12
Su Ginukit ni Pablo tu Kainat diniin tu Gekbus Langit
1 Naa, miktegel mau di kegangyaˈ, kaas mengangyaˈu pia ndaˈi pantagen! Mendadi, ukiten kui pinitaˈ dinaan nu Kaunutan sampay sug biwasanen dinaan. 2 Maˈniniˈ, duuni sakup ni Kristu minilalau. Sepuluˈ buˈ paat taun nai minayan, iin mitekaw mainat ditu gekbus langit. (Taˈ dun saˈ tegilawan lawasen, saˈ mipenumbilaw, misuunan laak nu Megbebayaˈ.) 3 Puliˈan ku teluˈay, misuunan ku puˈ ki getaw kiin mitekaw mainat ditu Paraiso, saˈitada tu gekbus langit. (Puliˈan ku dadema teluˈay puˈ taˈ dun saˈ tegilawan lawasen, saˈ mipenumbilaw, misuunan laak nu Megbebayaˈ.) 4 Dayun saananen ditu, duuni midengegen nga ndiˈ metaluˈ di penggelal getaw, su ndiˈ mesuˈat teluˈay nu getaw. 5 Maˈantu, pegangyaˈu ki getaw kiin, batul nug lawasu, laak pegangyaˈu da su nga mipenggulaulau metuˈusan dun puˈ ndaˈi gagau. 6 Saˈ mauyaˈan ku mengangyaˈ, ndiˈu sia mpemilang benguˈbenguˈen, puˈ metaluˈu laak su metuud. Pia maˈantu, ndiˈu mengangyaˈ, puˈ mpauku saˈ diadia, pemilangenu niin metaas pa di minitaˈen pinggulaulau, mukaˈ di midengegen tinaluˈu.
7 Naa, adun ndiˈ mekpelabawlabawig delendeman ku sabaˈ nu mekesalebuˈ minitaˈu kiin, mibegay dinaani meliget mesaitu, maˈniin nu sesuguˈen ni Satanas madas dinaan, adun ndiˈu melebian mangyaˈ. 8 Telu deksuˈ mikpaingabangu tu Kaunutan, pinengiu diniin puaˈenen. 9 Laak simbagen, “Sukal diniˈa su tulungu diniˈa mektigela, puˈ saˈ duuni ndiˈ mu megaga, iin pa mekpalas gupia su ginuungu.” Maˈantu meliagu pegangyaˈu su ndiˈu megaga, adun mbianan ku su gabang nu ginuung ni Kristu dinaan. 10 Kaas liliag dau di kelukaˈ ginau, di sagula, di kelegenay, dig leget mukaˈ simpit sekat di kesakupu dini Kristu. Puˈ saˈ melukaˈu, duuni kepagen ku puun dini Kristu.
Su Kektagikul ni Pablo di nga Getaw Corinto
11 Pelai, maˈniinu daan nug benguˈbenguˈen, laak mitegel niau megangyaˈ, asa yamu siai mekpuun mekpenal dinaan, puˈ pia ndaˈi pantagu, kanaˈ metaas pa dinaan su nga metaas laung peneligan kiin. 12 Su saanan ku dia niu, mikpaitaˈu diniu pebian di pinggulaulau puˈ tantu peneliganu ni Kristu. Puˈ miktigelu namal di nga kelegenayu, mukaˈ pinggulaulau nga tuˈus mukaˈ mekesalebuˈ ginuung. 13 Naa, taˈ alanduni pinggulaulau di ngag lain pikumpungan nga sakup ni Kristu ndaˈu penggulaulaay dia niu? Daal da laak su ndaˈu amu pemutay. Pedasun niau deliˈ di ndaˈu amu peglepengay kia!
14 Naa minuyaˈ nau meditu niu, iin nai ketelu deksuˈen. Mukaˈ ndiˈu gusay mekpamut diniu. Puˈ kanaˈ nu selapiˈ niui mauyaˈan ku, yamu segagai mauyaˈan ku. Ndiˈ ba metuud, kanaˈ nu gembataˈi meglegastu di nga mekegulang? Segaga iini meglegastu di nga gembataˈ, su da mekegulang. 15 Naa saˈ maˈantu, meliagu megelaˈu legaay su gimuu sampay su ginau di gabangu diniu. Dagid mauma ini? Saanan megdugangi kepetailu diniu, pigengkan niu pelumi kepetail niu dinaan.
16 Naa migayun ita dayun, puˈ ndaˈu amu pemutay. Laak dagid mabuˈ duun diniui mektaluˈ puˈ milimbungan ku amu daw, puˈ metawakal mau daw. 17 Endutaˈen ku dun iin? Piglimbungan ku bamu di nga sinuguˈu mangay dia niu? 18 Puˈ si Tito kiin, pinengiu diniin meditu niu mukaˈ sinuguˈu su sala tawan samasakup ta dini Kristu tundug dun. Taˈi laung niu dun, milimbungan bamu ni Tito? Kagina meksalabuuk ami duaˈ dig delendeman nami sampay di pigbetad nami, misuunan da niu dema puˈ ndiˈ dau dema meglimbung diniu.
19 Ki sinulat nami kini, mabuˈ laung niu dun puˈ maˈniin ami nu pegindeg di gedapan niu sumbag dig dangat. Kanaˈ lai. Puˈ pegindeg ami pasiˈ di gedapan nu Megbebayaˈ, mukaˈ iin laaki teluˈen nami su miksekat di kesakup nami dini Kristu. Pia taˈ alandunig baalen nami, uu sambatu petailen ku, penggulaulaan nami dun adun gempageni kesalig niu. 20 Puˈ kelibulengu saˈ mateng nau dia niu, penensili metaangan ku su pigbetad niu ndiˈu liagan, mukaˈ metaangan niu dadema su pegbetaden ku ndiˈ niu mauyaˈan. Kelibulengu penensili metuun ku diniui nga mesasaw mukaˈ mengimbegu, meglipunget mukaˈ mesaku, meglelekutiay mukaˈ meglelibakay, meglelinebaway mukaˈ mesasak. 21 Naa, kelibulengu saˈ mateng nau dia niu, penensili mpiidu tu Megbebayaˈ sabaˈ diniu, mukaˈ melegenanu di melaun diniu daansamaˈ mikesalaˈ dayun ndaˈ pa pelum pegbiksuˈ ditu keglaat pekesuunan nilan, su nga kenlelingay nilan, sampay sug dusa nilan.