15
Mikpungun ditu Jerusalem su nga Kaunutan nu nga Mikpetuud
1 Mendadi duuni nga getaw mituaˈ diag Antioquia genat tu Judea, pituˈunan nilan su nga sakup ni Isus dia, kaliˈ ilan pektaluˈ, “Ndiˈ amu megawen, subay sirkunsisuun amu, adun medunutan niu su Palinta nu Megbebayaˈ pisulaten dini Moises.” 2 Naa benaˈ maˈniai tinaluˈ nu nga getaw Judea kini, si Pablo mukaˈ si Bernabe, sumiwal ilan patiˈ dinilan.a Benaˈ ndaˈ ilan peksinenguˈay, tinduˈ si Pablo mukaˈ si Bernabe meditu Jerusalem, ilan nu nga tendug nilan, adun lingiˈan nilan su nga peneligan ni Isus mukaˈ su nga kaunutan nu pikumpungan nu sakup ditu.
3 Saˈ maˈnia, pipanaw si nga Pablo nu pikumpungan nu sakup ni Isus. Minian ilan dayun tug benwa Fenicia mukaˈ tu Samaria, pegukiten nilan su kelingay nu nga kanaˈ getaw Judea tu Megbebayaˈ. Liliag dun gupia su kelaun kepetedan inukitan nilan dun. 4 Mendadi, benaˈ minateng ilan ditu Jerusalem, pinembaˈ ilan nu pikumpungan nu sakup ni Isus mukaˈ nu nga peneliganen kampuˈ nu nga kaunutan nu pikumpungan. Inukit nilan dayun sug launan pinggulaula nu Megbebayaˈ pebian dinilan. 5 Dagid duuni nga mikpetuud migindeg, sakup ilan nu pikumpungan nga Pariseo, kaliˈ ilan pektaluˈ, “Ki nga kanaˈ getaw Judea, subay sirkunsisuun ilan dakus tituluˈ dinilan, dunutan nilan su Palinta nu Megbebayaˈ pisulaten dini Moises.”
6 Mikpungun dayun su nga peneligan ni Isus mukaˈ su nga kaunutan di pikumpungan nu nga sakup, adun pegyegaan nilan ki tinaluˈ kia nu nga Pariseo. 7 Benaˈ miniben nailan meglantugiˈ dun, kini si Pedro, migindeg, kaliˈ pektaluˈ, “Yamu Mingumpated, suunan niu puˈ begudiin pimiliˈan ita nu Megbebayaˈ, naan dayuni pimiliˈ adun ukitan ku di Gempia Petenday ki nga kanaˈ getaw Judea, adun petuuden nilan. 8 Naa suunan nu Megbebayaˈ sug delendeman nu getaw, kaas tinakesiˈanen su kekpetuud nu nga kanaˈ getaw Judea, puˈ pipengapuˈen dinilan sug Balakaten, maaˈ danu kepepengapuˈen dun dinita. 9 Piglepeng ilan niin dinita, inugasanen su salaˈ nilan miksekat di kekpetuud nilan. 10 Naa saˈ maˈantu, mauma dema pengindanan niu su Megbebayaˈ? Puˈ saˈ pesirkunsisuun niu ki nga mikpetuud kia, puit niu sia dinilan su ndaˈ megaga uitay nu ginepuˈay ta, mukaˈ ita dema, ndaˈ ta dema megaga. 11 Ndiˈ pia! Ita, mikesalig ita tu Megbebayaˈ dakus migawen ita, miksekat di tulung nu Kaunutan ta si Isus. Ki nga kanaˈ getaw Judea, maˈantu dadema.”
12 Mikeneng dayun su kelaun getaw mipungun dia. Pikineegan nilan dayun su gukiten ni Bernabe mukaˈ ni Pablo mekatag di mekesalebuˈ pinggulaula mukaˈ tuˈus binaal nu Megbebayaˈ pebian dinilan selian nilan dia ngag benwa nu kanaˈ getaw Judea. 13 Benaˈ mideksuˈ ilan mektaluˈ, si Santiago, suminalak dayun, laungen, “Naa, yamu Mingumpated, talentenay niau! 14 Inukit na ni Simon su kektelipuun nu Megbebayaˈ di gabangen tu nga kanaˈ getaw Judea, puˈ duun na dinilani binaalen daniin piglegetawan. 15 Misanguˈ dun dadema su sinulat dengantu nu nga pimuunan nu Megbebayaˈ ditu Misulat Taluˈen, laung nilan,
16 ‘Tubus itu mpuliˈu, laung nu Kaunutan Megbebayaˈ,
mukaˈ puliˈan ku petindegay su peglegediˈan ni David.
Petindegen ku su miniben na megebaˈ,
pepegenen ku puliˈ.
17 Kiin, adun lumingay dinaan su kelaun duma getaw,
sampay su nga kanaˈ getaw Judea inggatu mbaal piglegetawan ku.
18 Iini tinaluˈ nu Kaunutan Megbebayaˈ, pisuunen dengantu di nga getaw.’”
19 Laung padun ni Santiago, “Mendadi danaan, delendeman ku, ki nga kanaˈ getaw Judea luminingay na tu Megbebayaˈ, ndiˈ ta nailan semuken.b 20 Laak puitan tailan sulat, tituluˈ ta dinilan puˈ ndiˈ mpia aanen su milemuˈan sabaˈ ginilak dig ledawan. Ndiˈ dadema mpia megdusa, dakus ndiˈ mpia aanen su pinatay dig lengek, sampay sug duguˈ. 21 Puˈ kitu nai kaibenen, pigbesaan nu nga getaw Judea dia nga simbaan nilan su Palinta nu Megbebayaˈ pisulaten dini Moises. Kada Gendaw Pelali, pektituluˈen dig launan lunsud ki palinta kiin ni Moises.”
Su Sulat Piwit tu nga Kanaˈ Getaw Judea Mikpetuud dini Isus
22 Naa saˈ maˈantu, su nga peneligan ni Isus, su nga kaunutan, kampuˈ nu tibuuk pikumpungan nu nga sakup ni Isus, pimiliˈ nilan ki suguˈen nilan megdunut dini Pablo mukaˈ dini Bernabe mangay ditug Antioquia. Iini pimiliˈ nilan si Silas mukaˈ si Judas, sala ngalanen si Barsabas, pegbesaan ilan gupia nu nga mikpetuud. 23 Kinii sulat piwit dinilan.
“Yami nga peneligan ni Isus mukaˈ nga kaunutan di pikumpungan nu nga sakupen mimated diniu, suminulat ami diniu diag Antioquia, diag benwa Siria, mukaˈ diag benwa Cilicia, yamu nu nga kepetedan nami kanaˈ getaw Judea. 24 Mendadi, midengeg nami puˈ duunig duma nami suminamuk diniu, pilaat nilani ginaa niu pibian nu tinaluˈ nilan diniu. Laak ki tinaluˈ nilan kiin, kanaˈ tituluˈ genat dinami. 25 Kaas iinig delendeman piksinenguˈan nami gupia, memiliˈ ami suguˈen nami mangay dia niu, tundug ilan dini petailen nami Bernabe mukaˈ si Pablo. 26 Naa si Bernabe mukaˈ si Pablo kini, minatay ilan sia sabaˈ nu gabang nilan tu Kaunutan ta si Isukristu. 27 Mendadi, iini sinuguˈ nami mangay diniu, kini si Judas mukaˈ si Silas, adun medengeg da niu dema dig babaˈ nilan sug bitang dadema di sinulat kini. 28 Sinanguˈ nami sug delendeman nug Balakat nu Megbebayaˈ, ndiˈ nami mpia tituluˈen diniu su mbegatan amu dun, subay laak ki gempia penggulaulaan kini. 29 Ndiˈ mpia aanen niu sug betang ginilak dig ledawan. Ndiˈ dadema mpia aanen niu sug duguˈ sampay su pinatay dig lengek. Mukaˈ ndiˈ dadema mpia ki megdusa amu. Saˈ pegliaun niu itu, gempiai mpenggulaula niu. Daal daitu.”
30 Mendadi, pipanaw su nga megated tu sulat, tumigbeng ilan tuˈu tug Antioquia. Benaˈ pinungun nilan su tibuuk pikumpungan nu nga sakup ni Isus dia, bigay nilan dayun dinilan su sinulat. 31 Benaˈ mibasa nu nga sakup kia, mipatiˈ ilan leliagay ditu tinituluˈ dinilan kia. 32 Saˈ si Judas mukaˈ si Silas kia, nga megwali taluˈ nu Megbebayaˈ, minamal ilan mektituluˈ tu nga kepetedan dia. Pingamuˈ nilan su ginaa nu nga getaw dia, migiseg dayuni kekpetuud nilan. 33 Naa benaˈ miniben ilan dia, piuliˈ nu kepetedan su nga sinuguˈ di gempia ginaa. [\v 34 Laak si Silas, delendemanen mbilin pa dia.]
35 Naa si Pablo mukaˈ si Bernabe, migbebenwa pailan diag Antioquia, miktituluˈ ilan mukaˈ migukit tu taluˈ nu Kaunutan Megbebayaˈ. Melaun dademaig duma nilan.
Sumiway dini Bernabe si Pablo
36 Naa, benaˈ duuni santaˈ gebii, kaliˈ pektaluˈ si Pablo dini Bernabe, “Naa, mpuliˈ ita ditu, laawan ta su kepetedan ditug launan lunsud kitu tandaˈ ta pigukit su taluˈ nu Kaunutan, adun mesuunan ta su kebetang nilan.” 37 Mauyaˈan dayun ni Bernabe, uiten nilan tendug nilan si Juan kiin, sala ngalanen si Marcos. 38 Dagid si Pablo, delendemanen melengas ndiˈ petendugen, puˈ su ditu pailan Panfilia, sumiway dinilan si Marcos, ndaˈ na duma dinilan mangay megukit. 39 Mendadi, miksual si Pablo mukaˈ si Bernabe, miksuay ilan dayun. Si Bernabe, iwiten tendugen si Marcos, suminakay ilan dumipag tu puluˈ Cipre. 40 Si Pablo, pimiliˈen tundug diniin si Silas. Benaˈ piˈingat ilan nu kepetedan tu tulung nu Megbebayaˈ, mipanaw ilan dayun. 41 Lineep dayun ni Pablo sug benwa Siria mukaˈ Cilicia, pigisegen su kekpetuud nu nga pikumpungan nu sakup ni Isus dia.