Ye gble kpo Dina, Simɛnyɔ kpodo Lewi bo va yi ɖe ohlɔn
34
1 Dina, nyɔnuvi xena Leya ji na Jakɔbu, tɔn, a do va yi kan oto la mɛ we nyɔnuviye kpɔn. 2 Sicɛmu xeni ovi na oga Hamɔ, Hivi we jijimɛvi, kpɔn-ɛ, bo kplɔ-ɛ, bo va yi ɖo oxo kpo-e, bo gble kpo-e. 3 Sicɛmu we ayixa blebu tɛ do Dina Jakɔbu vyɛ nyɔnuvi la wu, e bo yi owan ni-i, bo jɛ gbagba nɔ na nyɔnuvi la, a do ɖe oji do e wu. 4 Sicɛmu bo va lɔ na otɔ Hamɔ tun mɔ: «Va yi byɔ nyɔnuvi mɛ na-a na ma ɖe-e.» 5 Jakɔbu bo se tun Sicɛmu bo gble kpo heviye nyɔnuvi Dina, vɔ, xena vikpɛ etɔn ŋusungloye le hɔntun kpodo kanlin etɔnye, e bɔ onu gbɔɔn ye bo gbɔn. 6 Hamɔ, Sicɛmu otɔ la, bo va yi Jakɔbu kɔn a do lɔ oxo ni-i. 7 Jakɔbu vikpɛ ŋusunglo laye gbɔn sɔn hɔntun. Xena ye se onu xeni jɔ la, e vɛ na ye, aɖi bo wle ye taŋu, ɖo, Sicɛmu ɖu osu na Izrayɛli we hwɛndo bo do ɖo oxo kpodo Jakɔbu vyɛ nyɔnuvi. Onu mɔsinhatɔn ɔn ɖo na jɔ. 8 Vɔ, Hamɔ bo lɔ na ye tun mɔ: «Ovi tɛye Sicɛmu we ayixa blebu tɛ do nyɔnuvi miatɔn wu taŋu, ko ɖe kuku, mi sɔ-ɛ sɔ ni-i, ni a sɔ ɖe. 9 Mi wasi alɔwiwle we okancica kpo mí. Mi na nɔ sɔ nyɔnuvi miatɔnye na mí, mí ba nɔ ɖe, mi ba nɔ ɖe míatɔnye can. 10 Mi na nɔ míakɔn, oto la na le nuvo na mi. Mi na nɔ nɔ ofi xeni jlo mi, a bo nɔ ɖi asa gbɔn oto la mɛ, a bo jɛ oxwe do e mɛ.»11 Sicɛmu bo lɔ na nyɔnuvi la otɔ kpodo nɔvyɛ ŋusungloye tun mɔ: «Mi wasi dɔmɛnywɛ na-a, onu ɖekpekpe xena mi na byɔ-ɔ, ko na sɔ na mi. 12 Mi byɔ agban kpodo ajɔ susu do si ye, ko na sɔ onu xena mi na byɔ laye, a sɔ na mi, vɔ, mi sɔ nyɔnuvi la na-a na ma sɔ ɖe.» 13 Kpo ɛmɛblɛɖu kpo, Jakɔbu vikpɛ ŋusunglo laye ɖo oxo la wu na Sicɛmu kpodo otɔ Hamɔ, ɖo, Sicɛmu gble kpo yenɔvyɛ nyɔnuvi Dina. 14 Ye bo lɔ na ye tun mɔ: «Oxo xena o lɔ nɔ, mí ɔn kpewu na wasi-i, mí ɔn kpewu na sɔ mía nɔvyɛ nyɔnuvi sɔ na ŋusunglo xeni ɔn gbo ada, ɖo, e na nyi ŋunya na mí. 15 Onu xena mi na wasi, mí ba do yi ogbe na mi, jan wɛ nyi tun mɔ, mi na gbo ada na ŋusunglo miatɔn zɛtɛye, a bo trɔ zun míye ha. 16 E mɛ, mí na sɔ nyɔnuvi míatɔnye sɔ na mi, mi ba ɖe, míye can ba ɖe miatɔnye, mí bo na jɛ oxwe do mia kɔn, mí bo na trɔ zun otogun ɖokpo gee. 17 Vɔ, na mi ɔn yi ogbe na mí, bo gbo ada, be mí na mɔ kplɔ nyɔnuvi míatɔn, a bo sɔn.»
18 Oxo yetɔnye bo jɛ e ji na Hamɔ kpodo ovyɛ Sicɛmu. 19 Hwanjavi la bo wasi onu xena ye lɔ la le madɛn-madɛn mɛ, ɖo, e yi owan na Jakɔbu vyɛ nyɔnuvi la. Ye bo nɔ ɖo sisi na Sicɛmu la sɔ hugan ɛmɛ gbokpweye seŋu le otɔ we oxwegbe. 20 Hamɔ kpodo ovyɛ ŋusunglo Sicɛmu yi toxo yetɔn we agbo mɔnu, bo lɔ oxo la na otovi yetɔnye ɖo lesinha: 21 «Ɛmɛ mɛ ye nyɔ dɔmɛ do mí, ye ni jɛ oxwe do oto míatɔn mɛ, a bo ɖi asa gbɔn e mɛ, oto la ni nɔ nuvo na ye gbaa. Mí na nɔ ɖe nyɔnuvi yetɔnye, a bo sɔ míatɔnye sɔ na ye, ye ba ɖe. 22 Vɔ, gbɔxwe ye na yi ogbe, a bo jɛ oxwe do míakɔn na mí a do trɔ zun otogun ɖokpo gee, ŋusunglo míatɔn zɛtɛye ɖo na gbo ada ɖi lena ye ŋutɔye le ɖo ha. 23 Na mí yi ogbe, ye bo nɔ mía kɔn, kanlin yetɔn zɛtɛye kpodo dɔkun yetɔnye ɔn na trɔ zun míatɔn wɛɛ? Mí a yi ogbe na ye kpoŋu, na ye a nɔ mía kɔn.» 24 Ɛmɛ zɛtɛye xeni tɔn va toxo la we agbo mɔnu ye, bo yi ogbe na Hamɔ kpodo ovyɛ Sicɛmu we oxo, mi wɛ ye gbo ada na ŋusunglo zɛtɛye xeni le toxo la mɛ ye.
25 Onyihinhɔn atɔngɔ gbe etɔn, hwexenu na ŋusunglo laye lo se vivɛ nɔ, Jakɔbu vikpɛ ŋusunglo owe, Simɛnyɔ kpodo Lewi, xeye ni nyi Dina we fofoye, lyɔ, dɛnkpwe yetɔnye ɖokpo-ɖokpo, bo dyɛ toxo la mɛ vivɔ ma ɖo, bo hu ŋusunglo zɛtɛye seŋu. 26 Ye bo hu Hamɔ kpodo ovyɛ Sicɛmu la le dɛnkpwe nu, bo kplɔ Dina le Sicɛmu we oxwegbe, bo sɔn. 27 Jakɔbu vikpɛ ŋusungloye ɖigbe le ɛmɛ xeye na abi le ye wu laye ji, bo bɛ onuye le toxo la mɛ seŋu, ɖo, ye gble kpodo yenɔvyɛ nyɔnuvi. 28 Ye bɛ lɛngbɔ yetɔnye, gbɔgbwɛye, onyiye, osɔkɛtɛ yetɔnye kpodo onu xeni le toxo la mɛ kpodo nugyoye. 29 Ye bɛ dɔkun yetɔn zɛtɛye seŋu, bo bɛ vikpɛ yetɔnye kpodo yesyɛye, bo bɛ onu xeye ni le oxwe gbe ye seŋu.
30 Jakɔbu bo lɔ na Simɛnyɔ kpodo Lewi kpo tun mɔ: «Tagba mɛ mi dɔn va na-a, bo na na na otovi laye, kanatɔye kpodo Fɛlɛzitɔye na gbɛ owan na-a. Ɛmɛ mɛ ye na do ahwan hoo kpan ŋukɔn-ɔ, ɛmɛ ovii ɖe jan bɛ mí nyi, ye na va cɔn-ɔ, mɔ kpodo xwedo tɛye ba crɔn.» 31 Ye bo ɖo e wu ni-i tun mɔ: «Ɛlɛ jɔ ye na do wa onu kpodo mía nɔvyɛ nyɔnuvi ɖi lɛlonɔ ha?»