5
Su Kegbenwa di Medelagan
1 Naa, subay penemalay niu penunggilingay su Megbebayaˈ, puˈ bataˈen amu petailenen. 2 Gempia pepegbayaˈ niui pigbetad niu tug lelaat niu, maaˈ nug lelaat ni Kristu dinita, saˈ minatay iin guminantiˈ di kepatay ta. Puˈ ki kepatay ni Kristu, maaˈ nu memut pelinan mukaˈ memut betang pingilak tu Megbebayaˈ, puˈ leliagen dun gupia su Megbebayaˈ.
3 Mendadi, sakup namu nu Megbebayaˈ, kaas subay ndaˈidun diniui meksumbang mukaˈ ndaˈiduni megdusa, sampay ndiˈ amu mesaku, puˈ kanaˈ bantang diniu nu nga piglegetawan nu Megbebayaˈ. Pia laak mesembayan niu su maˈnia, ndiˈ mpia. 4 Kanaˈ dadema mpia saˈ meglaat taluˈ amu, saˈ mektaluˈ amu di ndaˈi gatagen, saˈ menampalaksa amu. Iinig bantang teluˈen nu sakupen, su gempia di kedengeg dun nu Megbebayaˈ. Pinenggiˈ, gempia ita mekpaladpalad diniin. 5 Mesuunan niu gupia ini, su meksumbang atawaka lelayun melaati gulaulanen atawaka mesaku, ndaˈiduni maˈnia mpeduma ni Kristu di keglekaunutanen mukaˈ danu Megbebayaˈ. (Mukaˈ su getaw mesaku, lepeng miktamuy tu sagya diwata.)
6 Naa, subay ndiˈ niu begay melimbungan amu nu nga mektaluˈ di ndaˈi pantagen, puˈ iini pelebuˈan dun nu Megbebayaˈ ginukumanen su ngag launan memilas diniin, puˈ melaati gulaula nilan. 7 Kaas pegliaw niu su nga getaw menggulaula dun, ndiˈ amu sumambat dinilan. 8 Yamu, gandang mideleman paig delendeman niu, puˈ ndaˈ pamu sakup tu Kaunutan ta si Kristu Isus. Laak dagid sikna suminalabuuk amu diniin, midelagan naig delendeman niu. Kaas subay dunutan niuig betad nu getaw gasalen pegbenwananen su midelagan. 9 Puˈ su pigbetad puun tu medelag, maitaˈ dun dig launan ginis kepia mukaˈ kekesuun sampay metuud. 10 Kaas penemal amu mektuˈun dig leliagen dun su Kaunutan ta. 11 Mukaˈ su nga getaw menggulaula di ndaˈi gatagen puun tu medelem, ndiˈ amu pegduma dinilan. Tumuˈ pa penggulaulaan niu su gempia, adun gempantek, su gulaula nilan, ndaˈi gatagen. 12 Apelai, su nga giglud gulaula nilan, pia laak medenaˈ ta, mpiid ita dun! 13 Kaas, saˈ pedayag na gupia tu medelag su ngag launan ginis gulaula, pia taˈ alandun, gempantek dadema su tantu betaden. 14 Mukaˈ adin su mikenggulaula dun, saˈ mekpaingabang tu Megbebayaˈ, mbaluy dadema bataˈ nu medelag, adun mekeliu di medelem. Kiai puunan nu peneluˈen kini, laungen,
“Yaˈa mektuluga, pengmataa!
Yaˈa minataya, metubuˈa puliˈ!
Tiagan ka dayun ni Kristu.”
15 Kaas peksibaˈay niui pegbetaden niu. Dunutay niu sug betad nu nga mekesuun, sabayaˈ sug betad nu nga medupang. 16 Saˈ duuni medelendem niu melengas penggulaulaan niu, subay iin dayuni penggulaulaan niu, puˈ nemun, melaat gusayi penggulaulaan nu getaw. 17 Kaas ndiˈ amu pegdupang, segaga pepengganget niu dig delendeman niu su mauyaˈan nu Kaunutan ta.
18 Naa, ndiˈ amu pegbebulek. Puˈ saˈ megbebulek amu, petuyangen niu dayuni ginaa niu, sampay medelaˈig amu di melaaten. Segaga subay pengepuˈan amu nug Balakat nu Megbebayaˈ. 19 Maˈantu, pekteteluˈay amu tu taluˈ nga kanta, mukaˈ bebat, lumbus mekatag di kekpetuud ta mukaˈ tu Megbebayaˈ.a Pegbebat damu dema ditu Kaunutan ta, dunut enal niu iin gikteb nu ginaa niu. 20 Kagina bigayan amu ni Kristu pegbayaˈen, pekpaladpalad amu lelayun tu Gamaˈ ta Megbebayaˈ sabaˈ nug launan mbianan niu.
Sug Libun mukaˈ sug Laki
21 Naa yamu launan niu, pegbinesaay amu, puun tu kegbasa niu dini Kristu.
22 Yamu nu ngag libun, saladuaˈ subay pegbesaan niu su sawa niu, mukaˈ dunutan da niu dema ilan, maaˈ nu kekpetuud niu tu Kaunutan ta. 23 Puˈ su kegbayaˈ nug laki di sawanen, maaˈ nu kegbayaˈ ni Kristu di tibuuk pikumpungan nu nga sakupen, sug lawasen. Puˈ si Kristu, guminawen dig lawasen, saˈitada su tibuuk pikumpungan nu nga sakupen. 24 Kaas, subay pegbesaan gupia nu ngag libun su sawa nilan dig launanen, maaˈ nu kekpetuud nu pikumpungan nu nga sakup ni Kristu.
25 Yamu pelum nu ngag laki, saladuaˈ subay petailen niu su sawa niu, maaˈ nu petailan ni Kristu di tibuuk pikumpungan nu nga sakupen, benaˈ minatay guminantiˈ di kepatay ta. 26 Si Kristu, pimaˈantunen puˈ adun meksikesuun ita, mukaˈ adun ugasani salaˈ, puun tu kebunag dinita tubig, mukaˈ tu taluˈen, adun metelimaˈ ita nu Megbebayaˈ. 27 Puˈ su mauyaˈan ni Kristu, ditug binayaˈ gebii buˈ gendaw, duatenen su pikumpungan nu nga suminakup, maˈniin nu melengas libun bimbengen na, metelimaˈ nu Megbebayaˈ, ndiˈ medangat, ndaˈi minlepak dun atawaka mingedet. Saˈitada, ndaˈiduni kulang dig lengasan nu pikumpungan nu sakupen. 28 Naa, puliˈan ku da dun, subay petailen nu ngag laki su sawa nilan, maaˈ nu kepetail nilan tug lawas nilan. Saˈ petailen nug laki su sawanen, suunan ta puˈ petailenen dadema sug lawasen. 29 Ndiˈ ba metuud, ndaˈiduni getaw mpauk tug lawasen? Metuud, puˈ paanenen mukaˈ ingatenen. Miksamai kaingat ni Kristu tug lawasen, ita nu pikumpungan nu nga sakupen. 30 Tegyungen ku diniu, maˈniin ita nu sengkapan nug lawas ni Kristu. 31 Ndaˈ ba mesulat di Misulat Taluˈ nu Megbebayaˈ, “Kaas sug laki, suay ditu ginaˈen buˈ gamaˈen, sumalabuuk na tu sawanen. Kaas su kamun duaˈ lawas pailan, meksala lawas nailan.” 32 Naa medalem tituluˈani mibuasan di misulat kiin mekatag dini Kristu mukaˈ su pikumpungan nu nga sakupen. 33 Pia maˈantu, mekatag di senlangan dadema ia, puˈ tituluˈan ku amu dun, saladuaˈ diniu nu ngag laki, subay petailen niu su sawa niu. Mukaˈ sug libun, subay pegbesaanen dadema su sawanen.