Yesu lɔ tun ye bo na va gba Mawu we oxwe la
(Mat 24:1-3; Lwk 21:5-7)
13
1 Hwexenu na Yesu lo tɔn le Mawu we oxwe la gbe nɔ, onukplanvi etɔn ɖe lɔ ni-i tun mɔ: «Onukplan-ɛmɛtɔ, kpɔn ɛkpɛn nywɛ-nywɛ mɛ ye, kpodo oxɔ nywɛ-nywɛ mɛ ye!» 2 Yesu lɔ ni-i tun mɔ: «O kpɔn oxɔ ɖaxo-ɖaxo mɛ ye, ɛkpɛn ɖokpo tete ɔn mɔ va nɔ ɛkpɛn ɖe ji nɔ, ye na gba zɛtɛye sesese.»Yesu lɔ oxo do vivɛsise kpodo ofun ɖiɖe xeye ni na va va ye wu
(Mat 24:3-14; Lwk 21:7-24)
3 Yesu xlɔn onyi le olivutin we okpó la ji, bo kpan ŋukɔn Mawu we oxwe la. Piyɛ, Jaki, Jan kpodo Andre kpo ɖoɖyo bo le e kɔn. Ye bo kan-ɛ se tun mɔ: 4 «Hwe ŋukɔ nu lɛ onu mɛ laye na jɔ do? Josi ŋukɔ lɛ na ɖe xlɛ tun onu mɛ laye bo ka jɔ nɔ? Lɔ-ɛ na mí.»
5 Yesu bo jɛ lilɔ na ye ji tun mɔ: «Mi cɔ miaɖe, na ɛmɛ ɖe ni ká va flu mi o. 6 Ɛmɛ susu na va va, a bo sɔ nyikɔ tɛye, ɖokpo-ɖokpo yetɔn ba lɔ nɔ tun mɔ: “Mɔ wɛ nyi Klisu la,” ye na flu ɛmɛ susu. 7 Na mi se tun ahwanye bo jɔ nɔ, bo se tun ahwan bo gbɔn nɔ, ayixa ni ká gbado na mi, ɖo, e mɛ laye ɖo na jɔ, vɔ, ɛgbɛ la ɔn vɔ do blɛ nɔ trololo.» 8 Yesu mɔ lɔ tun mɔ: «Otogun ɖe na fɔn ahwan do ɖe ji, mɔsinha ke, xɔlu ɖe na fɔn ahwan do ɖe ji. Nyixɔ na va hunhun le ofi ɖeye, xovɛ bo na tɔn, e na le ɖi ovi jiji we vivɛsiseye we bibɛmɛ ha. 9 Mi cɔ miaɖe, ɛmɛye na dɔn mi yi ɛhwɛ ŋukɔn le ɛhwɛɖɔxweye, ye na xo mi taŋu le okplityɔn míatɔnye, ye na hɛn mi yi ɛhwɛ ŋukɔn le otogaye kpodo xɔluye kɔn do mɔ wu ye, mi ba do ɖe kunu le ŋukɔn na ye. 10 Ɖo, Ɛwɛn Nywɛ la ɖo na nyi jijla na otogun zɛtɛye seŋu gbɔxwe ɛgbɛ la na vɔ. 11 Na ye wle mi bo ka sɔ mi sɔ va yi do alɔ mɛ na ogaye nɔ, mi ká mɔ lo onu do oxo xena mi na va yi lɔ wu o, vɔ, mi lɔ oxo ɖekpekpe xena ye na sɔ do ayixa mɛ na mi le hwemɛ la nu, ɖo, miye hɛn na lɔ oxo, vɔ, Gbigbɔ Kinkwɛn wɛ. 12 Nɔvi na sa nɔvyɛ na oku, ovitɔ na sa ovyɛ, vikpɛye na fɔn ogu do yetɔye ji, a bo na na ye a hu ye. 13 Ɛmɛ zɛtɛye na gbɛ owan na mi do mɔ wu, vɔ, ɛmɛ xeni na do vivɛnu gbɔɔn do yi vivɔnu, na kpɔn hwlɛngan.»
Yesu lɔ oxo sɔn vivɛsise ɖaxo xeni na va nɔ onyi kpodo titrɔ etɔn wu
(Mat 24:15-25,29-31; Lwk 21:20-24)
14 Yesu mɔ lɔ na ye tun mɔ: «Hwexenu na mi na kpɔn onua xyɔ ɛwu xeni nɔ do vivɔ ɖaxo na ɛmɛ, na va le ofi xena e ɔn ɖo na nɔ (onuxlɛtɔ ni se e gɔnmɛ nywɛɖe) hwemɛnu, ɛmɛ xeye ni na le Yude we kansinmɛ ye, ye ni si yi okpóye we godo; 15 ɛmɛ xeni na le sanŋu takpwe ji, ni ká jɛ ote a do va yi sɔ onu etɔn ɖe le oxɔ mɛ o. 16 Mɔsinha ke, ɛmɛ xeni na le nugyo, ni ká lɛ kɔ a do va yi sɔ awu ɖaxo etɔn o. 17 Babaa na nyɔnusi xeye ni na le gomi ye, kpodo xeye na ovi na mɔ gbɛ nɔ anɔ na nɔ ye, le azan mɛ laye ji! 18 Mi xo ɛɖɛ na ni ká va jɔ le vivɔ hwenu o. 19 Ɖo le azan mɛ laye ji, vivɛsise la na hugan zɛtɛye xeni jɔ sɔn ɛgbɛ la we bibɛmɛ gbɔɔn na Mawu do ɖo onu zɛtɛye gbɔɔn do va jɛ egbe, vivɛsise ti ko mɔ va nɔ onyi ɖo mɔsinha nɔ kpɔn gbeɖe. 20 Na Xwetɔ la ɔn do ɖe azan mɛ laye drɔn wɛ, ɛmɛ ti ɔn kpɔn hlwɛngan nɔ, vɔ, do ɛmɛ xeye na e can do ovo ye wu, e ɖe azan mɛ laye drɔn. 21 Na ɛmɛye va lɔ na mi nɔ le hwemɛ la nu tun mɔ: “Kpɔn! Klisu la le bwɛ! Kpɔn! E le blɛ daan!” Mi ká kan do e ji o. 22 Klisu ojokantɔye kpodo oxolɔɖonyitɔ ojokantɔye na va tɔn, a bo wasi josiye kpodo onu kpaca-ɛmɛye nɔ, e mɛ, na e na do kpewu jɛ e ji wɛ, ye ba do blɛ ɛmɛ cincanye ɖu. 23 Miye, mi kpɔn miaɖe ji, ko o xo okpa na mi do onu zɛtɛye wu.
24 Vɔ, azan mɛ laye gbe, le vivɛsise mɛ la godo, ohwe na do vuvlu, osun ɔn mɔ klɛn nɔ. 25 Sunhweviye na jɛ fiflɛ ji sɔn jiŋukunsin, onu mɛ ye xeni le jiŋukunsin mɛ ye bo na hunhun. 26 Mi wɛ, ye na kpɔn Ɛgbɛtɔ we Ovi la, sunwɔ bo na lɛdo-e, e ba gbɔn nɔ kpodo hɔnhlɔn ɖaxo kpodo gigo. 27 E bo na dɔn ɛwɛndotɔye ɖodan ɛgbɛ la we wɛkɛzo ɛnɛ laye mɛ, a do kpli ɛmɛ xena e can ye sɔn ɛgbɛ la we odo ɖe ji do yi odo bu ji.
Yesu kplan onu ɛmɛye do figitin wu
(Mat 24:32-35; Lwk 21:29-33)
28 Mi yi okplan sɔn figitin wu, na mi kpɔn tun alɔklan etɔnye bo trɔ zun ɛmu, ama etɔnye bo dɔn nɔ, mi nɔ nyɔ-ɛ tun oxweju bo ka bɛ nɔ. 29 Mɔsinha ke, miye can, na mi kpɔn onu mɛ ye va jɔ nɔ, mi nyɔ-ɛ tun Ɛgbɛtɔ we Ovi la bo o tɛkpɔ, bo le ohɔn ji. 30 Le oxojɔxo mɛ, ko lo lɔ na mi nɔ, jijimɛvi egbetɔn xeye ɔn ku nɔ seŋu keŋu gbɔxwe onu mɛ zɛtɛye na jɔ. 31 Jiŋukunsin kpodo nyixɔ kpo na va yi, vɔ, oxo tɛyee ɔn va yi nɔ kpɔn gbeɖe.
Yesu lɔ tun ye boo nɔ ŋuzɔn
(Mat 24:36-44)
32 Vɔ, xeni nyi azan mɛ la alo oganxixo mɛ la tɔn, ɛmɛ ti ɔn nyɔ-ɛ, ɛwɛndotɔ Mawutɔn xeye ni le jiŋukunsin o, Ovi la o, ɛmɛ ti ɔn nyɔ-ɛ zɛgbɔn Mawu Otɔ la ɖokpo gee wu. 33 Mi cɔ miaɖe, mi nɔ ŋuzɔn a bo xo ɛɖɛ, ɖo, mi ɔn nyɔ hwexenu na ogan la na xo. 34 Ye hɛn, ye na jlɛ do dahwe ɖe xeni yi omɔ ji nɔ wu, e jo oxwe etɔn do, bo sɔ ɛcɛ sɔ na odansɔvi etɔnye, bo ɖo odan na ɛmɛ ɖokpo-ɖokpo, e bo ɖo gbeswi oxwecɔtɔ la ji tun ni boo nɔ ŋuzɔn. 35 Mi wɛ dɔn, mi nɔ ŋuzɔn, ɖo, mi ɔn nyɔ hwexenu na oxwetɔ la, na va va o, hwedo wɛ, ozan mima mɛ wɛ, hwexenu na goklo na do atan nɔ wɛ, alo kɛklɛnu wɛ, 36 na ni ká va gbɔn le ajiji mɛ, a bo va kpɔn mi le awlɔn mɛ o. 37 Oxo xena ko lɔ na mi nɔ xe, ɛmɛ zɛtɛye seŋu wɛ ko lɔ-ɛ na nɔ, mi nɔ ŋuzɔn.»