Jakɔbu lɛ le Sicɛmu bo va jɛ Betɛli
35
1 Mawu lɔ na Jakɔbu tun mɔ: «Site, yi Betɛli a bo jɛ oxwe do blɛ. Wasi ovɔsinsan we agba do blɛ la na mɔ Mawu xeni ze do ŋumɛ na we, le hwexenu na o lo si na fofo tɔwe Esawi nɔ.»2 Jakɔbu lɔ na xwedo etɔn kpodo ɛmɛ zɛtɛye xeni le kpo-e ye tun mɔ: «Mi bɛ yɔhwe xeye ni le mia si ye tɛ. Mi sra ɛwu na miaɖe, a bo ɖɔli onudido miatɔnye. 3 Mí na site, a bo sɔn yi Betɛli, ko na wasi ovɔsinsan we agba le blɛ la na Mawu xeni se ɛɖɛ tɛye le hwexenu na ko le vivɛsise mɛ, e bo gɔ alɔ na-a le omɔ ji yiyi tɛye mɛ.» 4 Mi wɛ ye bɛ yɔhwe xeye ni le ye siye kpodo oganvi xeye ni le oto mɛ na ye, sɔ na Jakɔbu. Jakɔbu bo ɖi ye do gunnu na yɔhwetin ɖaxo xeni le Sicɛmu we aha. 5 E mɛ godo, ye sɔn, Mawu do vivɔ ɖaxo ɖe na ɛmɛ xeye ni le toxo xeye ni lɛdo ofi laye mɛ, ɛmɛ ti ko xa jɛ ɛtɛ na Jakɔbu vikpɛye o.
6 Jakɔbu kpodo ɛmɛ xeni kplɔ-ɛ do zɛtɛye, va yi jɛ Luzu le Kana we oto mɛ, ye bo mɔ nɔ yɔ Luzu la tun Betɛli. 7 E wasi ovɔsinsan we agba ɖe do blɛ bo ɖo nyikɔ na ofi la tun Ɛli Betɛlia; ɖo, blɛ la wɛ Mawu ɖe eɖe sɔ xlɛ-ɛ le, le hwexenu na e lo si na fofo etɔn nɔ.
8 Debola, nyɔnu xeni nɔ kpe ŋukunsin do Hlebeka wu sɔn ovii mɛ gbɔɔn, ku, ye bo ɖi-i le Betɛli we aha le gunnu na yɔhwetin ɖaxo xena Jakɔbu yɔ tun avin finfan we yɔhwetin.
9 Xena Jakɔbu gbɔn sɔn Padanu-Alamu, Mawu mɔ ɖe eɖe sɔ xlɛ-ɛ ke, bo do ni-i. 10 Mawu bo lɔ ni-i tun mɔ: «Nyikɔ tɔwe nyi Jakɔbu, vɔ, ye ɔn mɔ yɔ we ɖo mɔsinha nɔ. Nyikɔ tɔwe na nyi Izrayɛli.» Mi wɛ dɔn na nyikɔ etɔn do nyi Izrayɛli. 11 E bo lɔ ni-i tun mɔ: «Mɔ wɛ nyi Mawu hɔnhlɔn zɛtɛyetɔ. Ji do e ji, a bo gbakpe, otogun kpodo otogunye we ogbɛta susu na tɔn sɔn myɔ mɛ. Xɔluye bo na tɔn sɔn jijimɛvi tɔweye mɛ. 12 Oto xena ko sɔ na Ablaxamu kpodo Izaki, ko sɔ na we, jijimɛvi tɔwe xeye ni na jɔ kplɔ we do ye, ko na sɔ oto mɛ la sɔ na ye.»
13 Mawu lɛ le e kɔn, le ofi xena e lɔ oxo ni-i le. 14 Jakɔbu li josido we ɛkpɛn ɖe do ofi xena Mawu lɔ oxo ni-i le la, e bo kɔn vɛn kpodo ami do ɛkpɛn la ji. 15 Jakɔbu bo ɖo nyikɔ na ofi xena Mawu lɔ oxo ni-i le la tun Betɛlib.
Hlacɛli ji Bɛnyaminu, bo ku
16 Ye lɛ le Betɛli bo sɔn nɔ, e bo mɔ drɔn taŋu gbɔxwe ye na jɛ Eflata, hwemɛnu wɛ Hlacɛli ji ovi. Ovi jiji la bo syɛnxu do-e taŋu. 17 Hwexenu na e le ovi jiji we vivɛsise mɛ, nyɔnu doto la lɔ ni-i tun mɔ: «Jikan ni ká mɔ so we, ɖo, o mɔ ji ŋusunglo ke.» 18 E le oku we omɔ ji, mi wɛ hwexenu na e ka myɔ onu nɔ, e ɖo nyikɔ na ovi la tun Bɛnu-Onic, vɔ, ovitɔ la bo ɖo nyikɔ ni-i tun Bɛnyaminud. 19 Hlacɛli ku, ye bo ɖi-i do Eflata we omɔ ji, Eflata la wɛ ye mɔ nɔ yɔ tun Bɛtɛlɛxɛmu. 20 Jakɔbu li josido we ɛkpɛn ɖe do yɔgun etɔn ji. Mi wɛ nyi Hlacɛli we yɔgun we josido we ɛkpɛn, e bo mɔ le gbɔɔn do va jɛ egbe.
21 Izrayɛli jɛ omɔ, bo va yi li avɔva etɔn do Migidalu-Edɛe we godo. 22 Hwexenu na Izrayɛli le kansin mɛ la mɛ, Hlubɛnu va yi ɖo oxo kpo Bilixa, otɔ we zyavi, Izrayɛli bo se oxo mɛ la.
Jakɔbu ji ŋusunglo weve.
23 Leya vikpɛ ŋusungloye xɛn: Hlubɛnu ovitantyan Jakɔbutɔn, Simɛnyɔ, Lewi, Juda, Isaka, Zabulon. 24 Hlacɛli vikpɛ ŋusungloye xɛn: Jozɛfu kpodo Bɛnyaminu. 25 Bilixa, Hlacɛli we odansɔvi nyɔnusi we vikpɛ ŋusungloye xɛn: Dan kpodo Nɛfutali. 26 Zilipa, Leya we odansɔvi nyɔnusi we vikpɛ ŋusungloye xɛn: Gadi kpodo Acɛ. Jakɔbu we vikpɛ ŋusunglo xeye na ye ji ni le Padanu-Alamu we toxo mɛ, ye mɛ.
Jakɔbu gbɔn va otɔ kɔn, e mɛ godo otɔ la bo ku
27 Jakɔbu va yi otɔ Izaki kɔn le Mamule le Kilyati-Aluba we kansin mɛ, xena ye mɔ nɔ yɔ tun Eblɔn. Blɛ la wɛ Ablaxamu o nɔ viɖe saa, Izaki can bo va le blɛ la. 28 Izaki nɔ ɛgbɛ na oxwe sandi ɖokpo ota atrotɔn, 29 bo myɔ onu. E ku, bo sɔn yi dagbwaye kɔn. E hwɛn taŋu, bo nɔ ɛgbɛ dindyɔn. Vikpɛ etɔn ŋusungloye, Esawi kpodo Jakɔbu, bo ɖi-i.