32
1 Laban fɔn le kɛklɛnu dɛɛn, bo kisi na dagboyɔvi etɔnye kpodo vikpɛ etɔn nyɔnusi laye, bo xo fifa we ɛɖɛ na ye, e mɛ godo, e jɛ omɔ bo trɔ sɔn yi ofi xena e sɔn.Jakɔbu wasi jijlaɖo nɔ a do va yi kpe Esawi
2 Jakɔbu mɔ wle omɔ etɔn bo lo sɔn nɔ, mi wɛ Mawu we ɛwɛndotɔye va tɔn le ajiji mɛ. 3 Xena e kpɔn ye, e lɔ tun mɔ: «Mawu we ahwankpa mɛ wɛ nyi bwɛ», e bo ɖo nyikɔ na ofi la tun Maxanayimua.
4 Jakɔbu dɔn ɛwɛndotɔye ɖodan, ye bo jɛ ŋukɔn ni-i, bo yi fofo etɔn Esawi kɔn le Seyi we oto mɛ, le Edɔmu we kansinmɛ. 5 Gbɔxwe ye na sɔn, e na ye ogbeɖiɖe xe: «Oxo xena mi na lɔ na ɛmɛ ɖaxo tɛye Esawi xɛn: “Odansɔvi tɔwe Jakɔbu lɔ tun he bo nɔ Laban kɔn, bo nɔ blɛ la gbɔɔn do va jɛ fifi. 6 He bo ɖo onyiye kpodo osɔkɛtɛye, gbɔgbwɛye kpodo lɛngbɔye, odansɔvi ŋusungloye kpodo nyɔnusiye, mi bɛ he bo sɔ ɛwɛndotɔye ɖodan ɛmɛ ɖaxo hetɛye Esawi kɔn nɔ, a bo do do ɛwɛn xe la ni-i, a bo do kpɔn dɔmɛnywɛ etɔn.”»
7 Ɛwɛndotɔ laye trɔ va Jakɔbu kɔn bo lɔ ni-i tun mɔ: «Mí yi fofo tɔwe Esawi kɔn, fifi, emyɔ can gbɔn nɔ kpodo ŋusunglo sandi ɛnɛ, bo ka va kpe we nɔ.» 8 Vivɔ ɖaxo ɖe jɛ Jakɔbu ji, e bo ɖyɛ onulilo mɛ taŋu. Ɛmɛ xeye ni le e kɔn ye, e ma ye ɖo akpa owe, bo ma gbɔgbwɛ laye kpodo lɛngbɔ laye, onyi laye kpodo osɔkpotɔnɔ laye can ɖo akpa owe. 9 E bo lɔ tun mɔ: «Na Esawi fɔn ahwan do ɖe ji, bo crɔn-ɛ, akpa owegɔ la ba si.» 10 Jakɔbu bo lɔ tun mɔ: «Dagboye Ablaxamu we Mawu, didaye Izaki we Mawu, Xwetɔ Mawu, myɔ wɛ lɔ na-a tun mɔ: “Trɔ sɔn yi oto tɔwe mɛ, le xwedo tɔwe mɛ, na ma wasi onywɛ na we”. 11 Ko hwe diin na dɔmɛnywɛ tɔwe zɛtɛye xena o ɖe xlɛ mɔ odansɔvi tɔwe dogbɔn ogbeji ninɔ tɔwe mɛ, ɖo, ko ta otɔ xe saa, otinkpo jan bɛ le siye, fifi mɔ xɛn va ɖo ogbɛta owe. 12 Ko ɖe kuku, hwlɛn-ɔ gan le fofo tɛye we alɔ mɛ, le Esawi la we alɔ mɛ, ɖo, ko vɔ nɔ tun e na va hu-u, a bo hu siyee kpodo vikpɛ laye can, dɔŋuɖunu ma kpɔn. 13 Vɔ, myɔ, o bo lɔ na-a tun mɔ: “Ko na wa onywɛ na we, a bo na na jijimɛvi tɔweye na su ɖi ɛxuta we okɔ xena ye ɔn kpewu na xlɛ ha”».
14 Jakɔbu bo hlɔn blɛ la le ozan mɛ. E sɔ onu xeye ni le e si we ɖeye, a do na ajɔ fofo etɔn Esawi. 15 Gbɔgbwɛ sandi owe, ogbɔsu oko, lɛngbɔ sandi owe, agbo oko, 16 osɔkpotɔnɔ osi xeye ni na anɔ ovi nɔ ye, ogban kpodo vikpɛ yetɔnye, onyinɔ kanɖe kpodo onyisu owo, osɔkɛtɛ osi oko kpodo osɔkɛtɛvi owo. 17 E sɔ ye sɔ do alɔ mɛ na odansɔvi etɔnye, bo ma ye ɖo vwevwe, bo lɔ na ye tun mɔ: «Mi jɛ ŋukɔn na-a, a bo na na tɛnxo a nɔ kanlin laye mɛ.» 18 E bo lɔ oxo xe na odansɔvi tantyantɔn: «Hwexenu na fofo tɛye Esawi na kpe we a bo kan we se tun mɔ: “Onutɔn lɛ o nyi? Bɔ lɛ o yi nɔ? Onutɔn lɛ nyi kanlin xeye ni le ŋukɔn na we mɛ ye?” 19 O na ɖo e wu tun mɔ: “Odansɔvi tɔwe Jakɔbutɔn wɛ. E sɔ onunina xe sɔ ɖodan ɛmɛ ɖaxo tɛye Esawi nɔ, emyɔ ŋutɔ le godo na mí bo lo gbɔn nɔ.”» 20 Jakɔbu bo mɔ lɔ oxo ɖokpo ŋumyɔ laye na odansɔvi owegɔ, atɔngɔ kpodo ɛmɛ zɛtɛye xeni jɛ ɛtɛ na kanlin laye. Bo lɔ tun mɔ: «Oxo xena mi na lɔ na Esawi mɛ, le hwexenu na mi na kpɔn-ɛ. 21 Mi ba lɔ ni-i tun mɔ: “Odansɔvi tɔwe Jakɔbu can le godo na mí, bo lo gbɔn nɔ.”» Ɖo, Jakɔbu lo lɔ nɔ tun mɔ: «Ko na fa oji ni-i kpodo onunina xeye ni jɛ ŋukɔn na-a nɔ mɛ ye, e mɛ godo, mɔ ŋutɔ ba va tɔn le ŋumɛ ni-i, tanyɔ e kɛ na yi-u nywɛɖe ma.» 22 Onunina laye bo jɛ ŋukɔn ni-i, emyɔ ŋutɔ bo ci ofi xena ye jɛ agban do la le ozan mɛ la mɛ.
Mawu ɖɔli nyikɔ na Jakɔbu
23 E site le ozan mɛ la mɛ, bo kplɔ osyɛ owe laye, odansɔvi nyɔnusi owe laye, kpodo vikpɛ weɖokpo etɔnye, bo na na ye ta Yabɔku we otɔ la. 24 E kplɔ ye, bo na na ye ta otɔ la, kpodo onu xeni ɖo zɛtɛye. 25 Jakɔbu ɖokpo bo ci blɛ la. Mi wɛ dahwe ɖe xo ɛvun kpo-e gbɔɔn do va yi jɛ kɛklɛnu fuu. 26 Xena dahwe la kpɔn tun he bo ɔn kpewu na ɖu le e ji, e xo onu alin mɛ ni-i, Jakɔbu we alin bo klan le hwexenu na ye lo xo ɛvun la nɔ. 27 E bo lɔ ni-i tun mɔ: «Jo-o do ma sɔn, ɖo onyi hɔn.» Jakɔbu bo ɖo e wu tun mɔ: «Na o ɔn do na-a, ko ɔn jo we do nɔ.» 28 Dahwe la bo kan-ɛ se tun mɔ: «Naɖe o nɔ nyi?» E bo ɖo e wu tun «Jakɔbu.» 29 Dahwe la bo lɔ ni-i tun mɔ: «Ye ɔn mɔ yɔ we nɔ tun Jakɔbu o, vɔ, ye na yɔ we tun Izrayɛli, ɖo, o xo ɛvun kpodo Mawu kpodo ɛgbɛtɔye, o bo ɖu oji.» 30 Jakɔbu bo kan-ɛ se tun mɔ: «Ko ɖe kuku, na ɖe ye nɔ yɔ we?» E bo lɔ ni-i tun, ɛlɛ jɔ o do kan nyikɔ tɛye se nɔ? E bo do ni-i le blɛ.
31 Jakɔbu bo ɖo nyikɔ na ofi la tun Peniyɛlib, ɖo, e lɔ tun mɔ: «Mɔ kpodo Mawu kpe ŋumɛ, e bo jo-o do ɛgbɛ.» 32 Hwexenu na ohwe lo site nɔ, wɛ Jakɔbu ta Peniyɛli we otɔ. Jakɔbu bo zɔn alin ji nɔ. 33 Mi wɛ dɔn gbɔɔn do va jɛ egbe, Izrayɛli vikpɛye ɔn nɔ ɖu lanti xeni nɔ nɔ alin mɛ na kanlinye, ɖo, ye xo onu alin mɛ na Jakɔbu do lanti ji.