4
Su Keksalabuuk nug Lawas ni Kristu
1 Kaas duuni penengiin ku diniu, naan, pinikutanu sabaˈu mektamuy tu Kaunutan ta. Subay pelepeng niuig betad niu tu kegenggat diniu nu Megbebayaˈ sumakup diniin. 2 Gempia mesumayaˈ amu, penemalay niu pebebaˈayig lawas niu tu samataw niu, mukaˈ pektigel amu di kelegenay niu. Pektigel damu dema laak dig lapang nu samataw niu, puˈ meglinelaatay amu. 3 Penamal amu meksalabuuk miksekat di kelinaw mbianan niu, puˈ sinalabuuk amu nug Balakat nu Megbebayaˈ. 4 Puˈ salabuuk dig lawas su tibuuk pikumpungan nu nga sakup ni Kristu, mukaˈ salabuuk daig Balakat nu Megbebayaˈ. Salabuuk da pagidi pedetengen niu, sabaˈ nu kegenggat diniu nu Megbebayaˈ. 5 Mukaˈ salabuuk pagidi Kaunutan ta. Salabuuki tingeban tituluˈan di kekpetuud, mukaˈ seginis laaki kebunag tubig tu nga sakupen. 6 Salabuuk laaki Megbebayaˈ mukaˈ Gamaˈ nug launan getaw, su meglekaunutan dig launanen. Pegbenwananenig launanen, mukaˈ pepenggulaulaanenig baalenen dig launan getaw.
7 Laak dagid ita, saladuaˈ, tinukidan ita begayay ni Kristu tinawan. Ki kektukid dun ni Kristu, dinunutanen gupia su mauyaˈanen. 8 Ndaˈ ba mesulat di Misulat Taluˈ nu Megbebayaˈ,
“Benaˈ pilentu ditug langit,
Melauni dinaapen miwiten,
mukaˈ bigayanen su nga getaw tulungen.”
9 Naa, ki pilentu kini ditug langit, luminusad guna dini gembabaˈ pa benwa, dinig lumbang kini. 10 Maˈantu sug luminusad dinig lumbang, iin dademai pilentu ditug ditaas sampay tu gekbus langit, adun meleepen pegbenwanay su gekleb langit buˈ lupaˈ. 11 Iin dadema su migbegay tulungen tu nga sakupen. Naa kagina bigayan ilan niin tinawan, duun dinilani mitenduˈen peneliganen, duuni mitenduˈen megwali taluˈ nu Megbebayaˈ, mukaˈ nga megukit Gempia Petenday. Duun dademai mitenduˈen meguit sakup, mukaˈ nga mekpetuˈun dun. 12 Iini bigayanen ilan dun tinawan, puˈ adun mesangkap su nga piglegetawan nu Megbebayaˈ mektinebangay. Megiseg dayun gupia su kekpetuud nu nga sakupen. 13 Kaas mekeksalabuuk ita di kekpetuud ta mukaˈ di kesabut ta mekatag tug Bataˈ nu Megbebayaˈ, sampay maˈniin daita nu migineken getaw, puˈ mengganget gupia dig delendeman ta su kesalig ta diniin, mukaˈ melepengig betad ta tug betad ni Kristu. 14 Ndiˈ ita dayun mpektuˈunan nu mekpetuˈun dig balus. Su nga tituluˈan nu nga mekpetuˈun kia, migduaˈduaˈi kekpetuud nilan, puˈ metau meglimbung su mekpetuˈun dun. Su melemu megduaˈduaˈi kekpetuuden, iini maaˈ nu gembataˈ pa, melemu uiten nu nabek mukaˈ pekseseguliˈen dulukay nu genus. 15 Laak ita, kagina meglinelaatay ita, subay meglegintuud ita tu nga samasakup ta, adun megiseg dig delendeman ta sug launan betad sakup, maaˈ nug betad getaw megineken, sampay maˈniin ita ni Kristu. Mukaˈ si Kristu kini, iini mibaal gulu ta, ita maaˈ nug lawasen. 16 Megbayaˈ si Kristu di megleginis sengkapan nug lawasen, adun meksalabuukig launan. Mipeduunan gugatenig lawas adun tumibuuk. Kaas saˈ sukali kuleg nug launan sengkapanen, tumulinig lawasen. Saˈitada, su nga sakupen, diadia megisegi kekpetuuden dini Kristu, sampay gempageni kekpetuud nu tibuuk pikumpungan nu nga sakup, sabaˈ nu kekpinetailay ta.
Sug Begu Ketubuˈ
17 Kaas duun nai teluˈen ku diniu, puˈ peneliganu nu Kaunutan ta, pegadu diniu, subay ndiˈ niu dunutay gusayig betad nu nga kanaˈ mekpetuud, puˈ ndaˈi pantagen sug delendeman nilan, 18 puˈ mideleman pailan. Ndaˈ ilan mpeduma di ketubuˈ begay nu Megbebayaˈ, puˈ ndaˈ nilan iin pektalentenay, mimilas ilan gupia. 19 Ndaˈ dademai piid nilan, kaas bigay nilan su gayak nilani megbayaˈ dig delendeman nilan. Mauyaˈan nilan penggulaulaan nilan su nga ginis dusa di ndaˈi tigel nilan.
20 Laak yamu pasiˈ, kanaˈ maˈniai pituˈun diniu mekatag dini Kristu. 21 Kanaˈ duaˈduaˈi kedengeg niu dini Isus, mukaˈ kagina suminakup amu dun, piktuˈunan amu di metuud puun diniin. 22 Kaas subay belengen niu sug daan delendeman niu, su gandang migagak diniu saˈ duminunut pamu di melaat pigbetad niu. Mpeglaatan amu nug daan delendeman niu kia pibian di gayak niu, puˈ su gayak nu getaw, metau meglimbung tug lawasen. 23 Subay pegbeguay niuig delendeman niu mukaˈ ginaa niu. 24 Subay peneem niu di ginaa niu sug begu gasal niu, biwat nu Megbebayaˈ maaˈ nug daniin. Mukaˈ kig begu gasal niu, maitaˈ dig begu betad niu, puˈ meksikesuun amu tu samataw niu, mukaˈ metelimaˈ amu nu Megbebayaˈ.
25 Kaas subay ndiˈ namu gusay pegbalus, segaga taluˈ niu su metuud tu nga samasakup niu. Puˈ ita, suminalabuuk ita sumakup dini Kristu, launan ta.
26 Saˈ pinenggiˈ mangit amu, delendem niu deliˈ ki ndiˈ amu mekesalaˈ. Ndiˈ niu pesegebiiayi melaat ginaa niu, 27 adun ndiˈ amu mpenulay nu Palin.
28 Saˈ pinenggiˈ duun diniui megdaaw, subay mengimbaal di kektinantu kegleketubuˈen, sabayaˈ di megdaaw puliˈ. Meˈebanganen dayun su ngag duuni kulangen.
29 Saˈ megabitabit amu, ndiˈ amu meglaat taluˈ, ndiˈ amu mengumpiid. Segaga, taluˈ niu su mekepegiseg di melengas delendeman nug duma niu. Taluˈ niu su gempia, adun meˈebangan sug duma niu. 30 Puˈ saˈ duun diniui meglaat taluˈ, melibuleng dun sug Balakat nu Megbebayaˈ. Kaas ndiˈ niu penggulaulaay. Tegyungen ku amu, kig Balakateni tuˈus puˈ danu Megbebayaˈ namu, mukaˈ tuˈus dadema puˈ ditug binayaˈ gebii buˈ gendaw, pebeluyenen tantu sug launan sakupen. 31 Subay belengen niu su keglimed niu mukaˈ su gangit niu, mukaˈ ndiˈ amu sempaun. Ndiˈ amu mesasak, mukaˈ ndiˈ amu meksesudiˈay. Ndiˈ melaati ginaa niu tu samataw niu, pia taˈ alanduni mesabaˈen. 32 Sinangkaliˈ pa tanan, subay mektinebangay amu mukaˈ meglinelaatay amu. Pedasun niuig duma niu, maaˈ nu kepedasun diniu nu Megbebayaˈ pibian dini Kristu.