10
Su Sembag ni Pablo ditu nga Migdenaˈ dun
1 Naa, duun dawi ngag duma niu mektaluˈ ilan puˈ su saanan ku dia niu, metalawu, laak dagid gempelegetu daw saˈ melayuˈu diniu. Kagina maˈantu, naan si Pablo, duuni penengiin ku diniu pebian di kelilelaaten ni Kristu mukaˈ di mesumayaˈ betaden. 2 Saˈ mateng nau dia niu, ndiˈ niau tegelay menibeluˈu, ndiˈ niau tegelay petegasen kuig betadu! Puˈ tumuˈ daan metawu menibeluˈ di getaw dia meksudaw dinaan puˈ pinggulaulau daw su pibaal dinaan puun tu kekilawan ku daw, saˈitada maaˈ nu nga ndaˈ pa pekpetuud. 3 Metuud lai daan, migbebenwa dami dig benwa nu nga kilawan, laak kanaˈ nug delendeman nu nga kilawani puun tu kengatu nami di melaat. 4 Puˈ kig besi gemiten nami di pegbunuˈan kini, kanaˈ kinilawan, segaga iini gemiten nami su ginuung nu Megbebayaˈ, adun gebaˈen namii nga kutaˈ.a Maulakan nami su sagya gukiten nu nga mimilas tu Megbebayaˈ, 5 mukaˈ maulakan da nami dema su nga kegbelabag sia nu nga mangyaˈ getaw di sinuunan mekatag di Megbebayaˈ. Mukaˈ pelinen nami padun sug delendeman nu getaw adun petuuden nilan si Kristu. 6 Yamu dema, tubus niu mpaitaˈ puˈ mingganget na su kekpetuud niu dinami, mauyaˈ ami sumilut dig launan kemilas nu nga samasakup niu. 7 Laak iini pektalentenan niu, su laak pelum tindeg nu getaw. Duun baig duma niu dia, engkenenen puˈ iini pegwekilan ni Kristu? Iin, subay medelendemen puliˈig lawasen, puˈ miksama dami, pegwekilan dami dema ni Kristu. 8 Pia melebian ku pengengyaˈayi pegbayaˈu, ndiˈu mpengumpiid dun nu ngag duma, puˈ bigay dinaan nu Kaunutan. Puˈ ki pegbayaˈu, iini mekaiseg di kesalig niu, kanaˈ nu kekpelaat diniu. 9 Mitaluˈu ia, puˈ mpauku gupia saˈ laung niu dun pengendeken ku amu sia di nga sulatu. 10 Duuni mektaluˈ puˈ saˈ sumulatu, metegas dawi tituluˈu mukaˈ penluksadu dadema teluˈay, laak saˈ dia nau niu, ndiˈu metau daw mektituluˈ diniu, mukaˈ ndaˈi gatagen su taluˈu. 11 Naa, saˈ su nga mektaluˈ dun maˈnia, teluˈan ku ilan puˈ adini teluˈen nami di sulat nami saˈ melayuˈ ami diniu, maˈantu penggulaulaan nami saˈ mateng ami dia niu.
Ginukit ni Pablo su Gikteb nu Tinduˈ nu Megbebayaˈ Penggulaulaanen
12 Danami, ndiˈ nami mpemilangig lawas nami duma nu nga getaw pitelimaˈ nilan diniu su ketaas nu tindeg nilan. Ilan, ndiˈ nami dadema peguntainig lawas nami dinilan. Metegas gupiai gulu nilan, puˈ ukumen nilanig lawas nilan mekatag dig danilan laak delendeman. 13 Laak dagid yami, ndiˈ ami melebian mangyaˈ dig baalen nami. Duuni pingangyaˈ nami, laak pingikteb nami tu pibaal dinami nu Megbebayaˈ. Mukaˈ sug baalen nami dia niu mipeduma di pibaalen dinami. 14 Kagina mipeduma amu tu tinduˈ nu Megbebayaˈ baalen nami su kedia nami niu adun megukit Gempia Petenday mekatag dini Kristu, kanaˈ melebian di tinduˈ nu Megbebayaˈ dinami. 15 Maˈantu, ndiˈ nami dadema pengengyaˈen sug baalen nug lain getaw megukit Gempia Petenday tandaˈ ilan sinuguˈ nu Megbebayaˈ megukit, ditu gawas nu tinduˈ dinami nu Megbebayaˈ. Segaga pedetengen nami, megiseg gusay su kesalig niu, mukaˈ gembagel pai gatagen sug baalen nami dia niu. 16 Mekebundas ami dayun megukit Gempia Petenday di ngag lain benwa ditu gunaan nug benwa niu, kaas ndiˈu na kambat pengengyaˈen sug daansamaˈ pinggulaula nug lain getaw tinduˈ diniin nu Megbebayaˈ, maˈniin naani minggulaula dun sia. 17 Puˈ ndaˈ ba mesulat di Misulat Taluˈ nu Megbebayaˈ, “Adini getaw mauyaˈanen mengangyaˈ, subay pengangyaˈen su pinggulaula nu Kaunutan.” 18 Naa, saˈ enalen taig lawas ta, ndaˈi gatagen. Saˈ penalen ita pasiˈ nu Megbebayaˈ, naa metelimaˈ ita niin.