Jakɔbu sɔn yi Laban kɔn
29
1 Jakɔbu mɔ jɛ omɔ bo sɔn yi ɛmɛ xeye ni le hwezɛdo ye we oto mɛ. 2 Mi wɛ, e kpɔn dotwɛ ɖe le gbefaji, ye bo kpli ogbɔye donu vovwe atɔn le aha na dotwɛ la, kanlin laye bo hlɔn onyi, ɖo dotwɛ mɛ la mɛ wɛ ye nɔ dun ɛsin le, na kanlin laye nɔ nu. Vɔ, ɛkpɛn ɖaxo ɖe wɛ ye do tu dotwɛ la. 3 Kanlin zɛtɛye nɔ va kpli le blɛ la, ye ba bli ɛkpɛn ɖaxo la tɛ le dotwɛ la nu, a bo na ɛsin kanlin laye, e mɛ godo, ye ba mɔ bli ɛkpɛn la do tɛnxo etɔn le dotwɛ la nu. 4 Jakɔbu bo kan ogbɔkplɔtɔye se tun mɔ: «Nɔvyee mi, bɔ tɔ lɛ mi nyi?» Ye bo ɖo e wu ni-i tun mɔ: «Alanutɔye wɛ mí nyi.» 5 E bo mɔ kan ye se tun mɔ: «Mi nyɔ Laban Nawɔ we dagboyɔvi?» Ye bo ɖo e wu tun mɔ: «Ɛɛn, mí nyɔ-ɛ.» 6 E bo mɔ kan ye se tun mɔ: «E le nywɛɖe?» Ye bo ɖo e wu tun mɔ: «E le nywɛɖe! Kpɔn ovyɛ Hlacɛli can mɛ kplɔ gbɔgbwɛye kpodo lɛngbɔye gbɔn nɔ.» 7 Jakɔbu bo lɔ tun mɔ: «Mi kpɔn, ohwe mɔ le ote ganji, ogan xe mɛ na mi na kpli kanlinye le hɛn nyi xe, mi na ɛsin gbɔgbwɛ kpodo lɛngbɔ laye, a kplɔ ye do yi amakanmɛ.» 8 Ye bo ɖo e wu tun mɔ: «Mí ɔn kpewu na wasi mɔsinha, gbɔɔn do jɛ hwexenu na kanlin laye seŋu va kpli; mí ba bli ɛkpɛn la tɛ le dotwɛ la nu, a bo na ɛsin gbɔgbwɛ kpodo lɛngbɔ laye.»9 E mɔ gbɛ lɔ oxo kpodo ye nɔ, na Hlacɛli do va kpodo otɔ we gbɔgbwɛ kpo lɛngbɔye. Ɖo, ogbɔkplɔtɔ wɛ Hlacɛli nyi. 10 Xena Jakɔbu kpɔn onylɔ Laban vyɛ Hlacɛli kpodo onylɔ la we gbɔgbwɛ kpo lɛngbɔye, e tɛkpɔ dotwɛ la, bo bli ɛkpɛn la tɛ le dotwɛ la nu, bo na ɛsin we gbɔgbwɛ kpo lɛngbɔ laye. 11 Jakɔbu bo kisi na Hlacɛli, bo bɛ jijwɛ we avin finfan. 12 Jakɔbu bo lɔ na Hlacɛli tun otɔ we ɛmɛ bɛ he bo nyi, bo nyi Hlebeka vyɛ. Hlacɛli bo do odun bo va yi lɔ na otɔ. 13 Xena Laban se nylɔyɔvi etɔn Jakɔbu we nyikɔ, e do odun bo va yi kpe-e, bo xo tɛ-ɛ, bo kisi ni-i, bo kplɔ-ɛ do sɔn yi oxwegbe. Jakɔbu bo to onu xeni jɔ do e ji zɛtɛye na Laban. 14 Laban bo lɔ ni-i tun mɔ: «Le oxojɔxo mɛ, ɛmɛ tɛye wɛ o nyi, ɛhun tɛye xɛn.» Jakɔbu bo nɔ Laban kɔn na osunzan ɖokpo.
Jakɔbu ɖe nyɔnu owe
15 Gbeɖokpo, Laban lɔ na Jakɔbu tun mɔ: «Tɔn na o nyi ɛmɛ tɛye, wɛ dɔn na o na do wa odan na-a vɔvɔ? Lɔ onu xeni na nyi axɔtu tɔwe na-a.»
16 Vɔ, Laban bo ɖo ovi nyɔnuvi owe. Ɛmɛhyɔn la nɔ nyi Leya, vikpɛvi la bo nɔ nyi Hlacɛli. 17 Ŋukunsin cɔa na Leya la, vɔ Hlacɛli bo nyɔ kpinkpɔn taŋu, 18 Jakɔbu bo yi owan na Hlacɛli, mi wɛ e lɔ tun mɔ: «Ko na wa odan na we na oxwe acowe do Hlacɛli ovi tɔwe owegɔ la ta.» 19 Laban bo lɔ tun mɔ: «E nyɔ na-a tun ma sɔ-ɛ sɔ na myɔ, sɔ hugan tun ma sɔ-ɛ sɔ na ŋusunglo bu. Nɔ kɔn ye!»
20 Mi wɛ Jakɔbu wa odan na oxwe acowe do ota na Hlacɛli. Onyihinhɔn viɖe ha wɛ e ɖi le ŋumɛ ni-i, ɖo, e yi owan ni-i taŋu. 21 E mɛ godo, Jakɔbu bo lɔ na Laban tun mɔ: «Sɔ nyɔnu xena ko ka ɖe nɔ sɔ na-a. Odanwiwa we oxwe laye va yi. Ko ka jɛ okpɔ kpo-e nɔ.»
22 Laban kpli oto la mɛ tɔ zɛtɛye, bo ɖu agɔ. 23 Vɔ, xena ozin cɔn, e kplɔ ovyɛ Leya sɔ do oxɔ na Jakɔbu, e bo nɔ kpo-e. 24 Laban bo o sɔ ɛmɛxixɔ nyɔnuvi etɔn Zilipa sɔ na ovyɛ Leya ni a do nyi odansɔvi ni-i. 25 Ŋukɔn ɖe, e na kpɔn, Leya wɛ e va nyi, mi wɛ Jakɔbu kan Laban se tun mɔ: «Ɛlɛ nyi e mɛ na o wa kpo-o? Hlacɛli we ota hɛn ko wa odan na we do wɛɛ? Ɛlɛ jɔ o do blɛ-ɔ ɖu?» 26 Laban bo lɔ ni-i tun mɔ: «Le mía we akɔnu wiwa mɛ le bwɛ, nyɔnuvi vikpɛvi ɔn nɔ ɖe osu jɛ ŋukɔn na ɛmɛhyɔn la. 27 Alɔwiwle we oxwe we kwɛsiɖa la ni vɔ, mí bo na sɔ Hlacɛli la can sɔ na we, vɔ, o ɖo na mɔ wa odan na-a na oxwe acowe bu.» 28 Jakɔbu bo wasi mɔsinha, e vɔ alɔwiwle we oxwe we kwɛsiɖa la, Laban bo sɔ ovyɛ nyɔnuvi Hlacɛli sɔ ni-i, e bo sɔ ɖe. 29 Laban bo sɔ ɛmɛxixɔ nyɔnuvi etɔn Bilixa sɔ na ovyɛ nyɔnuvi Hlacɛli ni a do nyi odansɔvi ni-i. 30 Jakɔbu bo nɔ kpo Hlacɛli can, e bo yi owan na Hlacɛli la sɔ hugan Leya. E bo mɔ wa odan na Laban na oxwe acowe bu ke.
Vikpɛye xeye na Jakɔbu ji ye
31 Xena Xwetɔ Mawu kpɔn tun Jakɔbu bo ɔn yi owan na Leya, e hun ajidɔ ni-i, vɔ, Hlacɛli bo nyi ajikponɔ. 32 Leya yi gomi bo ji ovi ŋusunglo ɖokpo, e bo ɖo nyikɔ ni-i tun Hlubɛnub, ɖo, e lɔ tun mɔ: «Xwetɔ Mawu kpɔn lena ye ɖe-o drɔn ɖo, fifi, suye na yi owan na-a.»
33 E mɔ yi gomi bu, bo mɔ ji ŋusunglovi, e bo lɔ tun mɔ: «Ɛɛn, Xwetɔ Mawu se tun ye bo ɔn yi owan na-a saa, e bo mɔ na-a ovi xe», e bo ɖo nyikɔ ni-i tun Simɛnyɔc.
34 E bo mɔ yi gomi zɔn atɔngɔ, bo mɔ ji ŋusunglovi bu, e bo lɔ tun mɔ: «Fifi tɔn xe, suye na tɛ do wu ye, ɖo, ko ji ŋusunglo atɔn kpetyo ni-i.» Jakɔbu bo ɖo nyikɔ na ovi la tun Lewid.
35 E mɔ yi gomi bu, bo mɔ ji ŋusunglovi ke, e bo lɔ tun mɔ: «Fifi, ko na kanfu Xwetɔ Mawu!» Mi wɛ dɔn, e ɖo nyikɔ ni-i tun Judae.
E bo ɖo ovi jiji te gbɔxwe.