Yesu fɔn sɔn oku
(Mat 28:1-8; Lwk 24:1-12; Jan 20:1-10)
16
1 Xena Jwifuye we gbɔjwɛzan la va yi vɔ, Malya Madalatɔn, kpodo Salomɛ kpodo Malya xeni nyi Jaki we onɔ, va yi xɔ celu hwɛn nywɛye, a va yi hu na Yesu we ocɔ. 2 Le kwɛsiɖagbe, nyɔnusi laye yi yɔgun la to le kɛklɛnu dɛɛn, ohwe bo o zɛ. 3 Ye lɔ na yenɔniɔye nɔ tun mɔ: «Onu lɛ na bli ɛkpɛn la tɛ na mí le yɔgun la nu?» 4 Mi wɛ, ye kɔ okɔ kpoŋu bo kpɔn tun ye bo o bli ɛkpɛn la tɛ le yɔgun la nu, ɛkpɛn la bo glo taŋu. 5 Xena ye ɖyɛ yɔgun la mɛ, ye kpɔn hwanjavi ɖe, e bo xlɔn onyi le aɖusi mɛ, bo do awu gaga owee ɖe, mi wɛ ye titɔ. 6 Vɔ, e lɔ na ye tun mɔ: «Mi ká mɔ vɔ o, Yesu Nazalɛtitɔn xena ye kan do otinsoga ji la wɛ mi kan nɔ, e o fɔn sɔn oku, e ɔn le bwɛ, mi kpɔn ofi xena ye sɔ ocɔ etɔn sɔ ɖo saa xɛn. 7 Mi va yi lɔ na onukplanvi etɔnye gbɔɔn do jɛ Piyɛ can ji, tun mɔ: “E na va yi tre kpɔn mi le Galile we kansinmɛ, blɛ la wɛ mi na kpɔn-ɛ le, ɖi lena e lɔ na mi ɖo saa ha.”» 8 Ye tɔn, bo si sɔn, bo lɛ le yɔgun la kɔn, ɖo vivɔ jɛ ye ji gbɔɔn ye bo hunhun nɔ. Ye ko lɔ oxo ti na ɛmɛ ɖe, ɖo ye vɔ nɔ.Yesu ze do ŋumɛ na Malya Madalatɔn
(Mat 28:9-10; Jan 20:11-18)
[ 9 Xena Yesu fɔn le ɛmɛ kukuye mɛ le kwɛsiɖagbe kɛklɛ, Malya Madalatɔn xe mɛ na e nya gbigbɔ nylakan acowe le la, wɛ e ze do ŋumɛ na jɛ ŋukɔn. 10 Emyɔ bo va yi lɔ na ɛmɛ xeye kpo Yesu kpo ni nɔ nɔ okpɔ ye. Ɛmɛ mɛ laye bo le lutu mɛ, bo fan avin nɔ. 11 Vɔ, xena ye se tun Yesu bo le ɛgbɛ, Malya bo kpɔn-ɛ, ye ɔn kan do e ji.
Yesu ɖe eɖe sɔ xlɛ onukplanvi owe
12 E mɛ godo, Yesu ɖe eɖe sɔ xlɛ onukplanvi owe ɖeye dogbɔn ninɔmɛ bu mɛ, onukplanvi laye bo lo yi ogleta ɖe mɛ nɔ. 13 Ye gbɔn, bo va lɔ na ɛmɛ gbokpweye, yee ko kan do oxo xena ye can lɔ ji.
Yesu ɖe eɖe sɔ xlɛ onukplanvi weɖokpo laye
14 Le vivɔnu, Yesu ɖe eɖe sɔ xlɛ onukplanvi weɖokpo laye le hwexenu na ye yi tɛnxo bo lo ɖu onu nɔ, e bo gbɛ onu na ye do ma kan do e ji yetɔn kpodo oto tritri yetɔn wu, ɖo ye ɔn kan do oxo xena ɛmɛ xeye ni kpɔn-ɛ, bo va lɔ tun e bo fɔn sɔn oku ye, lɔ ji. 15 E mɛ godo, e lɔ na ye tun mɔ: «Mi yi ɛgbɛ la mɛ seŋu, a bo jla Ɛwɛn Nywɛ la na ɛgbɛtɔ zɛtɛye seŋu. 16 Ɛmɛ xeni na kan do e ji, ye bo na lɛ Mawu we ɛsin ni-i, na kpɔn hwlɛngan, vɔ ɛmɛ xeni ɔn kan do e ji nɔ, ye na do ɛhwɛ ni-i. 17 Ŋudandonu xeye ni na kplɔ ɛmɛ xeye ni na kan do ji ye, do xɛn: ye na nya gbigbɔ nylakanye le nyikɔ tɛye mɛ, ye na do ogbe yɔyɔye, 18 ye na wle odan kpo alɔ kpo fɛɛ; na ye nu onu hu ɛmɛ ɖe, onu ti ɔn wa ye nɔ, ye na ɖo alɔ ota na adɔnnɔye, adɔn ba gɔ na ye.»
Yesu sɔn yi jiŋukunsin