Gbigbɔ Kinkwɛn jɛ ote
2
1 Hwexenu na Pɛntekotu we azan va sɔgbe, ye ɛmɛ xɔsetɔ zɛtɛye wɛ kpli do ofi ɖokpo. 2 Haŋu zɔnɖokpo, ozin ɖe tɔ sɔn jiŋukunsin ɖi jɛhɔn sinsyɛnxu ɖe ha, bo gɔ oxwe xe gbe na ye xlɔn onyi le la seŋu. 3 Mi wɛ, onuye ɖi ozo we ɛɖɛye ha bo ze do ŋumɛ na ye, bo ma jɛ ɖokpo-ɖokpo yetɔn ji. 4 Ye ɛmɛ zɛtɛye bo gɔ kpo Gbigbɔ Kinkwɛn. Ye bo jɛ oxo lilɔ ji do ogbe bubuye mɛ, ɖi lena Gbigbɔ Kinkwɛn la na ɛmɛ ɖokpo-ɖokpo ɖo ha.5 Vɔ, le hwemɛ la nu, Jwifu xeye ni nɔ ɖo sisi na Mawu ye, sɔn wɛkɛzo ɛnɛ laye mɛ bo do va le Jeluzalɛmu. 6 Xena ɛmɛ susu mɛ laye se ozin xeni tɔ la, ye va do agunto hoo, ɖokpo-ɖokpo yetɔnye bo se lena xɔsetɔ laye lo lɔ oxo do ogbe yetɔn mɛ nɔ ɖo, e bo kpaca ye. 7 Onu xeni jɔ la bo hu onu do ye taŋu, ye bo lɔ tun mɔ: «Mi kpɔn ɛmɛ xeye ni lo lɔ oxo nɔ mɛ ye, Galiletɔye hɛn ye nyi wɛɛ? 8 Naɖe lɛ e nyi ɖo na ɖokpo-ɖokpo míatɔnye do se oxo lilɔ yetɔnye do ogbe míatɔnye mɛ nɔ? 9 Le mía mɛ, ɛmɛ ɖeye sɔn oto xeye mɛ: Pati, Mɛdi, Elamu, Mɛzopotami, Yude, Kapadɔsi, Pɔn, Azi we kansinmɛ, 10 ɖeye bo sɔn Fliji, Panfili, Ejiputi, Libi xeni bɔ do Silɛnu we toxo wu, kpodo Hlɔma, 11 Klɛti, Alabi, ɛmɛ susu bo nyi Jwifuye, ɛmɛ ɖeye bo nyi ɛmɛ xeye ni va kplɔ Jwifuye we osɛn do nɔ ye, ganke mí bo lo se lena ye lo lɔ onu nywɛ xeye na Mawu wasi ye do ogbe míatɔnye mɛ nɔ ɖo!» 12 Ye ɛmɛ zɛtɛye bo flu, ye ko nyɔ susu xena ye na ɖe do onu xena ye kpɔn nɔ la wu, ye bo lɔ na yenɔniɔye nɔ tun mɔ: «Naɖe mí na ɖe xe la we gɔnmɛ ɖo?» 13 Vɔ ɛmɛ buye bo ko onukplanvi laye nɔ bo lɔ nɔ tun mɔ: «Ahan wɛ ye nu bo mu seŋu».
Piyɛ ɖe onu xeni jɔ la gɔnmɛ na ɛmɛye
14 Mi wɛ, Piyɛ kpodo ɛmɛ dindɔn weɖokpo gbokpweye bo site, e bo kɔ ogbe yi oji kpo axwa lelele bo tun mɔ: «Mi Jwifuye kpodo ɛmɛ xeni nɔ nɔ Jeluzalɛmu ye, mi ɖo oto-o ganji, na mi a do se onu xe gɔnmɛ. 15 Ɛmɛ xeye na mi lo kpɔn nɔ mɛ ye, ti ɔn nu ahan bo mu ɖi lena mi bu-i ɖo ha, ɖo kɛklɛ ogan ɛcɛnnɛ jan wɛ lo xo nɔ. 16 Vɔ oxo xena oxolɔɖonyitɔ Jowɛli lɔ saa wɛ lo jɔ nɔ. E lɔ saa tun mɔ:
17 “Mawu lɔ tun: Le azan kpotwi laye gbe,
Ko na sɔ Gbigbɔ Kinkwɛn tɛye sɔ do ɛmɛ ɖekpekpe mɛ;
Vikpɛ miatɔnye, ŋusunglo kpo nyɔnusi kpo na trɔ zun oxolɔɖonyitɔ tɛye,
Ko na nɔ ɖe onu sɔ xlɛ hwanjaviye,
A bo nɔ lɔ oxo na nyɔxonɔye gbɔn odrɔ mɛ.
18 Ɛɛn, le azan mɛ laye gbe,
Ko na sɔ Gbigbɔ Kinkwɛn tɛye sɔ do odansɔvi ŋusunglo kpodo nyɔnuvi tɛyee mɛ,
Ye bo na trɔ zun oxolɔɖonyitɔ tɛye.
19 Ko na wasi ŋudandonu le jiŋukunsin kpodo nyixɔ ji,
Ɛhun, ozo, azɔ bo na tun driɖiɖiɖi.
20 Ohwe na va wi cuɖu-cuɖu, osun bo na va bya ɖi ɛhun ha
Gbɔxwe na Xwetɔ la we gigo we azan ɖaxo na do va.
21 Mi wɛ, ɛmɛ ɖekpekpe xeni na yɔ Xwetɔ la we nyikɔ, e na kpɔn hwlɛngan.”
22 Izrayɛli vikpɛye, mi ɖo oto-o, a bo se oxo xeye: Yesu xeni sɔn Nazalɛti, Mawu ŋutɔ wɛ ɖe ɛcɛ kpikpa etɔn sɔ xlɛ mi, dogbɔn ŋudandonu, onu kpaca-ɛmɛ kpo josi xeye ni wasi le mia mɛ ye gbɔn e ji, miye ŋutɔye bo nyɔ-ɛ. 23 Dahwe mɛ la, wɛ ye sɔ do asi na mi, ɖi lena Mawu ŋutɔ jlo ɖo, e bo o wasi tito mɛ la sɔn saa xixo. Mi bo hu-i, dogbɔn ɛmɛ nyanyla xeye ni kan-ɛ do otinsoga ji ye we alɔye mɛ. 24 Vɔ, Mawu bo fɔn-ɛ sɔn oku, bo tun okan ni-i le oku we vivɛsiseye mɛ, ɖo, oku we hɔnhlɔn ɔn kpewu na hɛn e wu. 25 Ɖo Davidi o lɔ do Yesu la wu saa tun mɔ:
“Ko nɔ kpɔn Xwetɔ tɛye tɛgbɛ le ŋukɔn na-a,
Ɖo e le aɖusi mɛ na-a, na ayixa ko mɔ do gba do na-a nɔ.
26 Mi wɛ dɔn oji lo jɔ-ɔ nɔ, ko bo lo ji jijwɛ we ohanye nɔ,
Ɖo, agbaza tɛye can na kpɔn vivo, ko bo na ɖo omɔkpinkpɔn;
27 Xwetɔ, o ɔn jo okla tɛye do okutomɛ nɔ,
O ko jo mɔ ɛmɛ kinkwɛn tɔwe do na ko nyɔ ci yɔgun mɛ nɔ.
28 O sɔ ɛgbɛ we omɔ bo sɔ xlɛ-ɔ,
Ko bo gɔ kpo jijwɛ kpo, ɖo, o le kpo-o le oxojɔxomɛ”».
29 Piyɛ bo yi e ji, bo lɔ tun mɔ: «Nɔvyee, ma lɔ oxo xe na mi kpo kan do e ji kpo, mía dagbwa Davidi, e ku ye bo ɖi-i, yɔgun etɔn bo le oto míatɔn mɛ gbɔɔn bo va jɛ egbe. 30 Vɔ oxolɔɖonyitɔ wɛ e nyi, e bo nyɔ-ɛ tun, Mawu bo ta onu, bo fyan jɔgbe ni-i tun mɔ: “Jijimɛvi tɔwe ɖokpo, na va ɖu xɔlu le xɔluzinkpwe tɔwe ji.”» 31 Davidi o kpɔn Klisu la we finfɔn sɔn oku we ɖiɖexlɛ saa, mi wɛ dɔn e do lɔ oxo sɔn e wu, bo tun mɔ:
«Mawu ɔn jo-e do okutomɛ nɔ,
Gbaza etɔn ko nyɔ ci yɔgun mɛ nɔ.»
32 Piyɛ bo mɔ yi e ji ke bo tun mɔ: «Mawu fɔn Yesu mɛ la sɔn oku, míye ɛmɛ dindɔn etɔn zɛtɛye bo kpɔn-ɛ le finfɔn sɔn oku la godo. 33 Mawu bo kɔ-ɛ sɔ ɖo aɖusi mɛ etɔn. Yesu bo yi Gbigbɔ Kinkwɛn le Otɔ si, ɖi lena e fyan jɔgbe etɔn na mí ɖo, bo ma na míye, mi wɛ nyi onu xena mi se nɔ bo lo kpɔn nɔ. 34 Ɖo, Davidi emyɔ, ye ɔn kɔ-ɛ do sɔn yi jiŋukunsin, vɔ e bo lɔ tun mɔ:
“Mawu Xwetɔ la lɔ na Xwetɔ tɛye tun mɔ:
Xlɔn onyi le aɖusi mɛ na-a,
35 Gbɔɔn do yi hwexenu na ko na sɔ kɛntɔ tɔweye
Do wasi afɔɖo-ejinu tɔwe”.
36 Fifi, Izrayɛli vikpɛye, mi ɛmɛ zɛtɛye ɖo na nyɔ-ɛ ganji tun Mawu bo sɔ Yesu xena mi kan do otinsoga ji la, sɔ wasi Xwetɔ kpo Klisu».
Ɛmɛye kan do Yesu ji
37 Xena ɛmɛ laye se oxo la vɔ, ayixa yetɔn gbado, ye bo kan Piyɛ kpo ɛmɛ dindɔn gbokpweye se tun mɔ: «Mía nɔvyɛye, ɛlɛ mí ɖo na wa?» 38 Piyɛ bo ɖo e wu na ye tun mɔ: «Mi ɖɔli jijɔ miatɔnye, ye bo na lɛ Mawu we ɛsin na mi le Yesu Klisu we nyikɔ mɛ. Mawu bo na sɔ onu nyanyla miatɔnye sɔ kɛ mi, a bo na mi Gbigbɔ Kinkwɛn. 39 Ɖo, miye wɛ Mawu fyan jɔgbe la na, miye kpodo vikpɛ miatɔnye, kpo ɛmɛ zɛtɛye xeni le dindyɔnnu ye, xeye na Xwetɔ Mawu míatɔn na va yɔ».
40 Piyɛ bo mɔ lɔ oxo susuye bo do do hɔnhlɔn ye, ye ba do kan do Yesu ji, e bo lɔ na ye tun mɔ: «Mi yi ogbe na Mawu a hwlɛn mi gan le jijimɛvi nyanyla mɛ ye mɛ.» 41 Ɛmɛ xeye ni yi ogbe na Piyɛ we oxo ye, ye na yi akpo atɔn mɔsinha, ye bo lɛ Mawu we ɛsin na ye. Ye bo va ɖyɛ xɔsetɔye mɛ.
Xɔsetɔ tantyantɔnye lo wasi nɔvi nɔ
42 Ye bo nɔ do vivɛnu a do se onu kpinkplan Yesu we ɛmɛ dindɔn laye tɔn, a bo do nɔ okpɔ, a bo do ɖu onu do okpɔ, a bo do xo ɛɖɛ do okpɔ. 43 Onu kpaca-ɛmɛye kpo ŋudandonu susuye bo nɔ jɔ nɔ dogbɔn Yesu we ɛmɛ dindɔn laye ji. Do e mɛ la wu, ɛmɛ susu bo nɔ vɔ nɔ. 44 Xɔsetɔ zɛtɛye bo bɔ do okpɔ, ye bo nɔ ma onu xena ye ɖo ye kpo yenɔniɔye. 45 Ye bo nɔ sa onu xeye ni le ye si ye, a bo ma oho la le yeɖe mɛ ɖi lena ɛmɛ ɖokpo-ɖokpo we ohyan le ɖo ha. 46 Gbe zɛtɛye gbe, ye nɔ do vivɛnu a bo do kpli do okpɔ le Mawu we oxwegbe. Le oxwe yetɔnye gbe, ye nɔ ɖu onu do okpɔ, ye bo nɔ ma onuɖuɖu yetɔnye do okpɔ kpo jijwɛ kpo, kpodo dɔmɛfaa kpo. 47 Ye bo nɔ kanfu Mawu nɔ, otogun la seŋu bo nɔ ɖe dɔmɛnywɛ sɔ xlɛ ye nɔ. Mi wɛ, onyihinhɔngbe-onyihinhɔngbe, ɛmɛ xeye na Xwetɔ la hwlɛn gan ye, e nɔ sɔ ye sɔ kpe na agun la.