Ye kplɔ Yesu va Pilati kɔn
15
1 Le kɛklɛnu fuu, Mawu we ovɔsantɔ ɖaxoye wasi okpli kpodo otomɛhyɔnye, osɛnkplan-ɛmɛtɔye kpodo ɛhwɛɖɔtɔ ɖaxo laye seŋu. Ye bla Yesu, bo dɔn-ɛ sɔ va yi do asi na Pilati. 2 Pilati la kan Yesu se tun mɔ: «Myɔ wɛ nyi Jwifuye we xɔlu?» Yesu ɖo e wu ni-i tun mɔ: «E mi la mɛ o lɔ.» 3 Ovɔsantɔ ɖaxo laye do ɛhwɛ susu ni-i. 4 Pilati la mɔ kan oxo Yesu se ke tun mɔ: «Kpɔn ɛhwɛ xe kɛɖɛ na ye do na we nɔ, o ɔn gbo oxo ɖe do e wu nɔ wɛɛ?» 5 Vɔ, Yesu ko mɔ ɖo oxo ti e wu, e bo kpaca do Pilati la.Ye ɖɔ oku we ɛhwɛ na Yesu
(Mat 27:15-26; Lwk 23:13-25; Jan 18:39-19:16)
6 Vɔ, na ye ka gbɛ ɖu Vivayi we oxwe nɔ, Pilati nɔ ɖe ogantɔ ɖokpo xena ye byɔ tɔn-ɛ. 7 Vɔ dahwe ɖe xena ye nɔ yɔ tun Balabasi, bo o le ogankpamɛ, kpodo ogu fɔntɔye, ɖo ye hu ɛmɛ le ogu finfɔn hwenu. 8 Ɛmɛ susu va Pilati kɔn, bo jɛ onu xena e o nɔ wasi na ye, bibyɔ ji. 9 Pilati ɖo e wu na ye tun mɔ: «Mi jlo tun ma jo Jwifuye we xɔlu la do na mi wɛɛ?» 10 Ɖo, e kpɔn-ɛ nɔ ganji tun, do ɛwu hwihwan wu bɛ ovɔsantɔ ɖaxoye bo sɔ-ɛ sɔ va jo ni-i na. 11 Ovɔsantɔ ɖaxoye bo do ɛmɛ laye nɔ, ni a do ɖe ogan na Balabasi na ye a bo hɛn Yesu wu. 12 Pilati mɔ yi oxo ke, bo lɔ tun mɔ: «Ɛlɛ ko na wa na ɛmɛ xena mi lo yɔ nɔ tun Jwifuye we xɔlu?» 13 Ye mɔ do axwa ke bo tun mɔ: «Kan-ɛ do otinsoga ji!» 14 Pilati lɔ na ye tun mɔ: «Onu nyanyla ŋukɔ lɛ e gbɛ wasi?» Ye mɔ do axwa do e ji taŋu tun mɔ: «Kan-ɛ!» 15 A do jɛŋu na ɛmɛ laye, Pilati ɖe ogan na Balabasi, e mɛ godo, e na na sɔjaye xo Yesu kpodo lamba, e bo sɔ-ɛ sɔ do alɔ mɛ na sɔja laye, ye ba do kan-ɛ.
Sɔjaye ko Yesu
(Mat 27:27-31; Jan 19:2-3)
16 Sɔjaye kplɔ Yesu do yi otoga la we oxwegbe, bo yɔ sɔja gbokpwe zɛtɛye sɔ kpli. 17 Ye do awu ɖaxo ovɛa ni-i, bo sɔ xɔlugba xena ye sɔ ɛŋuja do wasi, sɔ cɔn do ota ni-i. 18 Ye jɛ asikpɛ xixo do ota ni-i ji, bo lɔ nɔ tun mɔ: «Mí do ogbe na we, Jwifuye we xɔlu!» 19 Ye sɔ otin ɖe bo do xo ota ni-i nɔ, bo tun otan do e wu nɔ, a bo jɛ klita le akɔn mɛ ni-i, a bo do onu odo ni-i. 20 Xena ye ko-e vɔ, ye ɖe awu ovɛ la le e wu, bo sɔ onudido etɔnye sɔ ni-i, bo dɔn-ɛ sɔn nɔ, a do va yi kan-ɛ.
Ye kan Yesu do otinsoga ji
(Mat 27:32-44; Lwk 23:26-43; Jan 19:17-27)
21 Dahwe ɖe xeni lɛ kɔ sɔn nugyo, bo nɔ nyi Simɔ, bo nyi otɔ na Alɛsandru kpodo Hlufwisi, e bo nyi Silɛnu we kansinmɛtɔ, gbɔn blɛ la va yi nɔ, ye zin e ji ni a do hɛn otinsoga gban Yesutɔn la. 22 Mi wɛ ye kplɔ Yesu do yi ofi xena ye nɔ yɔ tun Gɔlugota, e gɔnmɛ wɛ nyi «Takya we tɛnxo.» 23 Ye ni-i vɛn xena ye ca kpodo milub, vɔ, Yesu bo gbɛ. 24 Ye kan-ɛ do otinsoga ji, bo wasi ovoɖiɖe do ma onudido etɔnye, a do nyɔ akpa xena ɛmɛ ɖokpo-ɖokpo na yi. 25 Ogan ɛcɛnnɛ wɛ xo nɔ na ye do kan-ɛ. 26 Onu winwlan xeni lɔ onu xeni dɔn na ye do gbo okuhwɛ ni-i xɛn: «Jwifuye we xɔlu». 27 Ye kan jaguda owe do aha ni-i, ɖokpo le aɖusi mɛ, ɖokpo bo le amyɔ mɛ. [ 28 Mɔsinha wɛ onu xena Winwlan Kinkwɛn la lɔ, cɛ ɖo, e lɔ tun mɔ: «Ye xlɛ-ɛ do onu nyanylawatɔye mɛ»]c
29 Ɛmɛ xeye ni va yi nɔ ye, bo zun-i nɔ, bo drɛn onu tɔ-ɛ nɔ, bo lɔ ni-i nɔ tun mɔ: «Hoo na we! Myɔ hɛn lɔ tun he bo na hɔ Mawu we oxwe la, a bo trɔ gbá-ɛ le onyihinhɔn atɔn gblamɛ wɛɛ? 30 Hwlɛn ɖiwe gan, a bo jɛ ote le otinsoga la ji!» 31 Mɔsinha ke, Mawu we ovɔsantɔ ɖaxoye can kpodo osɛnkplan-ɛmɛtɔye, lo ko-e nɔ bo lɔ na yenɔniɔye nɔ tun mɔ: «E hwlɛn ɛmɛ gbokpweye gan, e ɔn kpewu na hwlɛn emyɔ ŋutɔ gan wɛɛ. 32 Klisu la, Izrayɛli we xɔlu la, ni jɛ ote le otinsoga ji, na mí a kpɔn, a bo kan do e ji!» Ɛmɛ xeye na ye kan do aha ni-i ye can bo zun-i nɔ.
Yesu ku
(Mat 27:45-56; Lwk 23:44-49; Jan 19:28-30)
33 Le ogan weve mɛ, vuvlu do le nyixɔ la ji seŋu gbɔɔn do yi ogan atɔn mɛ. 34 Le ogan atɔn mɛ la, Yesu do axwa sinsyɛnxu ɖe, bo tun mɔ: «Eloyi, Eloyi, lama sabatani» e gɔnmɛ wɛ nyi tun mɔ: «Mawu tɛye, Mawu tɛye, ɛlɛ jɔ o do jo-o do?» 35 Xena ɛmɛ xeye ni le blɛ we ɖeye se axwadido etɔn, ye lɔ tun mɔ: «Mi kpɔn, e lo yɔ Eli nɔ.» 36 Ɛmɛ ɖokpo le ye mɛ, bo do odun, bo va yi sɔ otu ɖe sɔ nylɔ do vɛn hwihwan mɛ, bo trɛ-ɛ do otin wu, bo drɛn-ɛ ɖodan Yesu, na ni a nu, e bo lɔ tun mɔ: «Mi nɔ ote, mí a kpɔn tun Eli la na va ɖe-e tɛ le otinsoga la ji jaa!» 37 Vɔ, Yesu do axwa sinsyɛnxu ɖe, bo myɔ onu.
38 Avɔ ɖaxo xeni le Mawu we oxwe la gbe bo ma ɖo owe sɔn jigbe gbɔɔn bo va yi odo. 39 Xena sɔjaga xeni le ŋukɔn ni-i la kpɔn lena e ku ɖo, e lɔ tun mɔ: «Dahwe xe, Mawuvyɛ wɛ e nyi saa oxojɔxo!» 40 Nyɔnusiye can le dindyɔnnu bo do kpɔn onu nɔ. Ɛmɛ xeye ni le ye mɛ ye, we ɖeye xɛn: Malya Madalatɔn, Salomɛ, kpodo Malya xeni nyi Jaki hwanjavi la onɔ bo mɔ nyi Joze onɔ. 41 Nyɔnu mɛ laye nɔ kplɔ Yesu do saa, bo nɔ sɔ odan ni-i le hwexenu na e le Galile we kansinmɛ. Nyɔnu susu buye can xeni kplɔ-ɛ do do yi Jeluzalɛmu ye, bo le blɛ.
Jozɛfu ɖi Yesu we ocɔ
(Mat 27:57-61; Lwk 23:50-56; Jan 19:38-42)
42 Xena hwedo do, e bo mɔ nyi jijlaɖozangbe, e gɔnmɛ wɛ nyi Jwifuye we gbɔjwɛzan drɔgbe, 43 Jozɛfu, Alimate we toxomɛtɔ, xeni nyi ɛmɛ ŋukunsin le e ji ɖe le ɛhwɛɖɔtɔ ɖaxoye mɛ, va, emyɔ can bo lo tre kpɔn Mawu we Xɔluɖuɖu nɔ. E doji, bo yi Pilati kɔn, bo do va yi byɔ Yesu we ocɔ. 44 Vɔ, e kpaca do Pilati tun Yesu bo o ku. Pilati na na ye yɔ sɔjaga la do va, e bo kan-ɛ se tun Yesu ku e dɛn wɛ jaa. 45 Xena sɔjaga la ɖo e wu ni-i vɔ, Pilati la ɖe omɔ na Jozɛfu tun ni boo va yi kɔ ocɔ la. 46 Jozɛfu va yi xɔ avɔ ɖe, bo ɖe ocɔ la jɛ ote le otinsoga la ji, bo butu-i do avɔ la mɛ, bo ɖi-i do yɔgun xena ye ta do ɛkpɛn ɖaxo ɖe mɛ, bo bli ɛkpɛn ɖaxo ɖe do yɔgun la nu. 47 Malya Madalatɔn kpodo Malya xeni nyi Joze we onɔ, bo kpɔn ofi xena ye sɔ Yesu we ocɔ sɔ ɖo.