28
1 Mi wɛ Izaki yɔ Jakɔbu, bo xo fifa we ɛɖɛ ni-i, bo ni-i ogbeɖiɖe xe: «Ká ɖe nyɔnu le nyɔnuvi Kanatɔye mɛ o. 2 Site! Yi Padanu-Alamu le nawe we otɔ Betwɛli we oxwegbe, va yi ɖe blɛ la we nyɔnu ɖokpo, le nylɔwe Laban we vikpɛ nyɔnuviye mɛ. 3 Mawu hɔnhlɔn zɛtɛyetɔ ni do na we, a bo na, na ji do e ji, a bo gba okun, a bo trɔ zun dagbo-dagbo na otogun susu. 4 Ni sɔ Ablaxamu we dona sɔ na we, myɔ kpodo jijimɛvi tɔweye, e mɛ, oto xe mɛ na o nyi jonɔ le xe, xena Mawu sɔ na Ablaxamu, ba do nyi tɔwe.» 5 Izaki sɔ Jakɔbu sɔ ɖodan, e bo sɔn yi Padanu-Alamu le Laban kɔn. Laban bo nyi Betwɛli Alamu we otomɛtɔ vyɛ, bo nyi fofo na Hlebeka xeni nyi Jakɔbu kpodo Esawi onɔ.6 Esawi kpɔn tun Izaki bo xo fifa we ɛɖɛ na Jakɔbu, bo sɔ-ɛ sɔ ɖodan Padanu-Alamu ni a do va yi ɖe blɛ la we nyɔnu, mi wɛ hwexenu na e xo fifa we ɛɖɛ ni-i nɔ, e bo do osɛn ni-i tun ni boo ká ɖe nyɔnu le nyɔnuvi Kanatɔye mɛ o. 7 Mi wɛ Jakɔbu se tonu na otɔ kpodo onɔ, bo sɔn yi Padanu-Alamu. 8 Esawi kpɔn onu jɛ e wu tun nyɔnuvi Kanatɔye we onu bo ɔn jɛ e ji na otɔ Izaki. 9 Mi wɛ, e sɔn yi Isimayɛli Ablaxamu vyɛ kɔn, bo ɖe Isimayɛli vyɛ Mahalatu sɔ kpe nyɔnu xeye ni o le e si ye, Mahalatu la we fofo bo nɔ nyi Nɛbayɔtu.
Mawu ɖe onu sɔ xlɛ Jakɔbu le odrɔ mɛ
10 Jakɔbu lɛ le Bɛ-Ceba bo sɔn yi Alanu. 11 E va yi jɛ ofi ɖe le omɔ la ji, bo dɔ blɛ la, ɖo ozin cɔn. E sɔ ɛkpɛn xeye ni le ofi la ye we ɖokpo, bo do ɖo okɔɖonu, bo hlɔn onyi le blɛ la. 12 E ku odrɔ ɖe. Mi wɛ e kpɔn hwɛntin ɖe le ote le nyixɔ ji, onu etɔn bo tɔ jiŋukunsin, e bo kpɔn Mawu we ɛwɛndotɔye lo xɛ e ji do yi jigbe nɔ bo mɔ lo jɛ ote nɔ. 13 Mi wɛ Xwetɔ Mawu nɔ ote le aha ni-i, bo lɔ tun mɔ: «Mɔ wɛ nyi Xwetɔ Mawu, Mawu dagbowe Ablaxamutɔn, Mawu Izakitɔn. Nyixɔ xe ji na o hlɔn onyi le xe, ko na sɔ na myɔ kpodo jijimɛvi tɔweye. 14 Jijimɛvi tɔweye na su ɖi okɔ ha. Ye na gbakpe gbɔn hweyixɔ, hwezɛdo, otagbe kpodo afɔgbe. Hwɛndo zɛtɛye xeni le nyixɔ la ji ye, na kpɔn dona dogbɔn myɔ kpodo jijimɛvi tɔweye ji. 15 Kpɔn, ko le kpo we, ko na cɔ we le ofi ɖekpekpe xena o na yi, a bo kplɔ we gbɔn-ɛ va nyixɔ xe ji, ɖo, ko ɔn jo we do nɔ, gbɔɔn do yi hwexenu na ko na wasi onu xena ko lo lɔ na we nɔ.»
16 Xena Jakɔbu fɔn sɔn awlɔn mɛ, e lɔ tun mɔ: «Ko kan do e ji tun Xwetɔ Mawu bo le bwɛ, vɔ, ko ko nyɔ-ɛ saa.» 17 Vivɔ ɖo-e, e bo lɔ tun mɔ: «Bwɛ xe la do vivɔ ke! Ko kan do e ji tun Mawu we oxwegbe wɛ, e bo mɔ nyi jiŋukunsin we agbo.» 18 Jakɔbu bo fɔn le kɛklɛnu dɛɛn, bo sɔ ɛkpɛn xena e sɔ ɖo okɔgbe la, bo li-i, bo do ɖo josi ofi la, bo kɔn ami do ota ni-i. 19 E bo ɖo nyikɔ na ofi la tun Betɛlia, vɔ, ye boo nɔ yɔ toxo la tun Luzu le saa. 20 Jakɔbu bo fyan ajɔgbe xe, bo lɔ tun mɔ: «Na Mawu le kpo-o, bo cɔ-ɔ le omɔ xe ji na ko le bo lo sɔn nɔ, na e na-a onu ko bo ɖu, bo na-a awu ko bo do, 21 na ko trɔ gbɔn va didaye we oxwegbe le fifa mɛ, be, Xwetɔ Mawu wɛ na nyi Mawu tɛye. 22 Ɛkpɛn xena ko li ɖi josidonu ha xe, na nyi Mawu we oxwegbe, mi wɛ onu ɖekpekpe xena e na na-a, ko na ni-i maɖowo etɔn.»