3
Su Pinggulaula ni Pablo tu nga Kanaˈ Getaw Judea
1 Mendadi, kagina maˈantu, naan si Pablo, penenebian ku amu, su saanan kepikut dinaan. Iini pinikutanu dun, inukitan ku amu nu nga kanaˈ getaw Judea mekatag dini Kristu Isus. 2 Naa midengeg niu dun tuˈu, puˈ pigwekilanu nu Megbebayaˈ mikpuun tu tulungen dinaan adun ebangan ku amu. 3 Puˈ sug daansamaˈ pigbuni delendeman nu Megbebayaˈ, biwasanen na mukaˈ pisuunen dinaan. Duuni maikaˈ sinulatu dun. 4 Mukaˈ saˈ penilungen niui sinulatu kini, metuˈunan amu dayun tu kesabutu tug daan pigbuni nu Megbebayaˈ mekatag dini Kristu Isus. 5 Kanugdiin, ndaˈ mbuasay di nga getaw, laak nandaw, biwasan na nu Megbebayaˈ di nga peneligan ni Kristu pinaasen mbaal sesuguˈenen mukaˈ di nga megwali taluˈ nu Megbebayaˈ. Mikpesuun dun dinilan sug Balakaten. 6 Iini gulugan nu pigbuni delendemanen, kanaˈ getaw Judea da laaki pepianan nu Megbebayaˈ, segaga pia taˈ bensaay dun, ki getaw saˈ mekpetuud da dini Kristu Isus, mampuˈ da pagid dig lawas ni Kristu mukaˈ dig launan pinasad nu Megbebayaˈ tu nga mekpetuud ditu Gempia Petenday mekatag dini Kristu Isus.
7 Naa naan kini, binaalu nu Megbebayaˈ sesuguˈenen megukit tu Gempia Petenday, puun tu tulungen dinaan mukaˈ tu ginuungen. 8 Laak tampusan gembabaˈu sakup nu Megbebayaˈ. Pia maˈantu, pipiananu nu Megbebayaˈ di kesuguˈen dinaan ukitan ku su nga kanaˈ getaw Judea di Gempia Petenday. Piningalan dun Gempia Petenday, puˈ ndiˈ mbilanging lagaˈ nu tulung dinita nu Megbebayaˈ pibian dini Kristu. 9 Sinalig dinaan dadema nu Megbebayaˈ, paitaˈu tug launan getaw su kebian nug daansamaˈ pigbuni delendemanen. Su Megbebayaˈi miwat tug launanen, mukaˈ iini pigbuninen dun su pigdelendemen sampay nandaw, 10 adun pesuunen na tu nga megbayaˈ mukaˈ meglekaunutan ditu kediwetaan, mukaˈ ditu nga duma kanaˈ kilawan, su gininisan bian nug delendemanen. Maitaˈ nilan ditu pinggulaula nu Megbebayaˈ di tibuuk pikumpungan nu nga suminakup diniin. 11 Pimaˈantunen puˈ adun menuud su pigdelendemen kanugdiin. Mukaˈ pa pagid, si Kristu Isus su Kaunutan ta, iin su pibiananen dun. 12 Kagina salabuuk ita diniin, mukaˈ sabaˈ nu kesalig ta diniin, menibeluˈ ita mekpesempel ditu Megbebayaˈ di ndaˈi kepiid ta dun. 13 Kaas penengiin ku diniu, ndiˈ megduaˈduaˈig delendeman niu di kelegenayu kini sabaˈ nu kegukitu diniu. Iini miktigelu dun puˈ adun pepianan amu.
Su Kepetail ni Kristu
14 Mendadi, puliˈan ku da dun, kagina maˈantuig delendeman nu Gamaˈ ta Megbebayaˈ kepianen dinita, madapu diniin menenabi. 15 Edapen ku su Megbebayaˈ, puˈ iini puun nu maˈanan nu sektaang taluˈ, “gamaˈ,” puˈ kada salapenan mukaˈ bansa ditug langit mukaˈ dinig lumbang, iini puun nu ngalanen. 16 Penenebiin ku diniin, pepegeneneni ginaa niu puun tu melengas pegbayaˈen mukaˈ ginuungen pebian dig Balakaten, 17 mukaˈ pebenwanen si Kristu dig delendeman niu pebian di kesalig niu. Penenebiin ku dadema mengganget gupia dig delendeman niu su kepetail niu tu nga samataw niu, 18 adun mesuunan niu dayun su kepetail dinita ni Kristu, yamu kampuˈ nug launan piglegetawan nu Megbebayaˈ. Puˈ su petailanen, ndaˈi tamanen, ndiˈ megelaˈ mesabut, mukaˈ ndiˈ metekad. 19 Saˈ maˈantu, penenebiin ku mengganget gupia tug delendeman niu su petailanen, pia ndiˈ ta megelaˈ mesabut. Iini pinenabiu dun, puˈ adun meleep di ginaa niu su tibuuk gasal nu Megbebayaˈ.
20-21 Naa su Megbebayaˈ, subay pegdedengegen tain gusay, puˈ pia taˈ alanduni gikteb nu penenebiin ta, mukaˈ su gikteb dadema nug delendeman ta, melengas pa dun gupia su gikteb nu mpenggulaulaanen, sabaˈ nu metaas gupia pegbayaˈen meguit tu ginaa ta. Subay maitaˈ nug launan su mekesalebuˈ kepianen di tibuuk pikumpungan nu nga sakupen mukaˈ dini Kristu Isus, nandaw mukaˈ di ndaˈi tamanen! Amen.