Yesu do olo do oglelɛtɔ danuwatɔye wu
(Mat 21:33-46; Lwk 20:9-19)
12
1 E mɛ godo Yesu jɛ olo dido na ye ji, bo lɔ tun mɔ: «Dahwe ɖe do vɛntinye do ogle etɔn mɛ, bo do okpa lɛdo-e, bo kun ogun xe mɛ na e na fyɔn hlɛzɛn le la, bo gba oxɔ xe mɛ na oglecɔtɔ na nɔ. E mɛ godo, e sɔ na kpama na oglelɛtɔ ɖeye, bo sɔn yi omɔ ji. 2 Xena sinsyɛn laye we gbingbɛn we ganmɛ va su, e dɔn odansɔvi ɖe ɖodan oglelɛtɔ laye kɔn, na ye a do ni-i sinsyɛn xeye ni nyi axɔtu etɔn. 3 Oglelɛtɔ laye wle odansɔvi la, bo xo-e, bo nya-ɛ alɔ toto. 4 E mɔ dɔn odansɔvi bu ɖodan, ye wo ota na emyɔ, bo zun-i. 5 E mɔ dɔn odansɔvi atɔngɔ ɖodan, ye hu-i. E mɔ dɔn buye ɖodan gbagbagba, ye xo ɖeye, bo hu ɖeye. 6 Ovyɛ ŋusunglo ɖokpo gee xena e yi owan na, jan wɛ drɔn. E sɔ-ɛ sɔ ɖodan ye le vivɔnu, bo lɔ nɔ tun mɔ: “Ye na ɖo sisi na ovi ŋusunglo tɛye.” 7 Vɔ, oglelɛtɔ laye lɔ na yenɔniɔye tun mɔ: “Ɛɛn hɛn, ovi xeni ka va sɔ cinɔ la nɔ mɛ, mi va, mí a hu-i, cinɔ la ba do nyi míatɔn.” 8 Ye wle-e, bo hu-i, bo dɔn-ɛ tɔn le ogle la mɛ. 9 Fifi ɖe, ɛlɛ vɛngletɔ la na wa na ye? E na hu oglelɛtɔ laye seŋu, a bo sɔ ogle la sɔ na kpama na ɛmɛ buye. 10 Mi ɔn xlɛ oxo xe la ni le Winwlan Kinkwɛn la mɛ wɛɛ? Ye wlan tun mɔ: “Ɛkpɛn xena oxɔwatɔye gbɛ, Mi wɛ va trɔ zun azwe ji we ɛkpɛn. 11 Xwetɔ la we odanwiwa mɛ. Onu kpaca ɛmɛ wɛ e nyi le ŋumɛ na míye!”» 12 Ye kan nɔ na wle-e, vɔ, ye bo vɔ ɛmɛ susu laye nɔ, ɖo ye se e gɔnmɛ tun heye wu bɛ Yesu bo do olo mɛ la do. Ye lɛ le e kɔn bo sɔn.Ye sɔ takwɛ we oxo do ɖo omɔ na Yesu
(Mat 22:15-22; Lwk 20:20-26)
13 Ye dɔn Falizitɔ ɖeye kpodo ɛmɛ xeye ni le Elodu we ogbɛ mɛ ɖeye ɖodan Yesu, ye ba do na na ni a flɛ jɛ omɔ mɛ dogbɔn oxo lilɔ etɔn mɛ. 14 Ɛmɛ mɛ laye va kan oxo-e se tun mɔ: «Onukplan-ɛmɛtɔ, mí nyɔ-ɛ tun o nɔ lɔ oxojɔxo, bo nɔ kplan onu ɛmɛ do omɔ jijwɛ ji, o ko nɔ vɔ ɛmɛ ɖe, o ko nɔ nɔ ɛmɛ ɖe ji, vɔ, o nɔ kplan onu ɛmɛ do Mawu we omɔ la wu le oxojɔxo mɛ. Osɛn míatɔn ɖe omɔ na mí tun míye boo tu takwɛ na Seza? Mí ɖo na tu wɛɛ, alo mí ɔn tu nɔ?» 15 Xena Yesu kpɔn onu jɛ ɛyɛmɛnu wiwa yetɔn wu, e lɔ na ye tun mɔ: «Ɛlɛ jɔ mi do ɖo omɔ na-a nɔ? Mi sɔ ohogan ɖe va na-a, na ma kpɔn.» 16 Ye bo sɔ ɖokpo do va, Yesu kan ye se tun mɔ: «Oyɛ kpodo nyikɔ onutɔn lɛ le e ji?» Ye bo ɖo e wu tun mɔ: «Sezatɔn wɛ.» 17 Mi wɛ Yesu lɔ na ye tun mɔ: «Mi sɔ onu xeni nyi Sezatɔn a sɔ na Seza, a bo sɔ onu xeni nyi Mawutɔn a sɔ na Mawu.» Oxo ɖo oxo wu etɔn, kpaca do ye taŋu.
Sadusitɔye kan oxo Yesu se do finfɔn sɔn oku wu
(Mat 22:23-33; Lwk 20:27-38)
18 Sadusitɔye va Yesu kɔn. Yee wɛ nɔ lɔ nɔ tun finfɔn sɔn oku bo ɔn le. Ye kan-ɛ se tun mɔ: 19 «Onukplan-ɛmɛtɔ, Osɛn xena Mɔyizi wlan na mí xɛn: “Na ɛmɛ ɖe ɖo nyɔnu, e ko ji ovi ti, bo ku, vɔ, nɔvyɛ ŋusunglo xeni jɔ do ɛtɛ ni-i bo le, nɔvyɛ la na sɔ nyɔnu la sɔ ɖe a bo do ji ovi na ɛmɛ xeni ku la.” 20 Fifi, nɔvi ŋusunglo acowe ɖeye nɔ onyi kpɔn. Tantyantɔn ɖe nyɔnu, bo ku ovi ma ji. 21 Nɔvyɛ ŋusunglo owegɔ va sɔ nyɔnu la do sɔ okpo, bo ku ovi ma ji, ɛmɛ atɔngɔ can bo va sɔ-ɛ do sɔ okpo, 22 mɔsinha wɛ ye ɛmɛ acowe laye seŋu ɖe nyɔnu la, ɖe kplɔ ɖe do, bo ku ovi ma ji. Le ye ɛmɛ zɛtɛye we oku godo, nyɔnu mɛ la can va ku. 23 Le finfɔn sɔn oku we azan gbe, hwexenu na ye ɛmɛ zɛtɛye na fɔn sɔn oku, onutɔn lɛ na nyi nyɔnu la le ye mɛ? Ɖo, ye ɛmɛ acowe laye, ɖe-e bo do ɖo nyɔnu.» 24 Yesu ɖo e wu na ye tun mɔ: «Mi lo blɛ miaɖe ɖu nɔ; mi nyɔ onu xeni dɔn? Mi kpɔn, mi ɔn nyɔ Winwlan Kinkwɛn laye gbɔɔn do nyɔ Mawu we hɔnhlɔn can. 25 Le finfɔn sɔn oku hwenu, ɛgbɛtɔye ɔn mɔ ɖe osu nɔ gbɔɔn do ɖe nyɔnu nɔ, ye na le ɖi Mawu we ɛwɛndotɔ xeye ni le jiŋukunsinye ha. 26 Xeni nyi ɛmɛ kukuye na fɔn sɔn oku tɔn, mi ɔn xlɛ Mɔyizi we winwlan xeni lɔ oxo do klili xeni le ozo mɛ vɔ e ko bi nɔ la wu wɛɛ? Ye nɔ xlɛ le e mɛ tun Mawu lɔ na Mɔyizi tun mɔ: “Ko nyi Mawu Ablaxamutɔn, Mawu Izakitɔn kpodo Mawu Jakɔbutɔn.” 27 Vɔ, Mawu ɔn nyi ɛmɛ kukuye we Mawu, ɛmɛ le ɛgbɛye we Mawu wɛ e nyi. Ofɛn ɖaxo ɖe mɛ mi lo wasi nɔ.»
Yesu lɔ oxo do osɛn xeye ni hugan osɛn zɛtɛye wu
(Mat 22:34-40; Lwk 10:25-28; 20:39-40)
28 Osɛnkplan-ɛmɛtɔ ɖe se lena ye lɔ oxo ɖo. E bo kpɔn tun Yesu bo ɖo oxo wu na Sadusitɔye ganji. E tɛkpɔ-ɛ bo kan-ɛ se tun mɔ: «Osɛn ŋukɔ lɛ nyi tantyan le osɛn zɛtɛye mɛ?» 29 Yesu ɖo e wu tun mɔ: «Tantyan la wɛ nyi: “Izrayɛli, ɖo oto, Xwetɔ Mawu míatɔn wɛ nyi Xwetɔ ɖokpo gee, 30 o na yi owan na Xwetɔ Mawu tɔwe kpodo oji tɔwe blebu, okla tɔwe blebu, ayixa tɔwe blebu, kpodo hɔnhlɔn tɔwe seŋu.” 31 Owegɔ la xɛn: “O na yi owan na hawetɔ ɖi myɔ ŋutɔ ha”. Osɛn ti ɔn le bo hugan e mɛ laye.» 32 Osɛnkplan-ɛmɛtɔ la lɔ ni-i tun mɔ: «E nyɔhwyan ganji, onukplan-ɛmɛtɔ, o lɔ oxojɔxo. Mawu ɖokpo gee wɛ le, Mawu bu ti ɔn mɔ le zɛgbɔn emyɔ la wu. 33 Mi wɛ, a yi owan ni-i kpodo oji ɛmɛ tɔn blebu, kpodo zinzin ɛmɛ tɔn seŋu, kpodo hɔnhlɔn ɛmɛ tɔn seŋu, a bo mɔ yi owan na ɛmɛ hatɔ ɖi ɛmɛ ŋutɔ ha, e mɛ la nyɔ hugan ovɔsinsan fifyɔ kpodo ovɔsannu zɛtɛye.» 34 Xena Yesu kpɔn tun e lɔ oxo kpodo onunyinywɛ, e lɔ ni-i tun mɔ: «O ɔn dɛn le Mawu we Xɔluɖuɖu la wu.» Ɛmɛ ti ko mɔ xa kan-ɛ oxo ɖe se.
Yesu lɔ oxo do nyikɔ Davidi vyɛ xena ye nɔ yɔ ni-i wu
(Mat 22:41-46; Lwk 20:41-44)
35 Yesu yi oxo bo mɔ jɛ onukpinkplan ɛmɛye ji le Mawu we oxwe la gbe, e bo lɔ tun mɔ: «Naɖe lɛ e nyi ɖo na osɛnkplan-ɛmɛtɔye nɔ do lɔ nɔ tun Davidi vyɛ vɔvɔ jan bɛ Klisu la bo nyi? 36 Gbigbɔ Kinkwɛn lɔ dogbɔn Davidi la ŋutɔ ji tun mɔ:
“Mawu Xwetɔ la lɔ na Xwetɔ tɛye tun:
Xlɔn onyi le aɖusi mɛ na-a,
Gbɔɔn do yi hwexenu na ko na sɔ kɛntɔ tɔweye
Do wasi afɔɖo-ejinu tɔwe.”
37 Davidi la ŋutɔ mɛ yɔ-ɛ nɔ tun Xwetɔ; naɖe e wa do nyi ovyɛ vɔvɔ?» Ɛmɛ susu gbagbagba bo lo ɖo oto oxo etɔn nɔ kpodo jijwɛ.
Yesu tɔ ogbe onukplanvi etɔnye do osɛnkplan-ɛmɛtɔye wu
(Mat 23:1-12; Lwk 20:45-47)
38 Le onukpinkplan etɔn mɛ, e lɔ nɔ tun mɔ: «Mi cɔ miaɖe do osɛnkplan-ɛmɛtɔye wu, ojlo yetɔnye wɛ nɔ nyi tun, ye a ɖi asa nɔ kpodo awu gaga gblɛlɛlɛ le okɔ, ɛmɛye a do ogbe na ye kpodo sisi kpo le dogbaye ji, 39 ye a xlɔn onyi le okpo tantyantɔnye ji le okplityɔn yetɔnye kpodo agɔɖutyɔnye. 40 Ye nɔ yi okposiye we onu xeye na ye ɖo ye seŋu, ganke, ye ba nɔ xo ɛɖɛ nɔ na oganxixo susu, na ɛmɛye a do kpɔn ye. Oto xena Mawu na dɔn na ye, e na syɛnxu taŋu.»
Yesu kanfu nahwe ayanɔ okposi xeni na onu
41 Le Mawu we oxwe la gbe, Yesu xlɔn onyi bo kpan ŋukɔn onuninaɖaka la, bo kpɔn lena ɛmɛ laye lo sɔ onunina yetɔnye sɔ do ɖaka la mɛ nɔ ɖo. Dɔkunnɔ susuye bo sɔ oho susu sɔ do e mɛ nɔ. 42 Nahwe okposi ayanɔ ɖe va, bo sɔ oho owe, xeye ni hwe hugan oho gbokpweye seŋu, sɔ do onuninaɖaka la mɛ. 43 Yesu yɔ onukplanvi etɔnye, bo lɔ na ye tun mɔ: «Ko lo lɔ na mi nɔ le oxojɔxo mɛ, okposi ayanɔ xe, e na onu hugan ɛmɛ gbokpweye seŋu. 44 Ɖo, ɛmɛ zɛtɛye seŋu, oho zandrɔn yetɔnye wu wɛ ye sɔ le bo va na, vɔ, emyɔ, ayaɖuho etɔn la zɛtɛye, xena e na do nɔ ɛgbɛ, wɛ e sɔ va na.»