13
Tinduˈ nu Megbebayaˈ mukaˈ Sinuguˈen si Bernabe mukaˈ si Saulo
1 Naa su pikumpungan nu nga sakup ni Isus ditug lunsud Antioquia, duuni nga getaw megwali taluˈ nu Megbebayaˈ, mukaˈ duun dademai nga mekpetuˈun. Ilan si nga Bernabe, si Simon (piningalan dun si Maitem), si Lucio (getaw Cirene), si Manaen binataˈ nu gamaˈ ni Gubirnadur Herodes, mukaˈ si Saulo. 2 Ilan kini, duuni gendaw miktamuy ilan ditu Kaunutan mukaˈ mikpuasa ilan. Mendadi selian nilan mektamuy, tiluˈan ilan nug Balakat nu Megbebayaˈ, laungen, “Kini si Bernabe mukaˈ si Saulo, tinduˈu ilan sesuguˈen ku. Kaas pekpain niu ilan, adun baalen nilan ki suguˈan ku dinilan.”
3 Mendadi benaˈ mitubus menenabi mukaˈ mekpuasa su nga sakup ni Isus kia, pindepenan nilan si Bernabe mukaˈ si Saulo, pipanaw nilan dayun.
Migukit si nga Bernabe di Gempia Petenday tu Puluˈ Cipre
4 Naa mendadi, kini si Bernabe mukaˈ si Saulo, kagina sinuguˈ ilan nug Balakat nu Megbebayaˈ mpanaw, tumigbeng ilan pangay tu Seleucia. Genat tu Seleucia, suminakay ilan dumipag tu puluˈ Cipre. 5 Benaˈ minateng ilan tug lunsud Salamina, migukit ilan di taluˈ nu Megbebayaˈ dia nga simbaan nu getaw Judea. Duma nilan migabang dinilan si Juan kiin, sala ngalanen si Marcos.
6 Naa benaˈ midepet si nga Bernabe ditug lunsud Papos, su gekteb nu puluˈ, duuni mipekitaˈ nilan dia sala tawan mensaled, ngalanen si Bar-Jesus. Kini si Bar-Jesus, getaw Judea, inangkenen pimuunan iin nu Megbebayaˈ. 7 Sambaten su gubirnadur di puluˈ kia, si Sergio Paulo, metaasi sinuunanen. Mendadi su gubirnadur, sinabinen si Bernabe mukaˈ si Saulo adun medengegen su taluˈ nu Megbebayaˈ. 8 Dagid saˈ pigukitan nilan su gubirnadur, kuminuntra dinilan ki mensaled kini, sala ngalanen si Elimas (iini ngalanen di pikebitan nu getaw Grecia). Pinemalan ni Elimas penendingay su gubirnadur adun ndiˈ mekpetuud. 9 Mendadi si Saulo kini, sala ngalanen si Pablo, pingepuˈan nug Balakat nu Megbebayaˈ. Pigenlengan ni Pablo si Elimas, 10 kaliˈ pektaluˈ diniin, “Bataˈa nu Palin! Adinadin su melengas, peglekuntraan mu. Sug delendeman mu, lumbus limbung mukaˈ kedupang. Su metuud tinaluˈ nu Megbebayaˈ, penumbeligen mu dig balus! 11 Naa, pelebuˈan ka nu Kaunutan Megbebayaˈ, mbutaa, mesingalet ndiˈ mu maitaˈ su tiag nu gendaw.”
Mitekaw dayun menggabuni pegbantay ni Elimas, iini maitaˈen, medelem. Subay mikpanawpanaw laak menengaw dumanen megulipit diniin. 12 Mendadi su gubirnadur kia, benaˈ minitaˈen su mipenggulaula ni Elimas, mikpetuud dayun dini Isus. Puˈ misebuˈan ditu pituˈun ni Pablo mekatag di Kaunutan.
Migukit si nga Pablo di Gempia Petenday tug Antioquia, Sakup Pisidia
13 Naa suminakay na pelum si nga Pablo. Genat tu Papos, duminipag ilan tug lunsud Perga, sakup Panfilia. Benaˈ minateng ilan ditu, sumiway dinilan si Juan Marcos kiin, mipuliˈ ditu Jerusalem. 14 Genat Perga, minundas si nga Pablo tug lunsud Antioquia, sakup Pisidia. Mendadi benaˈ su Gendaw Pelali, miditu ilan simbaan nu getaw Judea, sumiled ilan dia, mingingkud ilan. 15 Mendadi benaˈ mitubus besaay su Palinta nu Megbebayaˈ pisulaten dini Moises mukaˈ tu ngag duma pimuunanen dengantu, mimuun dini nga Pablo su nga kaunutan di simbaan, laung nilan, “Uu Mingumpated, saˈ duuni kengulikseg niu di nga getaw kini, naa taluˈ na niu.” 16 Mendadi kini si Pablo, migindeg dayun, pipengameden su nga getaw. Kaliˈ pektaluˈ si Pablo,
“Mendadi yamu nga samau getaw Israel mukaˈ yamu nga kanaˈ getaw Judea megbasa dadema ditu Megbebayaˈ, kineegay niu ki taluˈu kini! 17 Su Megbebayaˈ, su pektemuyen ta nu getaw Israel, pimiliˈen dengantu su nga ginepuˈay ta pepiananen. Naa selian nu nga ginepuˈay ta megbenwa ditug Ehipto, benwa nug lain bansa, piglaun nu Megbebayaˈ sug bansa ta, kaas migdedengeg gupia. Benaˈ miniben, piguaˈ ilan pelum nu Megbebayaˈ ditu pibian di metaas ginuungen. 18 Genat itu, paat puluˈ taun su Megbebayaˈ miktigel dig betad nilan, sinegay nilan tug limawaˈ. 19 Benaˈ minateng ilan ditu Canaan, pilengan nu Megbebayaˈ gapuy ki pitu bansa nga getaw dia, adun petengeden di piglegetawanen sug benwa kia. Naa genat tu kedateng kitu nu ginepuˈay ta tug Ehipto sampay di kedaag nilan tu pitu bansa kia, 20 duun saani paat gatus buˈ lima puluˈ taun.”
Laung padun ni Pablo, “Naa genat itu, duuni nga getaw bigay nu Megbebayaˈ meglegukum tu nga ginepuˈay ta sampay di timpu nu pimuunan nu Megbebayaˈ si Samuel. 21 Naa benaˈ migubug ilan tu Megbebayaˈ gadiˈ, bigayen dayun dinilan meglegadiˈ si Saulo, bataˈ ni Cis, kausebaan ni Benjamin, sampay paat puluˈ taun pelum. 22 Benaˈ inawaˈ pelum nu Megbebayaˈ si Saulo, iini sinuklinen dun meglegadiˈ dinilan, si David. Kinii tinaluˈ nu Megbebayaˈ mekatag diniin, ‘Aa naa, mibaangan ku si David, bataˈ ni Isai, leliagenu gupia diniin. Adin su mauyaˈan ku, petuudenen.’ 23 Naa mendadi,” maaˈ laung padun ni Pablo, “kini si Isus, sapuˈ ni David, iin na tuˈu su binaal nu Megbebayaˈ meglegawen dig bansa Israel, maaˈ dadema nu pinasaden. 24 Laak su ndaˈ pa pekpuun si Isus tu pembaalenen, migukit si Juan tug launan getaw Israel puˈ subay meksikesuun ilan dakus mekpebunag ilan tubig. 25 Mendadi benaˈ sungu na metubus ni Juan su penggulaulaanen dinig lumbang, sinaaken tu nga getaw, ‘Naa, taˈ mai ketaluˈ niu, naan keni, taˈi gasalu? Kanaˈ ma naani pedetengen niu lumusad. Dagid duuni sungu metuaˈ, mbinayaˈ pa dinaan, laak pia su sepatusen, kanaˈu mbantang mekpeluas dun diniin.’”
26 Laung padun ni Pablo, “Naa, uu Mingumpated, yamu nga samau sapuˈ ni Abraham mukaˈ yamu nga kanaˈ getaw Judea megbasa dadema ditu Megbebayaˈ, ki kegawen kini, ita nai pimuunan dun nu Megbebayaˈ! 27 Puˈ kada Gendaw Pelali, pegbesaan nu nga samabansa ta mukaˈ nu nga kaunutan ta ditu Jerusalem su sinulat dengantu nu pimuunan nu Megbebayaˈ ditu Misulat Taluˈen. Laak ndaˈ nilan mesabut su pigbasa nilan kia. Kaas kini si Isus, saˈ mituaˈ na, ndaˈ nilan mailala puˈ iini mitenduˈ meglegawen tu getaw. Saˈ maˈantu, pipenuud nilan su sinulat kia, iini kenuud dun, inukuman nilan si Isus. 28 Pia ndaˈidunig dinangat nilan dini Isus lagaˈ na ginaanen, inubug nilan dini Pilato, petain iin. 29 Mendadi benaˈ migelaˈ nilan penggulaulaay sug launan misulat pedaan mekatag dini Isus, inagwat nilan ditu kurus sug bangkayen, libeng nilan dayun di sangyab. 30 Laak dagid kini si Isus, pitubuˈ puliˈ nu Megbebayaˈ. 31 Dayun duuni santaˈ gebii, mikpaitaˈ puliˈ iin tu nga gandang tendugen su kangayen tu Jerusalem genat tu Galilea. Su nga mikaitaˈ dun kia, ilan dayuni takesiˈ migukit dun di nga getaw Israel. 32 Mendadi yami kini,” maaˈ laung padun ni Pablo, “midini ami adun ukiten da nami dema diniu ki Gempia Petenday, 33 su pinasad nu Megbebayaˈ ditu ginepuˈay ta, su minuud na nandaw dinita nga sapuˈ nilan. Iini kenuud dun, pitubuˈ puliˈ nu Megbebayaˈ si Isus. Maˈantui sinulat ditu Misulat Taluˈ nu Megbebayaˈ, ditu keduaˈ Bebaten, laung,
‘Yaˈa sug Bataˈu.
Nandaw mibaluy nau Gamaˈ mu.’”a
34 Laung padun ni Pablo, “Kinii tinaluˈ nu Megbebayaˈ mekatag di kepetubuˈen puliˈ dini Isus, adun ndiˈ na puliˈ matay. Laung nu Megbebayaˈ,
‘Begayu tuˈu diniu su meseligan kepianan
pinasadu dini David di gempagen pasad.’”
35 Maaˈ laung padun ni Pablo, “Maˈnia pa pagidi sinulat dia ngag Bebat, laungen,
‘Ndiˈ mu begay melasak diag lebengenig lawas nu meseligan sesuguˈen mu.’”
36 Laung pa ni Pablo, “Naa saanan tetubuˈ pa si David kia, pinggulaulanen sug delendeman nu Megbebayaˈ. Tubus itu, minatay, bitang dayun dig lebeng maaˈ danu ginepuˈayen, milasak dademaig bangkayen. 37 Dagid ki pitubuˈ puliˈ kia nu Megbebayaˈ, ndaˈ na melasakig lawasen.
38-39 “Naa yamu nga samau getaw Israel, kinii pesuun ku diniu, launan niu. Pia dunutan niu sia su Palinta nu Megbebayaˈ pisulaten dini Moises, ndiˈ damu gusay mpedasun di salaˈ niu. Dagid kini si Isus, miksekat diniin ki kepedasun di salaˈ pegukiten nami diniu. Adin su mekpetuud dini Isus, mpedasun di kelaun salaˈen. 40 Kaas petubud amu, adun ndiˈ menuud diniu su sinulat nu nga pimuunan nu Megbebayaˈ dengantu ditu Taluˈen, laung nilan,
41 ‘Bentayay niu pa daan, yamu nga mesudiˈ!
Subay mesebuˈan amu, mukaˈ mematay amu!
Puˈ penggulaulaan ku di gendawan niu
ki gendiˈ amu metuudan dun,
pia pegwali diniu!’”
42 Naa benaˈ migawaˈ si Pablo mukaˈ si Bernabe dia simbaan kia nu getaw Judea, inubug nu nga getaw dini Pablo megukit puliˈ di sala Gendaw Pelali. 43 Saˈ mimeguliˈ si Pablo mukaˈ si Bernabe, melaun getaw migdunut dinilan, mesama su getaw Judea mukaˈ su nga kanaˈ getaw Judea miginetaw na dinilan. Tinituluˈan ilan dayun ni Pablo mukaˈ ni Bernabe, pinguliksegan nilan adun ndiˈ mpalini kesalig nilan tu tulung nu Kaunutan.
44 Mendadi benaˈ su puliˈ Gendaw Pelali, migelaˈgelaˈ mekpungun su nga getaw dig lunsud kia, adun mekineeg ilan di taluˈ nu Megbebayaˈ. 45 Dagid ki nga getaw Judea, benaˈ minitaˈ nilan su melaun getaw mipungun, misigi ilan patiˈ dini nga Pablo. Pimilas nilan su teluˈen ni Pablo mukaˈ pinampalaksaan nilan iin. 46 Dagid kini si Pablo mukaˈ si Bernabe, suminasal ilan sungkin sumbag. Kaliˈ ilan pektaluˈ, “Paa, yamu kiin, subay miuna amu pedengegay taluˈ nu Megbebayaˈ. Dagid pimilas niu, maˈananen ndiˈ niu pemilangenig lawas niu bantang mpeduma tu ketubuˈ ndaˈi tamanen. Mendadi, megawaˈ nami nandaw diniu, iin pelumi pengukitan nami di taluˈ nu Megbebayaˈ, ki nga kanaˈ getaw Judea. 47 Puˈ iini sinuguˈ nu Kaunutan dinami, laungen,
‘Tinduˈu amu mbaal tilaw mekpedelag tu nga kanaˈ getaw Judea,
adun pegukiten niu tug launan getaw di tibuuk lumbang ki kegawen dinilan.’”
48 Naa benaˈ midengeg nu nga kanaˈ getaw Judea ki tinaluˈ kia ni Pablo, liliag ilan gupia. Inal nilan su ginukit ni Pablo mekatag di Megbebayaˈ. Adin su nga mitenduˈ nu Megbebayaˈ mpeduma tu ketubuˈ ndaˈi tamanen, mikpetuud ilan dayun.
49 Mendadi, mileep di tibuuk benwa kia su taluˈ nu Kaunutan Megbebayaˈ. 50 Dagid ki nga kaunutan dig lunsud kia mukaˈ su ngag libun meketaasi tindegen megbasa ditu Megbebayaˈ, sinamuk nu nga getaw Judea su ginaa nilan, adun peglegetan nilan si Pablo mukaˈ si Bernabe. Saˈ maˈantu, inutidan nilan dayun si nga Pablo diag benwa nilan. 51 Saanan ni nga Pablo megawaˈ dia, ikpug nilan sug lepup lupaˈ di geksud nilan, takesiˈan nilan tu nga getaw dig lunsud kia. Tubus itu, minundas ilan dayun tug Iconio. 52 Laak su nga sakup ni Isus diag Antioquia, liliag ilan gupia, mukaˈ pingepuˈan ilan nug Balakat nu Megbebayaˈ.