9
Su Gamut di nga Samasakup ta tu Megbebayaˈ
1 Naa, ki gamut puiten ditu piglegetawan nu Megbebayaˈ ditu Judea, ndiˈ nau kambat sumulat pa diniu. 2 Misuunan ku puˈ mauyaˈan niu megabang, kaas pingangyaˈu amu dia nga samasakup ta dinig benwa Macedonia. Tinaluˈu dinilan puˈ yamu nga mimated ditug benwa Grecia, genat pa tu minian taun, mauyaˈan na niu gupia megabang amu. Naa, melaun na dinilani mikauyaˈ dadema tu mauyaˈan niu gupia. 3 Nandaw, suguˈen ku mangay dia niu ki nga kepetedan ta kia, adun ndiˈ mekpelilu su kepengangyaˈu mekatag diniu, puˈ mpenggulaula tuˈu, maaˈ da nu tinaluˈu puˈ mauyaˈan niu megabang amu. 4 Laak dagid, saˈ duuni nga getaw Macedonia meketendug dinaan, mukaˈ mbuus iini metaangan nilan ndiˈ pamu mekandam, naa mpiidu gupia, mukaˈ mpiid damu dema, puˈ siligan ku amu gupia. 5 Mendadi delendeman ku, subay penengiu di nga kepetedan, si nga Tito, meguna ilan dinaan, adun pepengendamen nilan diniu su pemegay niu gandang pinasad niu. Dayun saˈ matengu, mauyaˈ na tuˈu su gamut niu mukaˈ mpesuun di nga getaw puˈ memegay amu puun tu mauyaˈan niu, kanaˈ nu ketegel diniu.
6 Ndiˈ niu selingawayi sambingayu mekatag di kemegay. Adini getaw maikaˈi pemulaanen, maikaˈ dademai sengkuˈen. Laak dagid adini getaw melauni pemulaanen, sengkuˈan dadema melaun. 7 Maˈantu, diadia subay begayen mekatag di mauyaˈanen. Ndiˈen mpia begay puun di keguut di ginaanen, puˈ petailen nu Megbebayaˈ su getaw metawal. 8 Mukaˈ padun, tumuˈ megaga nu Megbebayaˈ megbegay diniu. Kanaˈ pa di sukal diniu, labi pa di sukal diniu, adun ndaˈi kulang niu lelayun. Dayun ndaˈ dademai kulang niu begay niu tu ngag launan gempia begayan. 9 Ndaˈ ba mesulat di Misulat Taluˈ nu Megbebayaˈ,
“Ki metawal getaw, memegay tu nga gempusuk getaw.
Sug lelaaten, ndaˈi tamanen.”
10 Su Megbebayaˈ megbegay beniˈ di nga memula mukaˈ gaan di nga getaw, begayen dadema diniu sukal beniˈ niu, saˈitada su gabang niu di nga samataw niu. Pepentubuˈen padun nu Megbebayaˈ su ketawal niu sampay gembageli sengkuˈen. 11 Pedetuˈen amu niin lelayun sukal di ketawal niu, adun melaun getawi mekpaladpalad diniin meksekat di pemegay niu dinilan pebian di kemet nami. 12 Puˈ ki pemegay niu kiin, kanaˈ laak metektub dun su kulang nu nga sakup nu Megbebayaˈ, puˈ mpelaun dun dadema su kekpaladpalad nu getaw ditu Megbebayaˈ, maaˈ nug bitang tug delus megulaˈ na sabaˈ nu kelaunen. 13 Su kemegay niu maitaˈ nu melaun getaw puˈ dunutan niu gupia su Gempia Petenday mekatag dini Kristu. Mukaˈ pegdedengegen nu nga getaw su Megbebayaˈ puun tu keglegintuud niu mukaˈ tu kekpetuud niu di Gempia Petenday, sampay di ketawal niu memegay dinilan mukaˈ di ngag launan samasakup niu. 14 Kagina tinulung amu gupia nu Megbebayaˈ kaas metawal amu, penenebian amu nu nga getaw meksekat tug lelaat nilan diniu. 15 Naa, mekpaladpalad ita gupia tu Megbebayaˈ, puˈ ndiˈ metanggiˈig bigayen dinita!