Jakɔbu lɛ le Laban kɔn
31
1 E se tun Laban vikpɛye ŋusungloye bo lɔ nɔ tun mɔ: «Jakɔbu yi míatɔ we onuye seŋu, míatɔ we onu ye mɛ wɛ dɔkunnu etɔn zɛtɛye tɔn sɔn.» 2 Jakɔbu bo kpɔn tun Laban bo ɔn mɔ nɔ sɔ ŋukunsin nywɛ do kpɔn he ɖi saatɔn ha. 3 Mi wɛ, Xwetɔ Mawu lɔ na Jakɔbu tun mɔ: «Trɔ sɔn yi dagboweye we oto mɛ, le xwedo tɔwe mɛ, ko bo na le kpo we.»4 Jakɔbu bo dɔn ɛmɛ, ye bo yɔ Hlacɛli kpodo Leya va hɔntun, le ofi xena e le gbɔgbwɛ kpodo lɛngbɔ etɔnye kɔn le. 5 E bo lɔ na ye tun mɔ: «Ko kpɔn tun ŋumɛ na míatɔ ɖo do kpɔn-ɔ nɔ, ɔn mɔ le ɖi saatɔn ha, vɔ, didaye we Mawu bo le kpo-o. 6 Mi nyɔ-ɛ tun ko wa odan na míatɔ kpodo hɔnhlɔn tɛyee seŋu, 7 ganke míatɔ bo zan-a, e ɖɔli axɔtu tɛyee zɔn owoa blebu, vɔ, Mawu ɔn jo-e do na e wa onu nyanyla ɖe kpo-o. 8 Na e lɔ tun kanlin xeye na goto ci toba-toba na ye, bɛ bo na nyi axɔtu tɛye, kanlin zɛtɛye nɔ ji ovi xeye na goto le toba-toba na ye. Na e mɔ lɔ tun kanlin xeye na ɛhwɛkan le goto na ye, bɛ bo na nyi axɔtu tɛye, kanlin zɛtɛye nɔ ji ovi xeye na ɛhwɛkan le goto na ye. 9 Mawu yi míatɔ we kanlinye le e si bo sɔ na-a. 10 Le azan xeye mɛ na kanlin laye nɔ do ava yenɔniɔye le, ko ku odrɔ, ko bo kɔ okɔ, bo kpɔn tun agbo xeye ni nɔ do ava nɔ laye, ɖo ɛhwɛkan, goto bo le toba-toba na ye, ye bo ɖo ŋumɛ vwevwe ye. 11 Mawu we ɛwɛndotɔb bo yɔ-ɔ le odrɔ la mɛ bo lɔ tun mɔ: “Jakɔbu!” Ko bo ɖo e wu tun “Ago”. 12 E bo mɔ lɔ tun mɔ: “Ko ɖe kuku, kɔ okɔ a bo kpɔn, kanlin osu xeye ni ɖo ɛhwɛkan, bo ɖo onu toba-toba, kpodo ŋumɛ vwevwe ye ɖoɖyo wɛ do ava na kanlin osi laye nɔ, ɖo, ko kpɔn onu zɛtɛye xena Laban wa kpo we nɔ. 13 Mɔ wɛ nyi Mawu xena o li josido we ɛkpɛn na, bo kɔn ami do e ji le Betɛli, o bo xo ogbe na-a le blɛ la. Fifi, site, lɛ le oto xe mɛ, a bo trɔ sɔn yi xwedo tɔwe we oto mɛ.”» 14 Hlacɛli kpodo Leya bo ɖo e wu ni-i tun mɔ: «Mí mɔ ɖo onu ɖe alo cinɔ ɖe le míatɔ we oxwegbe wɛɛ? 15 Xena e o sa mí bo ɖu oho míatɔn, jonɔye hɛn e nɔ sɔ mí do kpɔn nɔ wɛɛ? 16 Bɔ do e wu can, dɔkun zɛtɛye xena Mawu yi le míatɔ si, míye kpodo vikpɛ míatɔnye tɔn wɛ e nyi. Fifi, wasi onu zɛtɛye xena Mawu lɔ tun myɔ boo wasi.»
17 Mi wɛ Jakɔbu site bo bɛ vikpɛ etɔnye kpodo osyɛye do osɔkpotɔnɔye ji. 18 E bɛ kanlin etɔn zɛtɛye seŋu kpodo dɔkun zɛtɛye xena e wa odan bo kpɔn, kanlin xeye na e wa odan bo yi le Padanu-Alamu laye, bo jɛ omɔ, a do trɔ sɔn yi otɔ Izaki kɔn le Kana we oto mɛ. 19 Laban bo yi ofun xwlɛ gbe le goto na lɛngbɔ etɔnye, hwemɛnu Hlacɛli bo fin hɛnnu we yɔhwe otɔtɔnye. 20 Jakɔbu zan Laban Alamu we otomɛtɔ la, bo do si sɔn oxo ɖe ma lɔ ni-i. 21 E si bo sɔn kpodo onu xeni ɖo zɛtɛye seŋu. E bo site, bo ta Eflati we otɔ la, bo sɔn yi Galadi we okpóye mɛ.
22 Onyihinhɔn atɔngɔ gbe etɔn, ye va lɔ na Laban tun Jakɔbu bo si sɔn. 23 Laban kplɔ nɔvyɛye do otɛ, ye bo jɛ ɛtɛ na Jakɔbu, bo zɔn zɔnlin na onyihinhɔn acowe, ye bo va yi kpɔn-ɛ le Galadi we okpóye mɛ. 24 Vɔ, le ozan mɛ, Mawu xo odrɔ Laban Alamu we otomɛtɔ la, bo lɔ ni-i tun mɔ: «Kpɔn ɖiwe ji, ká lɔ oxo ti na Jakɔbu.»
25 Laban va yi kpɔn Jakɔbu, e bo ɖo avɔva etɔn le okpó laye mɛ; Laban kpodo nɔvyɛye can bo ɖo avɔva yetɔn do Galadi we okpó laye mɛ. 26 Laban bo kan Jakɔbu se tun mɔ: «Ɛlɛ nyi e mɛ na o do sin? O zan-a, bo kplɔ vikpɛ nyɔnuvi tɛye ɖi ɛmɛ xeye na ye wle le ahwangbeji ha. 27 Ɛlɛ jɔ o do si le ɛyɛ mɛ, bo zan-a? O do lɔ na-a wɛ, jijwɛ kpodo ohan jijiye, kpodo ohun xixo kpodo onuxonu okannɔ xixo mɛ wɛ ko na ɖo we le, o ba sɔn. 28 O ɔn ɖe omɔ na ma kisi na vikpɛ tɛyee kpodo dagboyɔvi tɛyee can. Fifi tɔn xe, o wa onu ɖi oklenɔ ha. 29 Ko ɖo hɔnhlɔn a do wa onu nyanyla kpo mi, vɔ, mia dagbwaye we Mawu lɔ na-a le ozan mɛ tun mɔ: “Kpɔn ɖiwe ji, ká lɔ oxo ti na Jakɔbu o.” 30 Fifi, o sɔn, ɖo, didawe we oxwegbe lo jlo we nɔ taŋu, vɔ, ɛlɛ dɔn na o do fin yɔhwe tɛyee?» 31 Jakɔbu bo lɔ na Laban tun mɔ: «Ko vɔ wɛ dɔn, ko bo lɔ nɔ tun myɔ bo na yi vikpɛ nyɔnusi tɔweye le siye. 32 Vɔ, ɛmɛ xe si na o na kpɔn yɔhwe tɔweye le, ɔn nɔ ɛgbɛ nɔ. Le mía nɔvyɛye we ŋumɛ, glo onu tɛye zɛtɛye kpɔn, na ɖe nyi tɔwe, o ba sɔ-ɛ.» Jakɔbu ko nyɔ-ɛ tun Hlacɛli wɛ fin hɛnnu yɔhwe laye.
33 Laban ɖyɛ Jakɔbu we avɔva mɛ, bo mɔ va yi Leya kpodo nyɔnuvi odansɔvi owe laye tɔn mɛ, e ko kpɔn onu ti. E tɔn le Leya we avɔva mɛ bo ɖyɛ Hlacɛlitɔn mɛ. 34 Hlacɛli bo o sɔ hɛnnu yɔhwe laye sɔ ɖo agɔ na onu xe ji na ye nɔ xlɔn le osɔkpotɔnɔ ji, e bo xlɔn onyi le ye ji. Laban bo kankan avɔva la mɛ seŋu, e ko kpɔn onu ti. 35 Hlacɛli bo lɔ na otɔ tun mɔ: «Didaye ni ká mɔ do aɖi o, ko ci ogbe, mi wɛ dɔn ko ɔn do site le ŋumɛ na we.» Laban kan gbɔɔn, e ɔn kpɔn hɛnnu yɔhwe laye o. 36 Aɖi wle Jakɔbu taŋu, e bo bɛ ojlɛ do Laban ji, bo lɔ tun mɔ: «Ɛlɛ ko wa, ɛhwɛ ŋukɔ lɛ ko hu, na o do jɛ ɛtɛ na-a kpo zigidi kpo? 37 Xena o kankan agban tɛye zɛtɛye mɛ ɖe, o kpɔn oxwe tɔwe gbe we onu ɖe? Sɔ xlɛ-ɔ le bwɛ le nɔvyee kpodo nɔvweyee we ŋumɛ, na ye a gbo ɛhwɛ la na mí ɛmɛ owe laye. 38 Oxwe oko xɛn ko le kɔn we, gomi ɔn flɛ do lɛngbɔ tɔweye kpodo gbɔgbwɛ tɔweye kpɔn, ko ko ɖu ogbɔsu xeye ni le kanlin tɔwe mɛ ye kpɔn. 39 Na olanwlenu vunvun kanlin tɔwe ɖe, ko ɔn nɔ ɖiɖa-ɛ va na we o, mɔ ŋutɔ wɛ e nɔ ci okɔ na. Na ye fin ɖe do-o le oklo alo ozan, o nɔ byɔ-ɔ. 40 Le oklo, ohwe wɛ nɔ ɖu-u taŋu, le ozan mɛ, vivɔ wɛ nɔ ci-u taŋu, awlɔn bo nɔ bu do-o. 41 Oxwe oko xɛn ko wasi le oxwe tɔwe gbe, ko wa odan na we na oxwe wenɛ do vikpɛ nyɔnusi owe tɔweye wu, bo wasi oxwe ɛdɛn do kpɔn gbɔgbwɛ kpodo lɛngbɔ tɔweye ji, vɔ, zɔn owo blebu wɛ o ɖɔli axɔtu tɛye. 42 Na Mawu didaye Izakitɔn, Mawu Ablaxamutɔn, Mawu xena Izaki la nɔ ɖo vivɔ na taŋu, ɔn do kpedo wu ye wɛ, be asigba alɔgba wɛ o na jo-o do na ko na do sɔn. Vɔ, Mawu kpɔn lena ko ɖu aya ɖo, kpodo odan sinsyɛnxu xena ko wasi, e bo gbo ɛhwɛ la swɛ zan mɛ.» 43 Laban bo ɖo e wu na Jakɔbu tun mɔ: «Nyɔnusi mɛ ye vikpɛ tɛyee wɛ ye nyi, vikpɛ mɛ ye bo nyi dagboyɔvi tɛyee, gbɔgbwɛ kpodo lɛngbɔ mɛ ye bo nyi kanlin tɛyee, onu zɛtɛye xena o kpɔn nɔ mɛ ye, bo nyi tɛye. Egbe fifi, ɛlɛ ko na wa kpo vikpɛ nyɔnusi tɛyee kpodo vikpɛ xeye na ye ji ye? 44 Fifi, va, na mí a wasi okancica mɔ kpo myɔ kpo, e ba nyi kunuɖiɖe le bwɛ le mɔ kpodo myɔ kpo domɛ.»
45 Mi wɛ Jakɔbu sɔ ɛkpɛn ɖe, bo li-i do ote, e ba nyi josidonu. 46 Jakɔbu bo lɔ na nɔvyɛye tun ye boo bɛ ɛkpɛnye do va, ye bo bɛ ɛkpɛnye bo to ye do ote. Ye bo ɖu onu le blɛ le ɛkpɛn tito laye ji. 47 Laban ɖo nyikɔ na ofi la tun Yega Saxaduta, vɔ, Jakɔbu bo ɖo nyikɔ ni-i tun Galɛdi. 48 Laban bo lɔ tun mɔ: «Egbe, ɛkpɛn tito xe wɛ nyi kunuɖiɖe le mɔ kpo myɔ kpo mɛ.» Mi wɛ dɔn ye nɔ do yɔ ofi la tun Galɛdic. 49 Ye bo mɔ yɔ ofi la tun Misipad, ɖo Laban lɔ tun mɔ: «Xwetɔ Mawu ni cɔ myɔ kpo mɔ kpo, le hwexenu na mí ɔn mɔ kpɔn míanɔniɔye nɔ. 50 Na o do aya na vikpɛ nyɔnusi tɛyee, na o mɔ va yi ɖe nyɔnu buye do ye ji, nyɔ-ɛ tun, na ɛmɛ ɖe ɔn mɔ do le kpo mí can, Mawu wɛ nyi kunuɖetɔ le mía domɛ.»
51 Laban bo lɔ na Jakɔbu tun mɔ: «Kpɔn ɛkpɛn tito mɛ kpodo josidido we ɛkpɛn mɛ xena ko sɔ ɖo ote le mɔ kpo myɔ kpo mɛ. 52 Ɛkpɛn tito la kpodo josidido we ɛkpɛn la, nyi kunuɖiɖe. Mɔ ko fyan ajɔgbe tun ko ɔn data ɛkpɛn tito mɛ la nɔ a do mlɛ kɔn we, a bo do va wa onu nyanyla ɖe kpo we nɔ, myɔ can bo fyan ajɔgbe nɔ tun he bo ɔn data ɛkpɛn tito mɛ la kpodo josidido we ɛkpɛn la nɔ, a do mlɛ kɔn ye, a bo do va wa onu nyanyla ɖe nɔ. 53 Mawu Ablaxamutɔn kpodo Mawu Nawɔtɔn ni nyi kojoɖotɔ le mía mɛ.»