7
1 Mendadi, kagina itai pisadan nu Megbebayaˈ dig launan pinasaden kia, penengiin ku diniu nga petailen ku, uaˈen taig launan kelemuˈay di pigbetad ta sampay dig delendeman ta. Penggengeten ta dig delendeman ta su kegwakil ta dig lawas ta tu Megbebayaˈ, puun di kegbasa ta diniin.
Leliagen si Pablo di Kegbiksuˈ nu Pikumpungan dia Corinto
2 Kaas, gempia niu pegisegeni kepetail niu dinami, puˈ ndaˈi getaw dia niu duuni sinilaˈan nami dun, ndaˈ demai pialangalang nami tu kesaligen, mukaˈ ndaˈ dademai pigleguntungan nami. 3 Naa, ndaˈu mesulat ia adun takesilen ku amu, puˈ gandangu misulat diniu kamun puˈ petailen nami amu. Kaas, maˈniin ita mekampuˈ lelayun. Matay saˈ metubuˈ, mektinebangay ita. 4 Kanaˈ na meduaˈduaˈ dig delendeman ku puˈ meseligan amu gupia, kaas mipenalan ku amu. Kaas dema, pia melauni kegleget dinami, miuliksegu, liliagu gupia.
5 Naa, su kedateng nami dini Macedonia, ndaˈ ami gusay kelali di kegleget dinami. Bisan tandaˈ ami pangay dini, milegenan ami sabaˈ nu sualan dinami nu ngag duma. Mukaˈ milibuleng pami dema di pegbetaden niu. 6 Laak dagid, su Megbebayaˈ metau mengamuˈ di getaw miubaˈ, pingamuˈ ami niin miksekat di kedateng ni Tito. 7 Si Tito, kanaˈ nu kedatengen laaki mingamuˈ dinami, puˈ mingamuˈ dun dadema su ginukiten dinami mekatag di kengamuˈ niu dadema diniin. Inukiten dinami puˈ angut niu dun mekinitaˈay ita. Inukiten dadema puˈ migbiksuˈ amu, kaas miksikesuun namu, sampay minuyaˈ namu megabang dinaan, kaas migiseg naig leliagu.
8 Puˈ ki sulatu kiin, pia miubaˈ amu dun, ndaiˈ pegbiksuˈan ku dun su kepuitu dun. Sug bekna, migbiksuˈu dun deliˈ, kaliˈu mesuunay puˈ miubaˈ amu dun, pia selingka laaki gubaˈ niu. 9 Asa itu nandaw, liliag dau. Kanaˈu liliag dun su gubaˈ niu, laak liliagu dun su keksikesuun niu puun tu gubaˈ niu. Su kelegenay niu kiin, genat tu Megbebayaˈ, kaas ndaˈ nami amu mpeglaatay. 10 Su kelegenay ta genat tu Megbebayaˈ, mekpesikesuun di getaw adun megawen. Ndiˈ ta pegbiksuˈan, ndiˈ ba? Laak dagid, su pasiˈ kelegenay ta kinilawan laak, pegangay tu kepatay ndaˈi gikteben. 11 Naa, bentayay pa daan niu su pinggulaula nu Megbebayaˈ miksekat tu gubaˈ niu. Maˈniniˈ, miksituges namu menggulaula melengas, pinemalan pa niu dema paitaˈay dig launan getaw puˈ ndaˈ amu medelaˈig di salaˈ nug duma niu kiin. Mukaˈ pa padun melaati ginaa niu tu pinggulaulanen, miglengilam amu. Mauyaˈan pa niu mekinitaˈay ita, adun megeksud ita. Taginaa niu dun mpenggulaula su mauyaˈan nu Megbebayaˈ, sampay piglepeng niu pengmensuay su mikesalaˈ. Naa saˈ maˈantu, dig launan pinggulaula niu kia, pinitaˈ niu puˈ ndaˈig labet niu di melaat gulaula nu mikesalaˈ kiin.
12 Mendadi, pia piwitu daan diniu su sulatu kiin, kanaˈ sabaˈ nu mikesalaˈ duma niu kiin. Kanaˈ dadema sabaˈ nu miselaˈanen. Bisan saak tug Diwata, iini piwitu dun, puˈ adun medelendem niu su kenamal nu kepetail niu dinaan. 13 Kaas mingulikseg ami dun.
Maˈantu mingulikseg ami, dagid ndaˈ ami mauliksegay laak, puˈ liliag dami dema dun sug leliag ni Tito. Puˈ si Tito, pipia niui ginaanen. 14 Gandangu amu pingangyaˈ diniin, dayun ndaˈ niau mpengumpiiday, puˈ gempiai pigbetad niu di pegitaˈanen. Maˈantu su ginukit nami dini Tito mekatag diniu, minuud da pelum, maaˈ dadema nu kelaun metuud inukit nami diniu. 15 Maˈantu, migisegig lelaaten diniu selianen medelendem puˈ pituud niu dayun su sinuguˈen diniu mukaˈ su kenembaˈ niu diniin, pia milibuleng amu di kegbeluˈ nami diniu. 16 Kaas, liliag nau, puˈ meseligan ku amu gupia.