12
Migdugang su Kekpeleget di nga Mikpetuud
1 Naa mendadi su timpu kiin, duuni nga sakup ni Isus pilegetan ni Adiˈ Herodes. 2 Pipatay ni Herodes su sala Santiago, pated ni Juan, piputukanen gulu. 3 Naa su nga getaw Judea, pinleliag ilan ditu pinggulaula kia ni Herodes. Benaˈ midengeg ni Herodes puˈ pinleliag ilan dun, pidaapen padun si Pedro. (Su kedaap diniin, mitaang dig lumpuk nu getaw Judea piningalan dun sug Lumpuk di Pan ndaˈ Petulinay.) 4 Mendadi kini si Pedro, benaˈ midaap, pinikutan dayun, piˈingat di paat penunan sundalu. Sala penunan, duuni pikpaat tawan. Sug delendeman ni Herodes, ukumenen sia si Pedro ditu gedapan nug launan getaw saˈ meglinggwang pa sug Lumpuk tug Liniusan. 5 Saˈ maˈnia, pegingaten pa si Pedro diag dialem pirisuan, laak su pikumpungan nu nga sakup ni Isus, pinenebian nilan namal ditu Megbebayaˈ si Pedro.
Su Kebeluy ni Pedro tu Pirisuan
6 Naa benaˈ gebii, saˈitada sendaw pa su kepeguaˈ ni Herodes dini Pedro dia pirisuan adun ukumenen, kini si Pedro, pektulug, piktimpangan ingatay duaˈ tawan sundalu. Binalud si Pedro kadina duaˈ buuk, mukaˈ duun pa pagidi sundalu pegingat dia gengaˈan nu pirisuan. 7 Mendadi, tekaw duuni mituaˈ dini Pedro sesuguˈen nu Kaunutan Megbebayaˈ getaw langit, mukaˈ midelagan su sugud. Dinapiˈ dayun nu getaw langit si Pedro adun metanud, laungen, “Pegdedaliˈa pegbuat!” Mitekaw dayun melengaˈ su ngag balud dia kemet ni Pedro. 8 Laung dayun nu getaw langit, “Pegbaling ka mukaˈ penepatusa.” Mikpetuud dun dayun si Pedro. Laung nu getaw langit, “Peksuuba, dunuta dayun dinaan!” 9 Migdunut tuˈu si Pedro diag liu nu pirisuan. Laak ndaˈen mesuunay saˈ mipenggulaula tantu, laungen dun teginepen da laak. 10 Mendadi benaˈ mibianan nilan sug bekna megingat, dayun su keduaˈ megingat, minateng ilan dayun tu gengaˈan putaw bianan pangay diag lunsud. Masiˈ miksipala laak mpukaˈ su gengaˈan. Mikeguaˈ ilan dayun. Benaˈ mipapas nilan ki sebulus karsada, luminilung dayun su getaw langit.
11 Iin pa mitenudan ni Pedro, laungen dig dialem delendemanen, “Aa naa, misuunan ku na puˈ metuud! Sinuguˈ tuˈu nu Kaunutan Megbebayaˈ su sesuguˈenen getaw langit gumawen dinaan di gengkeman ni Herodes, sampay di kelaun pedetengen nu nga getaw Judea mpenggulaula sia dinaan.”
12 Naa benaˈ misimaˈ ni Pedro su mipenggulaula, miditug balay ni Maria, su ginaˈ ni Juan sala ngalanen si Marcos. Melaun getaw mipungun diag balay kia puˈ menenabi. 13 Mendadi, benaˈ minateng si Pedro mukaˈ mikpetelubatik diag liu nu gengaˈan, duun dayuni sesuguˈen lumiu dia, delaga ngalanen si Roda, puˈ pukaˈanen. 14 Miˈilala ni Roda su tingeg ni Pedro, kaas sumiled dayun puliˈ, inukiten dia nga minenabi puˈ pegindeg diag liu si Pedro. Laak sabaˈ leliagen, ndaˈen na pukaˈay su gengaˈan. 15 “Baa, buˈangbuˈang ka!” laung nilan. Laak miglegintuud sug delaga kia. Simbag nilan, “Iini mikpetelubatik su la getaw langit megingat dini Pedro.”
16 Mendadi kini si Pedro, laak menamal mekpetelubatik. Tigaˈwan, pinukaˈan na nu nga sakup su gengaˈan, miˈilala nilan dayun si Pedro. Mipatiˈ ilan mesebuˈay diniin. 17 Saˈ maˈnia, pipengamed ilan ni Pedro, inukiten dayun dinilan su kebeluy diniin nu Kaunutan Megbebayaˈ dia pirisuan. Diksuˈ ni Pedro su taluˈen, “Ukitay niu di kebeluyu si Santiago kampuˈ nu ngag duma kepetedan ta.” Benaˈ mideksuˈ mektaluˈ si Pedro, gumiwaˈ dia, minangay tug lain benwa.
18 Mendadi su nga sundalu ditu pirisuan, benaˈ miglegendaw, misasaw ilan gupia saˈ mikendutaˈ dun saan si Pedro. 19 Si Herodes kia, ndaˈ nai ndaˈen maulikaw, sabaˈen menengaw dini Pedro. Benaˈ ndiˈen mbaangay, pinsaakanen su nga migingat dini Pedro, dayunen ilan pepatay.
Tubus itu, migawaˈ si Herodes dia Judea, miditu pelum Cesarea pegbebenwa.
Su Kepatay ni Herodes
20 Naa kini si Herodes, melaat gupiai ginaanen tu getaw Tiro mukaˈ tu getaw Sidon. Saˈ maˈnia, duuni gendaw mikpungun su nga getaw kia, minadap ilan dini Herodes, miksaak ilan diniin kelinaw. Laak mikpaingabang ilan peguna dini Blasto, su pigwekilan ni Herodes. Benaˈ mituudan dinilan si Blasto, iin pa miksaak ilan dayun tuˈu dini Herodes kelinaw, puˈ su ketubuˈan nilan, genat di peglegediˈan kia ni Herodes.
21 Naa benaˈ su gendaw na nu sesaˈen, kini si Herodes, mikseluk pekayan gadiˈ, migingkud dayun dia gingkudanen gadiˈ, migagdat dayun tu nga getaw. 22 Selian ni Herodes mektaluˈ, mimeksay su nga getaw, laung nilan, “Ki tingegen kiin, kanaˈ taluˈ kilawan, puˈ taluˈ diwata!” 23 Mitekaw dayun pelebuˈay nu sesuguˈen nu Megbebayaˈ getaw langit si Herodes, sabaˈ dinawaten su kegenal nu nga getaw diniin, ndaˈen sungkin pegbesaay su Megbebayaˈ. Inuled dayun si Herodes mukaˈ minatay.
24 Laak dagid su taluˈ nu Megbebayaˈ, minamal mesigwag, minamal dadema megdugang su mikpetuud dun.
25 Naa si Bernabe mukaˈ si Saulo kiin, benaˈ mitubus na nilan su ginangay nilan dia, mipuliˈ ilan genat tu Jerusalem, pidunutan nilan si Juan kia, sala ngalanen si Marcos.