Su Sulat ni Pablo
tu nga Getaw
GALACIA
1
1-2 Naan si Pablo, peneligan ni Isukristu, mukaˈ sug lumaun mimated ngag dumau, suminulat ami diniu nga pikumpungan tu Megbebayaˈ diag benwa Galacia. Naa su kepeneligan ku, ndaˈ pekpuun di getaw, ndaˈ dadema pebian di getaw, puˈ si Isukristui migenggat dinaan mbaal peneliganen, iin mukaˈ su Gamaˈen Megbebayaˈ dadema, su mikpetubuˈ diniin puliˈ genat matay.
3 Yamu Mingumpated, penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, begayan amu niin tulung mukaˈ pianan ginaa.
4 Naa si Kristu, bigayen matayig lawasen, adun mekpedasun dinita tu nga salaˈ ta, adun peliuun daita dema niin di melaat betad nu nga kilawan nemun. Su kegbegayen dun, dinunutanen gupia su mauyaˈan nu Megbebayaˈ, su pektemuyen ta mukaˈ su Gamaˈ ta. 5 Naa su Megbebayaˈ, gempia penalan mukaˈ pegbesaan di ndaˈi gikteben! Amen.
Ndaˈidunig Lain Gempia Petenday
6 Mendadi mekatag diniu, misebuˈanu dun puˈ ndaˈ ma na maibeni kesakup niu, dayun meteliudan niu su Megbebayaˈ, su migenggat diniu sumakup diniin pibian tu tulung ni Kristu. Puˈ lumingay amu tu sala gukiten laung niu dun gempia petenday. 7 Duun baig lain gempia petenday? Ndaˈidun. Laak iini sinulatu dun ini, puˈ sabaˈ duuni nga getaw mikpalangalang dig delendeman niu tu metuud, mukaˈ mauyaˈan nilan pelinen nilan sia su Gempia Petenday mekatag di kegantiˈ ni Kristu tug limbung ta. 8 Laak taman taluˈu diniu, bisan naan atawaka ki sesuguˈen nu Megbebayaˈ getaw langit, saˈ pinenggiˈ pegukitenen sia diniui pitenday laung niu gempia petenday sala dig daansamaˈ pigukit nami diniu, naa, ukuman iin nu Megbabayaˈ! Mpiglak ditug linaw gapuy! 9 Gandangu mitaluˈ mukaˈ teluˈen ku na puliˈ, pia taˈ taway dun, saˈ ukitenen diniui gempia petenday sala dig daansamaˈ dinawat niu, maukuman iin, mpiglak ditug linaw gapuy!
10 Naa, mekpeˈenal bau di getaw? Ndiˈ mesuˈat, puˈ mpauku mekpeˈenal di nga getaw, mekpeˈenalu ditu Megbebayaˈ laak. Saˈ mauyaˈan ku sia mekpeˈenalu di getaw, naa kanaˈ nau sesuguˈen ni Kristu.
Su Kebian nu Kepeneligan ni Pablo
11 Naa Mingumpated, ki Gempia Petenday ginukitu diniu, pesuun ku diniu puˈ kanaˈ kinilawan. 12 Ndaˈi getaw migukit dun dinaan, ndaˈ dadema pektuˈun dinaan. Sinangkaliˈ pa tanan, biwasan dinaan ni Isukristu.
13 Naa, sug daansamaˈ pigbetadu saanan ku pa dumunut tug betad nu nga getaw Judea mektamuy, midengeg na niu. Piglegetan ku patiˈ su nga sakup nu nga pikumpungan tu Megbebayaˈ. Gikteb nu megagau, piglaatan ku sia su nga pikumpungan kia. 14 Pigiseg gupiai kedunutu tug betad nu getaw Judea, labaw pa dig danug dumau nga telepadu gidad. Pinemalan ku pektalentenay sug betad pingumbilin dinami nu nga ginepuˈay nami, labaw pa dig danug dumau.
15 Pia maˈantu, su ndaˈ pau pegigetaw, pinaasu nu Megbebayaˈ mukaˈ inggatu niin mbaal pegwekilanen puun tu tulungen dinaan. Saˈ miuyaˈan na nu Megbebayaˈ 16 buasanen dinaan sug Bataˈen, adun ukiten ku su Gempia Petenday mekatag dig Bataˈen tu nga kanaˈ getaw Judea, ndaˈi getaw midangepu. 17 Ndaˈ dau dema peditu Jerusalem adun dumangep tu nga miuna dinaan peneligan ni Kristu. Segaga, suminambutu ditug Arabia, dayun mipuliˈu ditug lunsud Damasco. 18 Su ketelu taunen, minangayu ditu Jerusalem, linaawan ku si Pedro mukaˈ mingintuluganu dia niin taman sepuluˈ buˈ lima gebii. 19 Ndaˈig lain peneligan ni Kristu minitaˈu, laak si Santiago su pated nu Kaunutan ta.
20 Naa, metuudi sinulatu, simbayan ku su Megbebayaˈ ndiˈu megbalus.
21 Naa genat nitu, midituunu ngag benwa dia Siria mukaˈ dia Cilicia. 22 Su saanan ku meguliug di ngag benwa kia, ndaˈ pau mailala nu nga sakup di nga pikumpungan diag benwa Judea. 23 Misuunan nilan laak su ginukit nu ngag duma puˈ naan, su getaw daansamaˈ migleget dinilan, iin nai megukit di kekpetuud su gandangen sia peglaatan. 24 Kaas, pinalan nilan su Megbebayaˈ sekat dinaan.