntu iglé nóté. 5 Sogado Adamé ni umur taun nuén witénpopét re yófételé, ga nmóté.
6 Ta Seté ni umur taun nuén witéncó re limé né, nduké ntu món isó ngósno Enosé. 7 Enosé ntubé rewóré, Seté nduké ntu iglé nóté. 8 Seté ni umur taun nuén witénpopét re yófésó re luwé ga nmóté.
9 Ta Enosé ni umur taun nuén yófépopété né, nduké ntu món isó ngósno Kenané. 10 Rewóré ta né, Enosé ma nduké ntu iglé nóté. 11 Sogado Enosé ni umur taun nuén witénpopét re limé ga nmóté.
12 Pocé ta Kenané ni umur taun nuén yóféfité né, bóngo nduké ntu món isó ngósno Mahalaleelé. 13 Rewóré ta né, Kenané ma nduké ntu iglé nóté. 14 Se sogado Kenané ni umur taun nuén witénpopét re yófésó ga nmóté.
15 Ta Mahalaleelé ni umur taun nuén yóféwoném re limé né, nduké ntu món isó ngósno Yaredé. 16 Yaredé ntubé rewóré, Mahalaleel nduké ntu séfis néli nóté. 17 Sogado Mahalaleelé ni umur taun nuén witénwal re yófépopét re limé ga nmóté.
18 Ta Yaredé ni umur taun nuén witéncó re yóféwoném re luwé né, nduké ntu isó ngósno Henoké. 19 Henoké ntubé rewóré, Yaredé nduké ntu séfis néli nóté. 20 Sogado Yaredé ni umur taun nuén witénpopét re yóféwoném re luwé, ga nmóté.
21 Henoké ni umur taun nuén yóféwoném re limé né, nduké ntu món isó, ngósno Metusala. 22 Pocé po taun nuén witéntele wlólo né, Henoké nfan néli re lima né, wlo njé masolo i be po Jou Lahatala ni. I ma nduké ntu séfis néli nóté. 23-24 Henoké wlo njé ta délé nérakén be Jou Lahatala se I ni umuré né sogado taun nuén witéntel re yóféwoném re limé tabóngo Jou Lahatala nuté keé i po soroga lo.
25 Ta Metusala ni umur taun nuén witéncó re yóféwal re fité, nduké ntu món isó ngósno Lameké. 26 Rewóré, nduké ntu séfis néli nóté. 27 Metusala ni umur taun nuén witénpopét re yóféwoném re popété ga nmóté.
28 Ta Lameké ni umur taun nuén witéncó re yóféwal re luwé né, nduké ntu món isó. 29 Bóngo néceg ta, “Masike tésyape rir maméekét po bétbét ta Jou Lahatala nkutuk i njé ma, mayta tduké yomya ta nje, se tcéngé le.” Bóngo nfangósno yomya njé Noké, ta ni ngale “nfatóyné ité.” 30 Rewóré ta né, Lameké nduké ntu séfis néli nóté. 31 Lameké ni umur taun nuén witénfit re yóféfit re fité ga nmóté.
32 Pocé Noké ni umur taun nuén witén limé, bóngo nduké ntu món sételé. Isó ngósno Semé, isó ngósno Hamé, isó ngósno Yafeté.