30
1 Xena Hlacɛli kpɔn tun he bo ɔn ji ovi na Jakɔbu nɔ, e bɛ ɛwu hwihwan do dada etɔn wu. E bo lɔ na Jakɔbu tun mɔ: «Na-a ovi, e ɔn nyi mɔ, ko na ku!» 2 Aɖi wle Jakɔbu do Hlacɛli wu, e bo lɔ tun mɔ: «Mɔ wɛ nyi Mawu xeni tɛ we ovi?» 3 Hlacɛli bo lɔ tun mɔ: «Kpɔn nyɔnuvi odansɔvi tɛye Bilixa xɛn; va yi nɔ kpo-e, ni a ji ovi do ataa ji na-a, dogbɔn emyɔ ji, mɔ can ba ɖo ovi ŋusunglo ɖokpo.» 4 E bo sɔ nyɔnuvi odansɔvi etɔn Bilixa sɔ do ɖo nyɔnu na Jakɔbu, e bo nɔ kpo-e.5 Bilixa yi gomi bo ji ŋusunglovi ɖokpo na Jakɔbu. 6 Hlacɛli bo lɔ tun mɔ: «Mawu yi ɛhwɛ na-a, bo se ɛɖɛ tɛye, bo na-a ŋusunglovi ɖokpo.» Mi wɛ dɔn, e ɖo nyikɔ ni-i tun Danb.
7 Bilixa, Hlacɛli we odansɔvi nyɔnuvi, mɔ yi gomi, bo ji ŋusunglovi owegɔ na Jakɔbu. 8 Hlacɛli bo lɔ tun mɔ: «Ko xo ɛvun sinsyɛnxuc ɖe kpodo dada tɛye, ko bo ɖu oji.» E bo ɖo nyikɔ ni-i tun Nɛfutalid.
9 Xena Leya kpɔn tun he bo ɖo ovi jiji te gbɔxwe, e sɔ nyɔnuvi odansɔvi etɔn Zilipa sɔ do ɖo nyɔnu na Jakɔbu. 10 Zilipa, Leya we odansɔvi nyɔnuvi, ji ŋusunglo ɖokpo na Jakɔbu. 11 Leya bo lɔ tun, ko ɖo tanywɛ, e bo ɖo nyikɔ ni-i tun Gadie.
12 Leya we odansɔvi Zilipa mɔ ji ŋusunglovi owegɔ na Jakɔbu. 13 Leya bo lɔ tun: «Onu nyɔ na-a ke! Ɛɛn, nyɔnusiye na nɔ yɔ-ɔ tun nyɔnanɔ», e bo ɖo nyikɔ ni-i tun Acɛf.
14 Gbeɖokpo, Hlubɛnu yi nugyo le ɛjinukun ɖiɖe hwenu, bo kpɔn owang yiyi we otinkun, bo hɛn do gbɔn na onɔ Leya. Mi wɛ Hlacɛli lɔ na Leya tun mɔ: «Ko ɖe kuku, na-a ovi tɔwe we owan yiyi we otinkun.» 15 Leya bo ɖo e wu ni-i tun mɔ: «Suye na o yi, ɔn kpe we wɛɛ? O na mɔ yi ovi tɛye we owan yiyi we otinkun do e ji?» Hlacɛli bo lɔ ni-i tun mɔ: «E nyɔ, do ovi tɔwe we owan yiyi we otinkun wu, suwe la na nɔ kpo we le egbe zan mɛ.»
16 Hwedo, Jakɔbu gbɔn nɔ sɔn nugyo, mi wɛ Leya tɔn bo va yi kpe-e, bo lɔ ni-i tun mɔ: «Mɔ wɛ o na nɔ kpo egbe, ɖo, ko sɔ ovi tɛye we owan yiyi we otinkun sɔ na do e nu.» Jakɔbu bo nɔ kpo-e le ozan mɛ la mɛ. 17 Mawu ɖo Leya we ɛɖɛ wu, e yi gomi bo ji ŋusunglovi atungɔ na Jakɔbu. 18 Leya bo lɔ tun mɔ: «Mawu tu axɔ tɛye na-a, mɔ xeni sɔ nyɔnuvi odansɔvi tɛye sɔ na suye.» E bo ɖo nyikɔ ni-i tun Isakah.
19 Leya mɔ yi gomi ke bo ji ŋusunglovi ɛdɛngɔ na Jakɔbu. 20 Leya bo lɔ tun mɔ: «Mawu na-a ajɔ nywɛ ɖe, fifi, suye na do bubu wu ye, ko ji ovi ŋusunglo ɛdɛn ni-i.» E bo ɖo nyikɔ ni-i tun Zabulɔni. 21 E mɛ godo, e bo va ji nyɔnuvi ɖokpo, bo ɖo nyikɔ ni-i tun Dina.
22 Mawu bo ɖoŋudo Hlacɛli wu, bo ɖo ɛɖɛ etɔn wu, bo hun ajidɔ ni-i. 23 E yi gomi bo ji ŋusunglovi ɖokpo, bo lɔ tun mɔ: «Mawu ɖe ŋunya na-a.» 24 E bo ɖo nyikɔ ni-i tun Jozɛfuj, bo lɔ tun mɔ: «Xwetɔ Mawu ni mɔ sɔ ovi bu sɔ kpe-e na-a!»
Jakɔbu jɛ dɔkun le Laban kɔn
25 Xena Hlacɛli ji Jozɛfu we godo, Jakɔbu lɔ na Laban tun mɔ: «Ɖe omɔ na-a, na ma sɔn yi oxwe, le oto tɛye mɛ. 26 Sɔ siye xeye ni dɔn na ko do wa odan na we ye, kpodo vikpɛ tɛyee sɔ na-a, na ma sɔn, ɖo, myɔ ŋutɔ o nyɔ-ɛ tun ko wa odan na we nywɛɖe.» 27 Laban bo lɔ ni-i tun mɔ: «Ko ɖe kuku, ɖe dɔmɛnywɛ sɔ xlɛ-ɔ. Ye kpɔn olu na-a, bo lɔ tun myɔ bɛ bo dɔn na Xwetɔ Mawu bo do do na-a. 28 Lɔ axɔtu xena ko na nɔ tu we na-a, ko bo na tu-i na we.» 29 Jakɔbu bo lɔ ni-i tun mɔ: «Myɔ ŋutɔ, o nyɔ lena ko wa odan na we nywɛɖe ɖo, kpodo lena kanlin tɔweye va su ɖo, do mɔ wu ye. 30 Ɖo, ovii xeni le siwe saa gbɔxwe ko do va, va ji do e ji taŋu, Xwetɔ Mawu bo do na we bɛ sɔn hwexenu na ko do afɔ oxwe tɔwe gbe. Fifi ɖe, gbe nu gbe lɛ mɔ can ko na va wa odan na xwedo tɛye?» 31 Laban bo lɔ tun mɔ: «Ɛlɛ ko na na we?» Jakɔbu bo ɖo e wu tun mɔ: «O ɔn tu axɔ ti na-a nɔ, na oyi ogbe na oxo xena ko na lɔ na we, ko na mɔ trɔ bɛ gbɔgbwɛ kpodo lɛngbɔ tɔweye kpikplɔ, a bo kpe ŋukunsin do ye wu. 32 Egbe, ko na gbɔn gbɔgbwɛ kpodo lɛngbɔ tɔweye mɛ seŋu, a bo ɖe lɛngbɔvi ɖekpekpe xena ɛhwɛkan le e wu, kpodo xena goto le toba-toba na, kpodo lɛngbɔvi owi ɖekpekpe, do ovo, a bo mɔ ɖe gbɔgbwɛ ɖekpekpe xena goto le toba-toba na, kpodo xena ɛhwɛkan le e wu, do ovo. E mɛ la wɛ na nyi axɔtu tɛye. 33 Oxo xena ko lɔ nɔ wɛ na va ɖe kunu na-a le swɛ godo. E nyi tun o va glo axɔtu tɛye kpɔn, bo kpɔn gbɔgbwɛ alo lɛngbɔ ɖekpekpe xeni ɔn ɖo ɛhwɛkan alo onu toba-toba do goto alo gbɔgbwɛ owi ɖe wɛ o kpɔn, be ɛfin mɛ ko fin do we.» 34 Laban bo lɔ tun mɔ: «E nyɔ, ni nɔ lena o lɔ ɖo.»
35 Gbegbe mɛ la ŋutɔ, Laban ɖe agbo xeye ni ɖo ɛhwɛkan kpodo onu toba-toba ye do ovo, bo mɔ ɖe gbɔgbwɛye xeye na onu toba-toba ɖaxo o, ovii o, le ye wu ye, kpodo xeye na goto le owee na ye, do ovo. E bo mɔ ɖe lɛngbɔ zɛtɛye xeye na goto le owi na ye, do ovo, bo sɔ do alɔ mɛ na vikpɛ etɔn ŋusungloye. 36 E bo ɖe Jakɔbu do ovo le eɖe wu, ye bo dɛn le yenɔniɔye wu na onyihinhɔn atɔn we zɔnlin zinzɔn ha. Jakɔbu bo nɔ kplɔ gbɔgbwɛ kpodo lɛngbɔ gbokpwe Labantɔnye.
37 Jakɔbu gbo otin hamɛ-hamɛ atɔn we aba ɛmuye, bo fle akpa gbɔn ofi ɖeye le goto na ye, bo do ɖe ɛhwɛkan owee xeni le goto na ye sɔ xlɛ. 38 E bo to otinba xeye na e fle goto na laye do onu xe mɛ na kanlin laye nɔ va yi nu ɛsin le, le ofi xena kanlin laye nɔ kpɔn, ɖo, na ye va nu ɛsin nɔ, ye nɔ do ava na yenɔniɔye. 39 Otinba laye bo nɔ le ŋukɔn na kanlin laye le hwexenu na ye nɔ do ava na yenɔniɔye nɔ, ye bo nɔ ji ovi xeye ni ɖo ɛhwɛkanye kpodo xeye na onu toba-toba le goto na ye. 40 Gbɔgbwɛ xeye na Jakɔbu ɖe do ovo ye, e sɔ ye sɔ kpan ŋukɔn Laban we kanlin xeye ni ɖo ɛhwɛkanye kpodo xeye ni wi ye.
E wasi mɔsinha, bo ɖo ogbɔkpo etɔn do ovo, e ko na na ye caka kpodo Laban we gbɔgbwɛ kpodo lɛngbɔye o.
41 Ogan ɖekpekpe mɛ na kanlin jɔ asu ye na gbɛ do ava na yenɔniɔye, Jakɔbu nɔ sɔ otinba laye sɔ do onu xe mɛ na kanlin laye nɔ nu ɛsin le, le ofi xena kanlin laye nɔ kpɔn, otinba laye bo nɔ le ŋukɔn na ye le hwexenu na ye nɔ do ava na yenɔniɔye nɔ. 42 Na e nyi tun kanlin xeye ni ɖitɔ ye wɛ, e ɔn nɔ ɖo otinba laye, e mɛ, kanlin xeye ni ɖitɔ laye nɔ nyi Labantɔn, xeye ni jɔ asu ye ba nyi Jakɔbu tɔn.
43 Jakɔbu jɛ dɔkun taŋu, e ɖo gbɔgbwɛye kpodo lɛngbɔye gbagbagba, bo ɖo odansɔvi nyɔnusiye kpodo ŋusungloye, bo ɖo osɔkpotɔnɔye kpodo osɔkɛtɛye.