2
Su Kenembaˈ dini Pablo nu ngag Duma Peneligan ni Kristu
1 Tubus itu, benaˈ minayani sepuluˈ buˈ paat taun, mipuliˈu ditu Jerusalem, yami ni Bernabe. Pitendugu dadema dinami si Tito. 2 Sinuguˈu nu Megbebayaˈ meditu. Mendadi, benaˈ minateng ami ditu Jerusalem, miglumpuk ami nu nga kaunutan nu nga mikpetuud, yami ami da. Pigwaliu dayun dinilan su Gempia Petenday pegukiten ku di nga kanaˈ getaw Judea, adun mesanguˈ nilan. Puˈ, saˈ ndiˈ nilan mesanguˈ, naa su pinggulaulau mukaˈ su penggulaulaan ku pa nemun, ndaˈ na siai gatagen! 3 Gempantek su kesanguˈ nilan dun, puˈ pia sug dumau si Tito, ndaˈ nilan tegelay sirkunsisuay, bisan kanaˈ iin getaw Judea.a 4 Ndaˈ sia metegel, laak duuni nga tautau samasakup ta, mauyaˈan nilan metuˈusan sia si Tito. Daan nailan tautau suminalabuuk di pikumpungan ta, adun mesilungan nilan sug betad nu nga sakup kanaˈ getaw Judea. Puˈ su keliu ta di gengkeman nu Palinta, miksekat di keksalabuuk ta dini Kristu Isus. Dagid su nga sagya sakup kia, mauyaˈan nilan mbalud naita puliˈ nu Palinta. 5 Pelai, ndaˈ nami buang mekpetuud dinilan pia selingka, adun ndiˈ nilan mpalin su metuud daan na pisuun diniu di Gempia Petenday.
6 Naa, su ngag duma ta kiin inilala nga kaunutan nu nga suminakup, mitaluˈu inilala puˈ ndaˈig labetu dun bisan taˈ gelalay dun, puˈ kanaˈ meksekat di gelal nilani kemilang dinilan nu Megbebayaˈ metaas saˈ gembabaˈ. Naa ki nga kaunutan kiin, ndaˈi medugang nilan di Gempia Petenday ginukitu. 7 Sinangkaliˈ pa tanan, misabut nilan puˈ naani siligan nu Megbebayaˈ megukit Gempia Petenday ditu nga kanaˈ getaw Judea, maaˈ danu kepesaligen dini Pedro megukit dun tu nga getaw Judea. 8 Puˈ sekat tu ginuung nu Megbebayaˈ, mitenduˈu peneliganen megukit tu nga kanaˈ getaw Judea, maaˈ dadema nu ketenduˈ dini Pedro peneliganen megukit tu nga getaw Judea. 9 Kaas si Santiago, si Pedro mukaˈ si Juan, su nga inilala kaunutan di pikumpungan, saˈ minitaˈ na nilan puˈ tinulungu nu Megbebayaˈ, tilimaˈ ami nilan. Minlamanu ilan dinami, tuˈus puˈ meksalabuuk ami dig baalen nami, yami ditu nga kanaˈ getaw Judea mukaˈ ilan tu nga getaw Judea. 10 Daal dai pinengi nilan dinami puˈ megabang ami di nga gempusuk dinilan. Misanguˈ nami ia, puˈ iin dademai mauyaˈan nami gupia.
Si Pedro Tinituluˈ ni Pablo diag Antioquia
11 Naa si Pedro, su keditunen Antioquia, pimaagu gupia di gedapan nu nga getaw, puˈ gempantek, mikesayep. 12 Maˈninii sayepen. Su ndaˈ pa dateng diag Antioquiai nga sinuguˈ ni Santiago, dumingan maan si Pedro di nga samasakup kanaˈ getaw Judea. Laak dagid, sikna minateng su nga sinuguˈ kia, sumiway di nga kanaˈ getaw Judea, ndaˈ na salu dinilan maan, puˈ mipiid di nga getaw meliag mekpesirkunsisu tu nga sakup kanaˈ getaw Judea. 13 Dayun sug duma sakup nga getaw Judea, mikpuun ilan meksitalaw, sampay si Bernabe, mitalin dadema di sayep. 14 Mendadi, benaˈ minitaˈu puˈ ndaˈ na nilan legdengay dunutay su metuud mauyun tu Gempia Petenday, miktaluˈu dini Pedro di gedapan nug launan nilan, “Naa, pia yaˈai getaw Judea, daansamaˈ bileng mu sug betad nu nga getaw Judea. Naa saˈ maˈantu, mauma dema pentegelen mu dayun su nga kanaˈ getaw Judea pegbetaden nilan sug betad getaw Judea? Kanaˈ lai mpia.”
Su nga Getaw Judea Mesama di nga Kanaˈ Getaw Judea, Megawen ilan sekat tu Kesalig nilan
15 Metuud, genat tu kegigetaw nami, getaw Judea ami. Kanaˈ ami maaˈ nu nga kanaˈ getaw Judea piningalan dun nga mekesesalaˈ. 16 Laak dagid, misuunan ta puˈ iini pemilangen dun nu Megbebayaˈi getaw mekesuun, sabaˈ nu kesaligen dini Isukristu, kanaˈ nu kedunuten di Palinta. Yami dadema, suminalig ami dini Kristu Isus, adun peseksuden ami ni Kristu ditu Megbebayaˈ meksekat tu kesalig nami diniin, kanaˈ nu kedunut nami tu Palinta. Puˈ ndaˈi getaw mpeseksud ditu Megbebayaˈ sabaˈ nu kedunuten tu Palinta. 17 Naa, saˈ mauyaˈan nami pemilangen ami nu Megbebayaˈ mekesuun meksekat tu keksalabuuk nami dini Kristu, ndiˈ ba metuud pemilangen ami dayun nu nga getaw Judea mikesalaˈ, puˈ sabaˈ tiliudan nami su kedunut nami tu Palinta? Guluganen ba ia puˈ mibaluy ami mikesalaˈ miksekat dini Kristu? Ndiˈ lai mesuˈat! 18 Puˈ saˈ lumingayu puliˈ ditu Palinta daansamaˈ tiliudan ku, naa gempantek dayun puˈ mimilasu, puˈ ndiˈu megelaˈ medunutay. 19 Kaas ki Palinta, kanaˈ na pebayaˈu dig lawasu, kaas maˈniin nau minatay di Palinta, adun metubuˈu gusay mektamuy tu Megbebayaˈ. Maˈniin miksaliunungu dini Kristu kaliˈ lensangay ditu kurus, 20 adun kanaˈ na naani megbayaˈ dig lawasu, segaga si Kristui megbayaˈ dun, puˈ megbebenwa na di ginau. Ki pigbetadu nemun, pegbetaden ku mikpuun tu kesaligu ditug Bataˈ nu Megbebayaˈ, su mikpetail dinaan sampay minatay gumantiˈ di kepatayu. 21 Ndiˈu penguaˈen su tulung dinaan nu Megbebayaˈ puun tu kepetailen dinaan, puˈ saˈ upama mpemilang nu Megbebayaˈi getaw mekesuun meksekat tu kedunuten tu Palinta, naa guluganen, mibulugan si Kristu matay.