8
Su Gamut nu nga Mekpetuud
1 Naa Mingumpated, mauyaˈan nami mesuunan niu su pinggulaula nu nga pikumpungan tu Megbebayaˈ dini Macedonia miksekat tu tulungen dinilan. 2 Ki nga pikumpungan kini, meliget gupiai keksimaˈ di kesalig nilan, mipeksimaˈ nu nga kegleget dinilan. Laak dagid, pia maˈantu, gembagelig leliag nilan. Kagina liliag ilan dun, metawal dailan dema. Kaas pia gempusuk ilan gupia getaw, maˈniin milebian nilan pemegayay su nga samasakup nilan bianan meliget gutem. 3 Meglegintuud dau diniu, pingikteb nilani megaga nilan di pimegay nilan, milebian nilan sia pemegay. Danilan da delendeman, 4 pinemalan nilan penengiay dinami, buangen nami dinilan mpeduma ilan meglegamut di nga piglegetawan nu Megbebayaˈ ditu Judea. 5 Paa, kanaˈ nami pedetengen penggulaulaan nilan maˈantu. Puˈ bekna, pigwakil nilanig lawas nilan ditu Kaunutan ta mekpetuud diniin, dayun pisakup nilani ginaa nilan dinami mekatag di mauyaˈan nu Megbebayaˈ. 6 Mendadi, pinengi nami dini Tito bundasenen pungunay su gamut niu, puˈ iini mikpuun dun, adun metubus niu su gabang niu puun tug lelaat niu di nga samasakup niu. 7 Puˈ yamu, ndaˈi lumabaw diniu di kesalig ditu Kaunutan, di tinawanen megwali taluˈ nu Megbebayaˈ, di sinuunanen mekatag di metuud, dig liaganen lelayun megabang, sampay di kepetailen dinami. Maˈniin ndaˈi tamanenig launanen. Kaas, mauyaˈan nami ndaˈi lumabaw diniu dadema di gamuten puun dig lelaaten.
8 Laak ndiˈu sumuguˈ dun diniu. Pesuun ku sungkin diniu su ketuges nu ngag duma sakup meglegamut, adun mpeksimaˈu su kepetail niu, saˈ kepetail tantu, saˈ kanaˈ. 9 Naa, misuunan niu su tulung nu Kaunutan ta si Isukristu, pia ndaˈi taman nu kedatuˈen ditu gekbus langit, mipusuk iin pegabang diniu, adun pedatuˈen amu di ginaa niu pebian di kepusuken.
10 Ndiˈu daan sumuguˈ diniu mekatag di gamut. Laak dagid batiku dun gempia na niu tubusen su pikpuunan niu su minian taun kiin. Yamuig bekna mimegay, yamu dademaig bekna miliag memegay. 11 Kaas nandaw, sigi, tubusen niu su pikpuunan niu baalay. Subay situgesay niu tubusay maaˈ nu ketuges niu megdelendem. Tubusen niu gikteb di megaga niu. 12 Puˈ saˈ taginaa niu dun memegay amu, leliagen dun su Megbebayaˈ di pemegay niu. Kanaˈen pedetengen pemegay niu su ndiˈ niu megaga. 13 Naa, kanaˈ iini mitaluˈu dun ia, puˈ adun mpeglegetan ku amu, dayun su ngag duma pelum, peleliin ku laak ilan. 14 Laak dagid, kagina melauni sukat niu nemun, mbantang ebangan niu su ngag duma ta duuni kulang nilan. Maˈantu, saˈ duuni gendaw penensili kulangig daniu mukaˈ melaun pasiˈig danilan, ilan na pelumi megabang diniu. Maˈnia, meksamai tagikul niu. 15 Begudiin iini mipenggulaula nu nga getaw Israel su kekpungun nilan gaan genat tug langit. Ndaˈ ba mesulat di Misulat Taluˈ nu Megbebayaˈ,
“Ndaˈ melebiay su mikepungun melaun.
Mukaˈ ndaˈi kulang nu mikepungun maikaˈ.”
Si Tito mukaˈ su nga Tendugen
16 Naa mekpaladpalad ami tu Megbebayaˈ, puˈ pidelendemen gupia dini Tito kia megabang diniu, maaˈ dadema nu pidelendemen gupia dinami, megabang ami diniu. 17 Puˈ si Tito, pinembaˈen su kesuguˈ nami diniin megabang diniu, mukaˈ daniin dadema delendeman su keditunen niu, sabaˈ liaganen gupia megabang diniu. 18 Duun dademai mimated dinita petendugen nami diniin, su samasakup ta pegbesaan nug launan pikumpungan tu Megbebayaˈ puun tu kegukiten di Gempia Petenday. 19 Mukaˈ pa padun, tinduˈ iin nu nga pikumpungan tu Megbebayaˈ tundug dinami selian nami mekpungun gamut, adun megdedengeg gupia su Megbebayaˈ. Su kekpungun nami gamut, mpaitaˈ dadema puˈ mauyaˈan nami megabang. 20 Ndiˈ ami meliag takesilen dinami mekatag di kesalig ami nu nga samasakup, puˈ gembagel gupiai gamut kini. 21 Puˈ iini piktubudan nami dun, su keguit nami di kekpungun nami, adun melegdengig baalen nami di pegitaˈen nu Megbebayaˈ mukaˈ di pegitaˈen nu samataw ta dadema.
22 Mendadi duun pa padun sala mimated dinita suguˈen ku tundug dini nga Tito. Iin, kumalenged tatap nami peksimetay su pigbetaden, lelayun meliag megabang dinami. Mukaˈ nemun, kagina suminalig na gupia diniu, labi na mauyaˈanen megabang diniu. 23 Naa si Tito, dumau gusay megabang diniu. Su nga tendugen, pigwekilan ilan nu nga pikumpungan mukaˈ mekpededengeg ilan dini Kristu. 24 Kaas paitaˈ niu dinilan sug lelaat niu, adun mesuunan dayun nug launan pikumpungan puˈ gempetail amu mukaˈ metuud dadema su pingangyaˈu mekatag diniu.