Jakɔbu kpo Esawi kpo va kpe
33
1 Jakɔbu kɔ okɔ bo na kpɔn kpoŋu, Esawi mɛ gbɔn nɔ kpodo ŋusunglo sandi ɛnɛ. E bo ma vikpɛ laye na Leya, Hlacɛli kpodo nyɔnusi odansɔvi owe laye. 2 E bo sɔ nyɔnusi odansɔvi owe laye kpodo vikpɛ yetɔnye sɔ ɖo ŋukɔn, Leya kpodo vikpɛ etɔnye bo jɛ godo na ye, Hlacɛli kpodo Jozɛfu kpo bo le godo seŋu. 3 Emyɔ ŋutɔ bo jɛ ŋukɔn na ye, bo do onu odo nɔ gbɔɔn bo tɛkpɔ fofo etɔn. Zɔn acowe wɛ e do onu odo. 4 Esawi do odun bo va kpe-e, bo wle-e do akɔn nu, bo kpla asi okɔ ni-i, bo kisi ni-i, ye bo fan avin. 5 Mi wɛ Esawi kɔ okɔ bo kpɔn nyɔnu laye kpodo vikpɛ laye, bo lɔ tun mɔ: «Onu lɛ nyi ɛmɛ xeye ni kplɔ we do mɛ ye?» Jakɔbu bo ɖo e wu tun mɔ: «Vikpɛ xeye na Mawu na mɔ odansɔvi tɔwe dogbɔn dɔmɛnywɛ etɔn mɛ ye wɛ».6 Nyɔnusi odansɔvi laye kpodo vikpɛ yetɔnye tɛkpɔ ye, ye ɛmɛ zɛtɛye bo do onu odo. 7 Leya kpodo vikpɛ etɔnye can bo tɛkpɔ ye, bo do onu odo, Jozɛfu kpodo Hlacɛli can bo tɛkpɔ ye, bo do onu odo. 8 Esawi bo lɔ tun mɔ: «Ɛlɛ o ka sɔ kanlin ɖoɖooɖo xeni va kpe-o mɛ laye do wa nɔ?» Jakɔbu bo ɖo e wu tun mɔ: «A do kpɔn dɔmɛnywɛ sɔn myɔ ɛmɛ ɖaxo tɛye kɔn wɛ.» 9 Esawi bo lɔ tun mɔ: «Nɔvye, onu le siye taŋu, hɛn onu tɔweye wu.» 10 Jakɔbu bo ɖo e wu tun mɔ: «O o! Ko ɖe kuku na we. Na e nyi tun o nyɔ dɔmɛ do-o, yi ajɔ xe le alɔ mɛ na-a, kpɔn na ko kpɔn we le na-a ɖi Mawu wɛ ko kpɔn ha, ɖo, o yi-u nywɛɖe. 11 Ko ɖe kuku, yi ajɔ xena ko hɛn va na we, ɖo, Mawu wasi dɔmɛnywɛ na-a, onu mɔ drɔn le siye taŋu.» Jakɔbu bo zin do e ji taŋu, Esawi bo gbɔjwɛ yi ajɔ la.
12 Mi wɛ Esawi lɔ tun mɔ: «Mí a sɔn, mí a jɛ omɔ, ma jɛ ŋukɔn na we.» 13 Jakɔbu bo ɖo e wu ni-i tun mɔ: «Ɛmɛ ɖaxo tɛye nyɔ-ɛ tun afɔkanmɛ bo ɔn syɛnxu na vikpɛviye o, ko bo mɔ ɖo gbɔgbwɛ kpodo lɛngbɔ kpodo nyibu xeye ni na anɔ ovi nɔ ye. Na mí dɔn ye kpodo zigidi, na onyihinhɔn ɖokpo gee, ye na ku seŋu. 14 Ɛmɛ ɖaxo tɛye, ko ɖe kuku, jɛ ŋukɔn na mɔ odansɔvi tɔwe. Mɔ, ko na zɔn jiji ɖi lena kanlin xeye ni le ŋukɔn na-a laye kpodo vikpɛ laye na zɔn zɔnlin ɖo ha gbɔɔn do va yi jɛ myɔ ɛmɛ ɖaxo tɛye kɔn le Seyi.» 15 Mi wɛ Esawi lɔ tun mɔ: «Ko ɖe kuku, ma jo ɛmɛ xeye ni kplɔ-ɔ do ye we akpa ɖe do kɔn we.» Jakɔbu bo ɖo e wu tun mɔ: «Ɛlɛ ko na do wa? Na ɛmɛ ɖaxo tɛye gbɛ nyɔ dɔmɛ do-o kpoŋu, e o kpe.»
16 Le gbegbe mɛ la ŋutɔ, Esawi mɔ trɔ sɔ omɔ etɔn, a do sɔn yi Seyi. 17 Vɔ, Jakɔbu emyɔ, bo sɔn yi Sukɔtu we oto mɛ. Le blɛ la, e gbá oxwe na emyɔ ŋutɔ, bo wasi okpweye na kanlin etɔnye. Mi wɛ dɔn ye do ɖo nyikɔ na ofi la tun Sukɔtua.
Jakɔbu va jɛ oxwe do Sicɛmu
18 Xena Jakɔbu lɛkɔ sɔn Padanu-Alamu, e gbɔn va Sicɛmu le Kana we oto mɛ, le fifa mɛ. E bo jɛ oxwe do toxo la we ŋukɔn. 19 E bo xɔ nyixɔ xe ji na e wasi avɔva etɔn la do le Hamɔb we jijimɛviye si. Ohogan kanweko wɛ e do xɔ nyixɔ la. 20 E wasi ovɔsinsan we agba ɖe do blɛ la bo yɔ-ɛ tun Ɛli, Izrayɛli we Mawu.