Kainé npun Habelé
4
Rewóré ta né, Adamé i re ni pégelé njé Hawa, rtolné riri fsówé né, bóngo Hawa npe lapo. Nmawyóyé né, ntu njé món i, se néceg ta, “Jou Lahatala nfabarakat ya, sogado kduké ntig món isó.” Bóngo nfangósno i Kainé, ta ni ngale, ‘kduk’. 2 Rewóré ta né, Hawa nduké ntu món isó nóté, rfangósno i Habelé. Sogado rpélóyé, Habelé ni yabé né, npiara domba, Kainé ga npe nó bété.3 Nuéncó, Kainé nfalingété ntébéné, bóngo nyó téglesó se npe ni sadaka po Jou Lahatala ni. 4 Habelé ma néyó ni domba ntu ta ténlóyé né isó, ga néwetés i se nyó wóngto ta fié né, bóngo i ma npe ni sadaka po Jou Lahatala ni. Habelé ni sadaka né, Jou Lahatala ta délé mgo wlo.
5 Kainé ni sadaka né ga, Jou Lahatala mgo wlo pa. Kainé nuné ta né bóngo ta délé ncawané, se usno né bututu ndimé. 6 Bóngo Jou Lahatala nécegé Kainé, “É, mpe sói se ga msawané, se usnomé né ma bututu ndimé? 7 Awé re muné, iga mpe ta fié, né Ya wlegé ncuka, se awé ma nase mséngé. Ta lé né, wlegé ncuka pa, né ga mpe be séwsawané né! Iga bo mdéréré be nim séwsawané njé, nase nut aw néli po ta lé lo, bóngo ta lé njé nase nkawasa keé wlemé njé. Se mati mpo fié bo nim séwsawané njé nut aw po ta lé lo na.”
8 Rewóré ta né, bóngo Kainé ncogaro Habelé, “Lima, tfan it po bété lo pa?”
Se re si po bété lo, télél be ga Kainé npów Habelé se nfamóté keé i.
9 Pocé bóngo Jou Lahatala nutné Kainé, “Kainé, ga fténom Habelé i pua?”
Kainé ncónglo Jou faje, “Ayo? Kuné i pa. Necé anik yabé pa, bo kéjaga be fténogé njé né!”
10 Pocé Jou Lahatala nécegé i faje, “Ce, Kainé, awé nte ga wlemé néfeno né se mpuné keé fténomé njé né! Ni léló né re mégéné se n-gagélay yama Ya ni, néroré bo kpo nam tén ta dolo awé mpe i né. 11 Se nte anam sélsólé né, awé mduk bétbét pana, sababta fténomé njé ni léló né re mégén pocé se re ncilét nóp bétbété lo. 12 Se bo mfatónémé ma, téntónémé né nase reni pyono pa. Awé nase mdadi kyat isó ta mténténgén pa, renim géwgów ta bo mtolno né ma métegél pa po bóténé nje ni.”
13 Pocé bóngo Kainé ncónglo Jou Lahatala faje, “Alli, ga mfasól ya né, i ni météwé! Bo kpó né nase kéfen pa. 14 Awé mpo ya fié pana bo ktoléné kténgén po nak bété nje ni, se re mélówé keé ya po Aw ni. Ya kémtaté, bo kdadi kyat fénfan ya, pai le ta nfakduké ndé ya né, nase rpuné keé ya.”
15 Mayta Jou Lahatala ncónglo i faje, “Na rpun aw pa! Bo rpun awé, Ya nase kfasémulo si nuén fité.” Rewóré ta né, Jou Lahatala npe fafayal isó po Kain ni, bo iga kyaté rduk i, ma rpun i na. 16 Rméiténé rewóré, bóngo Kainé neé Jou Lahatala se nfan i néli po Edené ni faspal ngancóo bóngo ntolén i po bótén ta ngósno Nod, ta ni ngale né, “Fénfané”.
Kainé ntu re gbu
17 Kainé i re ni pégelé ma rtolné riri fsówé né, bóngo ni pégelé npe lapo. Nmawyóyé né, ntu njé món i, bóngo rfangósno i Henoké. Rewóré ta né, Kainé npe pnuw isó, pnuwé njé ma nfangósno i Henoké. 18 Henoké, Irade ni papa i. Iradé, Mehuyaelé ni papa. Mehuyaelé, Metusaelé ni papa i, Metusaelé ga Lameké ni papa i.
19 Lameké ni pégelé séluwé, isó ngósno Ada, isó ngósno Zila. 20 Ada ntu Yabalé. Yabalé ntu re gbu nópé né kyat ta faywóbno ta rtolén po tenda lo, re rpiara haiwan.
21 Ada ntu isó nóté ngósno Yubalé. Yubalé ntu re gbu nópé né, si ta faywóbno rarémongé musiké, kecapi re sulingé. 22 Zila ntu isó ngósno Tubal-Kaine. Tambaga re besi né nénpeé pakakas sói le ndadi i. Zila ntu mépin njé ngósno Naama.
23 Pocé bóngo Lameké nécego ni pégelé séluwé né, “Ada, aw re Zila, flongé ta bo kécegé nte. Móné mya isó nfayóbét ya, mayta ya kpuné keé i. 24 Tatubé, Jou Lahatala nécegé iga kyat ta bo rpuné keé Kainé, nase nfasemulo si nuén fité. Ya ga, bo kyaté rpun ya, nase kfasemulo si sogado nuén yóféfit re fité.”
Seté i re Enosé
25 Pocé Adam i re ni pégelé rduké nturi isó nóté, bóngo Hawa néceg faje, “Jou Lahatala re npo ntig món isó nóté, bo niwén Habel ta Kainé re npuné keé i njé.” Bóngo nfangósno i Set, ta ni ngale né, ‘npo’. 26 Seté ntu món isó nfangósno i Enosé. Waktu ta néi, ga tagare kyaté né faywóbno fafié rfapélóy Jou Lahatala ngósno.