14
Migukit si Pablo mukaˈ si Bernabe Gempia Petenday tug Iconio
1 Mendadi si Pablo mukaˈ si Bernabe, minateng ilan tug Iconio, sumiled ilan dayun tu simbaan nu getaw Judea, migukit ilan dia. Sabaˈ ginuungan gupiai kengukit nilan, melaun gupia getaw mikpetuud dini Isus, nga getaw Judea sampay kanaˈ getaw Judea. 2 Dagid duuni nga getaw Judea dia, mimilas ilan, suminamuk ilan di ginaa nu nga kanaˈ getaw Judea, adun peglekuntraan nilan su nga mikpetuud. 3 Miniben megbebenwa dia si nga Pablo, mesasal ilan megukit taluˈ nu Kaunutan Megbebayaˈ. Tinakesiˈan nu Megbebayaˈ puˈ metuud su pengukiten nilan mekatag di tulungen, puˈ bigayan ilan niin ginuung adun melaun mekesalebuˈ penggulaula mukaˈ tuˈus binaal ni nga Pablo. 4 Dagid miksumpakiˈig delendeman nu nga getaw dig lunsud kia. Duuni duminunut di nga getaw Judea kia, duun dademai duminunut tu nga peneligan ni Isus.
5 Mendadi ki nga getaw Judea mukaˈ su nga kanaˈ getaw Judea kampuˈ nu nga kaunutan nilan, miksabutsabut ilan, peglegetan nilan sia su nga peneligan ni Isus kia mukaˈ betuun nilan. 6-7 Dagid benaˈ misuunan ni nga Pablo, miglaguy ilan tug benwa Licaonia. Ditu nailan pelum migukit Gempia Petenday ngag lunsud Listra mukaˈ Derbe, sampay tug lumibut benwa.
Ditug Listra mukaˈ Derbe si nga Pablo
8 Naa diag Listra, duuni getaw pilung genat pa di kegigetawen, ndaˈ mainsan mekepanaw. 9 Pikineegan nu pilung su taluˈ ni Pablo. Mendadi misimaˈ ni Pablo puˈ ki pilung kini, duuni kesaligen, kaas mesuˈat peneguliˈay. 10 Kaliˈ penekeg mektaluˈ si Pablo, “Pegbuata, petandeng mui gindeg mu!” Suminambut dayun megbuat su getaw kia, mikpanawpanaw dayun. 11 Mendadi ki nga melaun getaw dia, benaˈ minitaˈ nilan su pinggulaula ni Pablo, minekeg ilan mektegas di pikebitan nilan nga getaw Licaonia, laung nilan, “Kuminilawan na su ngag diwata, luminusad ilan dinita!” 12 Piningalan nilan dayun dini Bernabe su ngalan nug diwata Seus, mukaˈ si Pablo, piningalan nilan dun si Herme, puˈ iini metau megukit. 13 Naa duunig balay pengamuyuˈan nu nga getaw kia tug diwata nilan si Seus, dia mesempel gengaˈan nug lunsud. Saˈ maˈnia, miguit sug belian nilan ngag baka mukaˈ pekayan bulak diag balay kia, adun mekanu ilan dini nga Pablo, ilan nu nga melaun getaw.
14 Naa, apelai. Kini si Bernabe mukaˈ si Pablo, benaˈ misuunan nilan su gulaula nu nga getaw, pinggedit nilan su nga penepeten nilan, minggebek ilan dayun dia titengaˈ nu tebenan getaw. Miktegas ilan, laung nilan, 15 “Yamu pa di getaw, mauma ini? Yami kini, kilawan dami, miksama dai gasal ta. Midini ami megukit diniu Gempia Petenday, adun teliudan niu su mibulugan niu pektemuyay, adun mekelingay amu ditu tantu Megbebayaˈ, su Mikleb tug langit, Miwat tug lupaˈ, Minaglis tu tubig, Minunag tug dagat mukaˈ Mitang dig lumaun bitang di tibuuk lumbang. 16 Iin, pituyangen dengantu su kelaun bansa nu getaw, pia taˈ alandunig liagan nilan pegbetaden nilan. 17 Dagid genat dengantu, mikpailala di nga getaw su Megbebayaˈ, tinakesiˈen dun ki kekpepianen diniu. Puˈ su kelaun pimula niu mpia aanen, pidupiˈanen mukaˈ pisengkuˈen, bigayan amu niin gaan niu sampay pianan ginaa.”
18 Dagid pia maˈantui tinaluˈ ni nga Pablo, gusul nilan mbelibaday su nga getaw, megilak dailan sia betang dini Pablo mukaˈ dini Bernabe.
19 Mendadi tubus itu, duuni nga getaw Judea minateng diag Listra genat ditug Antioquia mukaˈ ditug Iconio. Pinalin nilan pelum sug delendeman nu nga getaw dia, binatu nilan dayun si Pablo. Dindel nilan dayun ditug liu nug lunsud, laung nilan dun, minatay na. 20 Laak dagid saˈ piglidungan si Pablo nu nga sakup ni Isus, migbuat, mipuliˈ dayun diag lunsud kia. Benaˈ miksala gendaw, minundas ilan duaˈ ni Bernabe tug Derbe.
Su Kepuliˈ ni nga Pablo tug Antioquia
21 Naa si nga Pablo kini, sabaˈ nilan megukit Gempia Petenday diag lunsud Derbe, melaun getaw pisakup nilan dini Isus. Dekag ilan mipuliˈ tug Listra mukaˈ tug Iconio sampay tug Antioquia, sakup benwa Pisidia. 22 Pipagen nilan su kesalig nu nga sakup ni Isus dia, pinguliksegan nilan puˈ adun ndiˈ mpalini kekpetuud nilan. Laung nilan, “Subay melaun kelegenay mbianan ta, dekag paita mpeduma tu Keglekaunutan nu Megbebayaˈ.” 23 Mukaˈ kada pikumpungan nu nga sakup ni Isus, miktenduˈ si nga Pablo nga kaunutan dun. Dayun ilan minenabi, dunut mikpuasa ilan, bian nilan paingaten nilan su nga kaunutan kini ditu Kaunutan Megbebayaˈ, su seligan nilan.
24 Benaˈ mibianan ni Pablo mukaˈ ni Bernabe sug benwa Pisidia, midepet ilan tug benwa Panfilia. 25 Duunig lunsud dia, piningalan dun Perga, dia ilan migukit di Gempia Petenday. Tumigbeng ilan dayun tug Atalia, 26 dayun ilan sumakay dumipag puliˈ ditug Antioquia, sug lunsud tandaˈ ilan piˈingat nu ngag duma nilan tu tulung nu Megbebayaˈ, adun mbaluy sug baalen nilan, ki mitubus na dema.
27 Naa dekag si nga Pablo minateng diag Antioquia, pinungun nilan dayun su pikumpungan nu nga sakup ni Isus, inukit nilan dayun dinilan sug launan pinggulaula nu Megbebayaˈ pebian dinilan, su kepanaw nilan. Inukit nilan padun tu nga samasakup nilan su kegbukaˈ nu Megbebayaˈ di kekpetuud nu nga kanaˈ getaw Judea. 28 Tubus itu, miniben si Pablo mukaˈ si Bernabe mekpungun megbenwa di nga sakup ni Isus dia.