Su Sulat ni Pablo
tu nga Getaw
GALACIA
Piuna di Sulat ni Pablo tu nga Getaw Galacia
Mendadi, iin na pelumi sala di nga sinulat ni Pablo, su peneligan ni Isukristu. Piwitan dun ni Pablo su nga pikumpungan nu nga sakup ni Kristu ditug benwa Galacia. Ki Galacia kini, iini prubinsya nu gubirnu Roma ditug Asia, paingalan dun nemun Turkey. Kanaˈ ni Pabloi miktindeg di nga pikumpungan dia, laak melauni kailalanen sug duma nu nga sakup dia. Su melaun sakup ni Isus dia nga pikumpungan dia Galacia kiin, kanaˈ getaw Judea. Iini piwitanen ilan dun, puˈ sabaˈ duuni mikpetuˈun dia gembagel gupia sayep. Puˈ piktuˈun nu nga mikpetuˈun puˈ subay dunutan nu getaw sug daan Palinta nu getaw Judea adun puluˈ megawen. Saˈ maˈantu, mibulugan su kegantiˈ ni Isus di nga getaw. Su pegbayaˈ ni Pablo peneligan ni Isus, pingawaˈ dadema nu mikpetuˈun di maˈnia. Su kesulaten kini, pigad ni Pablo di nga sakup dia nga pikumpungan dia Galacia puˈ subay pemaagen nilan su nga mikpetuˈun dig balus kiin mukaˈ ndiˈ nilan belengen su kebeluy nilan di kedunut nilan tu Palinta. Tinituluˈen ilan dadema puˈ su kebeluy nilan di Palinta, subay ndiˈ mpia baal sikawan nilan megdupang mukaˈ mekesalaˈ.