Odanwiwa 1

Ɛmɛ dindɔn Yesutɔnye we

Odanwiwa

We wema

Yesu sɔn yi jiŋukunsin

1 Ɛmɛ vivɛna tɛye Tewofili, le wema tantyan na ko wlan mɛ, ko lɔ oxo do onu zɛtɛye xena Yesu wasi kpodo onu xena e kplan ɛmɛye sɔn titɔ e ji, 2 gbɔɔn do yi hwexenu na e sɔn yi jiŋukunsin, vɔ gbɔxwe e na do sɔn, e do ɛwɛn dogbɔn Gbigbɔ Kinkwɛn ji, na ɛmɛ dindɔn xeye na e o can ye. 3 Xena Yesu ku bo fɔn vɔ, e ɖe eɖe sɔ xlɛ ɛmɛ ye, bo ɖe xlɛ ye dogbɔn walɔ susu mɛ tun he bo le ɛgbɛ. Le onyihinhɔn kanɖe gblamɛ, e sɔ eɖe sɔ xlɛ ye bo do lɔ oxo na ye sɔn Mawu we Xɔluɖuɖu wu. 4 Gbeɖokpo, hwexenu na mi kpodo ye kpo le okpɔ, e tɛ ɛɖɛ do e ji bo lɔ na ye tun mɔ: «Mi ká lɛ le Jeluzalɛmu we toxo la mɛ, vɔ mi na tre kpɔn jɔgbe xena Mawu fyan, xe wu na ko lɔ oxo sɔn na mi la. 5 Ɖo, Jan, Mawu we ɛsin wɛ e lɛ na ɛmɛye, vɔ le azan ovi ɖe mɛ, ye na lɛ Gbigbɔ Kinkwɛn na mi».

6 Ɛmɛ mɛ laye, xeye kpo mi kpo ni le okpɔ, bo kan-ɛ se tun mɔ: «Xwetɔ, hwemɛ la nu wɛ o na mɔ trɔ gbá Izrayɛli we xɔluɖuto la»?

7 Yesu bo ɖo e wu na ye tun mɔ: «Miye hɛn na do josi oganxixoye kpodo azan xeye na Mawu Otɔ la ɖo ye kpodo ɛcɛ kpikpa etɔn kpo. 8 Vɔ, mi na yi hɔnhlɔn ɖe, Gbigbɔ Kinkwɛn na jɛ ote do mi a ji, mi bo na nyi kunuɖetɔ tɛyee le Jeluzalɛmu, le Yude we oto la zɛtɛye mɛ, le Samali we kansinmɛ, gbɔɔn do yi nyixɔ la we vivɔnu zɛtɛye.» 9 Xena Yesu lɔ oxo mɛ laye na ye vɔ, e sɔn yi jiŋukunsin, bo ɖyɛ sunwɔ mɛ, bo bu le ŋumɛ na ye. 10 Hwexenu na e lo sɔn nɔ, ye kɔ okɔ bo do kpɔn jiŋukunsin la ɖodan nɔ trulululu, mi wɛ dahwe owe ɖeye bo do awu owee, bo ze do ŋumɛ na ye, 11 bo lɔ tun mɔ: «Mi ɛmɛ Galiletɔye, ɛlɛ jɔ na mi do ci ote bo do kpɔn jiŋukunsin ɖodan nɔ mɔsinha? Yesu na Mawu kɔ do sɔn yi jiŋukunsin nɔ mɛ, mɔsinha la ke wɛ e na mɔ trɔ va ɖo».

Klisu we ɛmɛ dindɔn laye trɔ va sɔn yi Jeluzalɛmu we toxo mɛ

12 Yesu we ɛmɛ dindɔn laye trɔ, bo zɔn afɔ sɔn okpó xe ji na olivutin le gbɔɔn bo do va yi Jeluzalɛmu. Okpó mɛ la bo tɛkpɔ Jeluzalɛmu la na kpɛntin ɖokpo ha. 13 Xena ye gbɔn va Jeluzalɛmu we toxo la mɛ, ye sɔn yi sanŋu ɖe ji, ye bo o nɔ kpli le blɛ la saa. Ye ɛmɛ xeye ni le oxɔ la mɛ ye xɛn: Piyɛ, Jan, Jaki, Andre, Filipu, Tɔma, Batelemi, Matye, Jaki xeni nyi Alufe vyɛ, Simɔ ɛhwɛyina-ototɔ. 14 Ye ɛmɛ zɛtɛye bo nɔ kpli do okpɔ le ogan ɖekpekpe mɛ a bo do xo ɛɖɛ le ogbenɔkpɔ mɛ, ye kpodo nyɔnusiye kpodo Malya xeni nyi Yesu we onɔ kpodo Yesu we nɔvyɛye.

Ye can Matyasi do Yuda do mɛ

15 Gbeɖokpo, ye ɛmɛ xeye ni kpli do okpɔ laye yi kantɔn mɔsinha, Piyɛ bo site, bo lɔ na ye tun mɔ: 16 «Nɔvyee, oxo xena Gbigbɔ Kinkwɛn lɔ le Mawu we oxo mɛ dogbɔn Davidi ji sɔn Yuda wu, e ɖo na cɛ. Yuda la wɛ nɔ ŋukɔn na ye do wle Yesu. 17 Yuda la le mía mɛ saa, mí bo nɔ wa Mawu we odan do okpɔ, 18 vɔ, xena e yi onu nyanyla xena e wasi we oho, e va yi xɔ ogle ɖe. Ogle mɛ la mɛ wɛ e flɛ le bo jɛ onyi do adɔ ji, adɔ etɔn bo gba, dɔvi etɔnye bo kɔn do nyixɔ mɛ. 19 Ɛmɛ zɛtɛye xeni le Jeluzalɛmu ye bo se oxo la. Mi wɛ dɔn na ye do ɖo nyikɔ na ogle mɛ la le ogbe yetɔn mɛ tun Akɛlidama, e gɔnmɛ bo nyi tun ɛhun we ogle. 20 Mi wɛ, ye wlan do Ohan jiji we wema mɛ tun mɔ:

“Oxwe etɔn ni ci vɔvɔ,

Ɛmɛ ti ni ká mɔ nɔ oxwe etɔn gbe.”

Ye bo mɔ wlan tun mɔ:

“Ɛmɛ bu ni ɖɔli-i a bo do wa odan do tɛnxo etɔn.

21-22 E jɛ tun ŋusunglo ɖokpo a bɔ do mía wu a do ɖe kunu sɔn Xwetɔ Yesu we finfɔn sɔn oku wu. Ŋusunglo la bo na sɔn ɛmɛ xeye ni zɔn kpo mí sɔn hwexenu na Xwetɔ Yesu le kpo mí bo do kplɔ mi nɔ, sɔn hwexenu na Jan lɛ Mawu we ɛsin na ɛmɛye gbɔɔn do va yi jɛ gbexegbe na Mawu kɔ Yesu do sɔn yi jiŋukunsin.»

23 Xena Piyɛ lɔ mɔsinha vɔ, ye kplɔ ɛmɛ owe xeye do va: Matyasi kpodo Jozɛfu xena ye sɔ nyikɔ na tun Basabasi alo Jutusi. 24 Ye ɛmɛ zɛtɛye bo xo ɛɖɛ bo lɔ tun mɔ: «Xwetɔ, myɔ wɛ nyɔ ɛmɛ zɛtɛye we oji, ɖe ɛmɛ xena o can, sɔ xlɛ mí le ɛmɛ owe xeye mɛ, 25 ɛmɛ la bo na trɔ zun ɛmɛ dindɔn tɔwe, a bo do wa odan xena Yuda jo do, bo do sɔn yi ofi xeni jɛ ni-i.» 26 Ɛɖɛ la godo, ye bo wasi ovoɖiɖe, e bo va yi jɛ Matyasi ji, emyɔ la wɛ bɔ do ɛmɛ dindɔn weɖokpo laye wu.