11
Si Pablo mukaˈ su nga Tautau Peneligan ni Kristu
1 Naa mauyaˈan ku pektigel pa niau deliˈ, pia misabaˈ nu gangyaˈu laung niu dun benguˈbenguˈenu. Pektigel pa niau dema tuˈu. 2 Naa, penemalan ku amu tagikulay, gitungan duni kektagikul diniu nu Megbebayaˈ, puˈ yamui maaˈ danug delaga, sug delaga pa tantu, pibembeng ku dini Kristu laak, ndaˈig lain. 3 Kelibulengu diniu, kalukalu melimbungan amu maaˈ nu keglimbung nu mamak dini Ibaˈ begudiin, mbuus mbeleng niu su gempagen kesalig niu dini Kristu mingganget na dig delendeman niu. 4 Puˈ pia adini getaw metuaˈ dia niu megukit diniu lain tituluˈan mekatag dini Isus, naa dedialan daw niu pelum. Duaten niu, pia laini pegukitenen di pegukiten nami. Duun dadema dawi duaten niu kanaˈ nug Balakat nu Megbebayaˈ dinawat niu begudiin. Tilimaˈ daw niu pa pagidig lain gempia petenday, kanaˈ nu Gempia Petenday daansamaˈ midawat niu, kaas mauyaˈan ku pektigel niu ami maaˈ danu kektigel niu dinilan. 5 Naa naan kini, suunan ku puˈ su nga tautau peneligan kiin, kanaˈ metaas pa dinaan. 6 Puˈ pia ndiˈu metitay meguksug maaˈ nu pibiaˈan nug duma niu, metaasi sinuunan ku di metuud. Pia taˈ alanduni kebetang ta, pipanteku diniu dig launan mibianan ku.
7 Naa, su kegukitu diniu Gempia Petenday genat tu Megbebayaˈ, ndaˈu pebayad diniu. Su pinggulaulau maˈnia, pibabaˈuig lawasu adun petaasen ku amu. Maˈnia mikesalaˈ bau dun diniu? 8 Su saanan ku megabang diniu, duunig lain pikumpungan nu nga sakup miglegastu dinaan. Maˈniin pigdaawan ku ilan, adun mebangan ku amu. 9 Mukaˈ pa pagid selian ku dia niu, saˈ duuni kulang ku, ndaˈidun diniui linibulengu dun, ndaˈu pekpaingabang diniu, puˈ iwit dinaan nu nga kepetedan ta genat tu Macedonia sug launan kulang ku. Naa, su nga minayan gendaw, ndaˈu amu penengiay gamut. Maˈantu dadema lemaˈ denlag, ndiˈu amu pebebaan gembegat. 10 Kagina suminalabuuku dini Kristu, meglegintuudu puˈ dia tibuuk benwa Grecia, ndaˈi getaw mekegbuni di kegangyaˈu puˈ ndaˈu amu pebiaday di kegukitu diniu Gempia Petenday. 11 Taˈ mai ndaˈu amu penengiay dun gamut? Mabuˈ laung niu dun, iini tinaluˈu dun ia, puˈ ndiˈu amu petailen. Laak, misuunan nu Megbebayaˈ puˈ petailen ku lai amu gupia.
12 Pigdelendemu su pigbetadu nemun ndiˈu mekpamut diniu, pegbetaden ku gusay, puˈ adun ki nga tautau peneligan kia, ndaˈiduni sikawan nilan mengangyaˈ mekatag dig baalen nilan. Mukaˈ adun ndiˈ nilan dadema mpesama sug betad nilan tug betadu. 13 Naa ki getaw kia, kanaˈ ilan tantu peneligan. Limbungan nilan su getaw mekatag dig baalen nilan sampay maˈniin ilan miglanguban di tantu peneligan ni Kristu. 14 Laak mesuunan ta tantu puˈ pia si Satanas, metau meglanguban di sesuguˈen nu Megbebayaˈ genat tu tumiag benwa. 15 Maˈantu, ndiˈ ita mesebuˈan dun saˈ su nga sesuguˈen ni Satanas kiin, meglanguban dadema di mekesuun sesuguˈen ni Kristu. Deksuˈanen ia, suliˈan ilan nu Megbebayaˈ mbantang tu gulaula nilan.
Su Kelegenay ni Pablo sikat tu Kepeneliganen
16 Naa puliˈan ku teluˈay, subay ndaˈidun diniui memilang dinaan puˈ benguˈbenguˈenu miksekat di kegangyaˈu. Laak saˈ pemilangen niau benguˈbenguˈen, telimaˈ niau dadema gusay, adun duun dademai maikaˈ pegangyaˈu maaˈ da nug duma getaw. 17 (Laak metuud, ki tinaluˈu kini, kanaˈ pitaluˈ dinaan nu Kaunutan, puˈ ki kegangyaˈu kini, mengmaˈniinu laak benguˈbenguˈen. 18 Laak dagid, kagina melauni getaw mengangyaˈ di kebetangen kinilawan, mengangyaˈ dau dema.) 19 Yamu, laung niu dun puˈ telisebuten amu gupia, kaas melemu niu metigel su nga kegbenguˈbenguˈ. 20 Pia taˈ taway dun, tigel niu, su maaˈ mengulipen diniu, su meglimbung diniu, su megdalig diniu, su mekpelabawlabaw diniu, sampay sug dumapiˈ di muluˈ niu. 21 Naa naan, mpiid bau puˈ kanaˈu mesukul menggulaula dun diniu?
Laak dagid, saˈ duuni nga gembeluˈ mengangyaˈ dig daniin, menibeluˈ dau dema mengangyaˈ dig danaan. (Pelai, maaˈ nu tantu benguˈbenguˈen su mitaluˈu!) 22 Ilan, engkenen nilan ba puˈ piglegetawan ilan nu Megbebayaˈ sabaˈ getaw Judea ilan? Naan, getaw Judea mau. Ginepuˈay nilan ba si Israel? Ginepuˈayu dadema iin. Sapuˈ bailan ni Abraham? Sapuˈ dau niin dema. 23 Sesuguˈen bailan ni Kristu? Gempia pa sesuguˈen mau niin. (Paa, metaluˈu ini, maaˈ nu tinaluˈ nug buˈang.) Gembagel paig lasay dig baalen ku dig lasay nilan. Sanu deksuˈ ilan mipirisu? Naan, milebiananu dun. Ndiˈ dadema mbilangig badas dinaan. Tatap dau dema mesimpitay. Ki simpitu, labi pa dig danilan. 24 Lima deksuˈ pimbadasu nu getaw Judea tali telu puluˈ buˈ siam badas. 25 Telu deksuˈu mbianay pimentul dadema sekud. Mainsan piniglakanu batu. Telu deksuˈ dadema mibianan kui melenedi sekayan ku, mukaˈ mainsan dia dau dagat pegletawletaw segebii buˈ sendaw. 26 Melaun lai kepanawu. Saanan ku mpanaw, mikaˈidanu sia nug baaˈ, nu tulisan, mikaˈidanu sia nu samatawu getaw Judea mukaˈ nu kanaˈ getaw Judea. Duun siai kuminaˈid dinaan dia ngag lunsud, dia ngag limawaˈ, diag laud, sampay kuminaˈid sia dinaani tautau suminakup. 27 Gembagel gupiaig lasayu, puˈ miktegelu mengimbaal. Gembanesu ndaˈ ketulug sabaˈ nug baalen ku. Mibianan kui kegutem mukaˈ kuaw. Tatapu mekebusay gaan atawaka penilungan ku sampay penepeten ku. 28 Ndiˈu metaluˈ sug duma kepait kebetangu. Pidag pa tanan, gendawgendaw maˈniin duuni gembegat bebaan ku di kektagikulu dig launan pikumpungan nu nga sakup nu Megbebayaˈ. 29 Puˈ saˈ duuni samasakup ta melegenan sabaˈ mekagelageli kesaligen dini Kristu, melegenan dau dema, puˈ melelaatu dun gupia. Saˈ duuni mekpetuud na mpeglimbungan, naa melayuˈi ginau dun.
30 Dagid saˈ upama mengangyaˈu, pegangyaˈu su nga kelegenay mbianan ku, puˈ metuˈusan dun puˈ naan, ndiˈu megaga. 31 Kanaˈu ini megbalus. Misuunan ia nu Megbebayaˈ, su Gamaˈ nu Kaunutan si Isus. Iin, gempia penalan di ndaˈi tamanen. 32 Puˈ pinenggiˈ begudiin saˈ ditu pau Damasco, pidaapu sia nu gubirnadur tinduˈ ni Adiˈ Aretas. Piapaˈu niin sia ditu pulis bitangen dia gengaˈan nug lunsud. 33 Laak dagid, inisenu nug dumau dig bukag, dayun tintunu nilan dig dungawan nug dending nug lunsud, kaas mikeglaguyu.