Jakɔbu yi Esawi we dona
27
1 Izaki o ku nyɔxo, agbɔ bo kpe ŋukunsin etɔnye gbɔɔn e ko mɔ kpɔn onu nɔ. Mi wɛ e yɔ ovi tantyan etɔn Esawi, bo lɔ ni-i tun mɔ: «Ovi tɛye!» E bo ɖo e wu ni-i tun: «Ago! Didaye, mɔ xɛn». 2 Izaki, bo mɔ yi oxo bo lɔ tun mɔ: «Kpɔn, ko ku nyɔxo, ko ko nyɔ okuzangbe tɛye. 3 Fifi, ko ɖe kuku, sɔ ogbenyanu tɔweye, ogbekpo tɔwe la kpodo oda tɔwe la, yi hɔntun, a bo va yi hu olan ɖe va na-a. 4 O ba va ɖa onuɖuɖu adodwe ɖe na-a ɖi lena ko nɔ yi owan na ɖo ha, o ba sɔ-ɛ va na-a, ko ba ɖu-i, mɔ ŋutɔ ba xo fifa we ɛɖɛ na we, gbɔxwe a ku.»5 Vɔ, hwexenu na Izaki lo lɔ oxo na ovyɛ Esawi nɔ, Hlebeka se oxo la nɔ. E mɛ godo, Esawi sɔn yi hɔntun, a do va yi nya ogbe, a bo hu olan do va. 6 Hlebeka bo lɔ na ovyɛ Jakɔbu tun mɔ: «Kpɔn, ko se didawe lɔ oxo na fofo tɔwe Esawi nɔ, e lɔ ni-i tun mɔ: 7 “Hu olan va na-a, a bo ɖa onuɖuɖu adodwe va na-a, na ma ɖu. Ko ba xo fifa we ɛɖɛ na we le Xwetɔ Mawu we ŋukɔn gbɔxwe a ku.” 8 Fifi, ovi tɛye, se ogbe tɛye, a bo wasi onu xena ko na dɔn we. 9 Ko ɖe kuku, yi ogbɔkpwe mɛ, a bo wle gbɔgbwɛvi owe xeye ni wa ɖaŋu do olan ye, do va, na ma ɖa onuɖuɖu adodwe ɖe na didawe ɖi lena e nɔ yi owan na ɖo ha. 10 O ba sɔ-ɛ sɔ va yi na didawe, e ba ɖu, a bo xo fifa we ɛɖɛ na we, gbɔxwe a ku.»
11 Jakɔbu bo ɖo e wu na onɔ Hlebeka tun mɔ: «E nyɔ, vɔ, ofun kɛɖɛ wɛ gɔ goto na fofo tɛye Esawi, mɔ ko ko ɖo. 12 Tanyɔ, didaye na va si alɔ gbɔn wu ye, ko bo na nyi ɛmɛblɛɖutɔ le ŋumɛ ni-i, ko bo na dɔn nudo va ɖiye ji, e ko mɔ nyi dona nɔ.» 13 Onɔ bo lɔ ni-i tun mɔ: «Ovi tɛye, nudo tɔwe ni jɛ ji ye! Se ogbe tɛye kpoŋu, a bo va yi sɔ onu xena ko lɔ na we va na-a.»
14 Jakɔbu va yi sɔ gbɔgbwɛvi laye va na onɔ, onɔ la bo ɖa onuɖuɖu adodwe na otɔ ɖi lena e nɔ yi owan na ɖo ha. 15 E mɛ godo, Hlebeka bo sɔ ovi tantyan etɔn Esawi we onudidoye, onudido nywɛ-nywɛ xeye ni le e kɔn le oxwegbe ye, bo sɔ do na ovi owegɔ etɔn Jakɔbu. 16 E bo sɔ gbɔgbwɛvi laye we agbaza bo sɔ cɔn alɔye kpodo ofi xeni mɛ le okɔmɛ ni-i ye. 17 E bo sɔ onuɖuɖu adodwe la kpodo kpɔnnɔ xena e jla ɖo la, sɔ do alɔ mɛ na ovyɛ Jakɔbu. 18 Mi wɛ, e yi otɔ kɔn, bo lɔ ni-i tun mɔ: «Didaye!» Izaki bo lɔ tun mɔ: «Mɔ xɛn, ovi tɛye ŋukɔ lɛ la?» 19 Jakɔbu bo ɖo e wu na otɔ tun mɔ: «Mɔ wɛ nyi Esawi ovi tantyan tɔwe, ko wasi onu xena o lɔ na-a. Ko ɖe kuku, site, a bo xlɔn onyi, a bo ɖu ogbemɛlan tɛye, na myɔ ŋutɔ, a xo fifa we ɛɖɛ na-a.» 20 Izaki bo lɔ na ovyɛ tun mɔ: «Ovi tɛye, o mɔ yawu kpɔn olan la ke!» Jakɔbu bo ɖo e wu tun mɔ: «Xwetɔ Mawu, Mawu tɔwe, wɛ kplɔ olan la va ŋukɔn na-a.»
21 Izaki bo lɔ na Jakɔbu tun mɔ: «Ko ɖe kuku, tɛkpɔ-ɔ ganji, ovi tɛye, na ma si alɔ gbɔn wu we. Myɔ jan wɛ nyi ovi tɛye Esawi la doo? Alo myɔ hɛn?» 22 Jakɔbu bo tɛkpɔ otɔ Izaki, e bo si alɔ gbɔn e wu, bo lɔ tun mɔ: «Ogbe la nyi Jakɔbu we ogbe, vɔ, alɔ laye bo nyi Esawi we alɔye.» 23 E ɔn do josi-i, ɖo, ofun le alɔ etɔnye wu ɖi fofo etɔn Esawitɔnye ha, vɔ, gbɔxwe e na xo fifa we ɛɖɛ la ni-i, 24 e kan-ɛ se tun mɔ: «Myɔ jan wɛ nyi ovi tɛye Esawi la?» Jakɔbu bo ɖo e wu tun mɔ: «Ɛɛn».
25 Izaki bo tun lɔ mɔ: «Sɔ onuɖuɖu la na-a, na ma ɖu ovi tɛye we ogbemɛlan, na mɔ ŋutɔ a xo fifa we ɛɖɛ na we.» Jakɔbu bo sɔ-ɛ ni-i, e bo ɖu. E bo sɔ vɛn can va ni-i, e bo nu. 26 Mi wɛ otɔ Izaki lɔ ni-i tun mɔ: «Ovi tɛye, ko ɖe kuku, tɛkpɔ-ɔ, a bo kisi na-a.» 27 E bo tɛkpɔ-ɛ, bo kisi ni-i. Izaki bo se onudido etɔnye we owan, e bo xo fifa we ɛɖɛ ni-i, bo lɔ tun mɔ: «Ovi tɛye we owan le ɖi ogle xena Xwetɔ Mawu do na we owan ha.
28 Mawu ni na na ahun a ja do nyixɔ tɔweye ji sɔn jiŋukunsin
Ni na we nyixɔ xe ji na ɛji na jɛ le taŋu
Ni na we ɛjinukun kpodo vɛn susu gbagbagba.
29 Otogunye ni sɔ odan na we,
Otoviye ni nɔ do onu odo le ŋukɔn na myɔ kpodo jijimɛvi tɔweye!
Nyi oga na nɔvweye,
Nawe vikpɛye ni do onu odo le ŋukɔn na we!
Nudo ni jɛ ɛmɛ xeni na do onu we ji,
Donanɔ wɛ na nyi ɛmɛ xeni na xo fifa we ɛɖɛ na we.»
30 Izaki bo xo fifa we ɛɖɛ na Jakɔbu vɔ, emyɔ can bo lɛ le otɔ Izaki la kɔn pɛɛ kpoŋu, fofo etɔn Esawi bo gbɔn sɔn ogbe nya gbe. 31 Emyɔ can bo ɖa onuɖuɖu adodwe bo sɔ va na otɔ, bo lɔ ni-i tun mɔ: «Didaye ni site, a bo ɖu mɔ ovi tɔwe we ogbemɛlan, e mɛ, myɔ ŋutɔ ba xo fifa we ɛɖɛ na-a.» 32 Otɔ Izaki bo kan-ɛ se tun mɔ: «Myɔ onu lɛ?» E bo ɖo e wu tun mɔ: «Mɔ Esawi ovi tantyan tɔwe wɛ.»
33 Izaki bo titɔ nɔ titeŋugbetɔn, bo lɔ tun mɔ: «Onu lɛ va yi nya ogbe bo hɛn olan va na-a hɛn? Ko o ɖu onu zɛtɛye gbɔxwe o va. Ko xo fifa we ɛɖɛ na ɛmɛ la, e bo na nyi donanɔ!»
34 Xena Esawi se otɔ we oxoye, e do axwa sinsyɛnxu ɖe kpodo vivɛsise taŋu, bo lɔ na otɔ tun mɔ: «Didaye, xo fifa we ɛɖɛ mɔ can!» 35 Mi wɛ e ɖo e wu tun mɔ: «Nɔvwe va kpodo ɛmɛblɛɖu, bo yi dona tɔwe.» 36 Esawi bo lɔ tun mɔ: «Nyikɔ etɔn Jakɔbua la ɖi e wu oxojɔxo, mi wɛ dɔn, e blɛ-ɔ ɖu zɔn owe blebu. E o yi ovi tantyan we ɛcɛ tɛye saa, fifi, e mɔ yi dona tɛye.» Esawi bo kan se tun mɔ: «O ɔn drɔn dona ɖe na-a wɛɛ?» 37 Izaki yi oxo bo lɔ na Esawi tun mɔ: «Kpɔn, ko sɔ-ɛ sɔ wasi oga tɔwe, ko bo sɔ nɔvyɛ zɛtɛye do wasi odansɔvi etɔnye. Ko ni-i ɛjinukun kpodo vɛn. Ovi tɛye, ɛlɛ ko na kpewu wasi na we fifi?» 38 Esawi bo ɖo e wu na otɔ tun mɔ: «Dona ɖokpo gee mɛ la jan wɛ o ɖo, didaye? Xo fifa we ɛɖɛ na-a, na mɔ can!» Esawi bo fan avin nɔ hɛhɛhɛ. 39 Mi wɛ, otɔ Izaki lɔ ni-i tun mɔ: «Kpɔn!
Nɔtyɔn tɔwe na le dindyɔnnu na nyixɔ xeye ji na ɛji na nɔ jɛ le ye
Ahun ti ɔn ja sɔn jiŋukunsin bo kɔn do nɔtyɔn tɔwe nɔ o
40 Dogbɔn ahwan wiwa mɛ wɛ o na nɔ ɛgbɛ le,
O na nyi odansɔvi na nɔvwe,
Vɔ, dogbɔn ogu finfɔnb tɔwe mɛ, o na gba okɔnugban etɔn le jiwe.»
Hlebeka lɔ na Jakɔbu tun ni boo si
41 Esawi bo do okɛn Jakɔbu do dona xena e yi sɔn otɔ kɔn wu. E bo lɔ le ayixa etɔn mɛ nɔ tun mɔ: «Lutu mɛ ninɔ na didaye we azan o lo tɛkpɔ nɔ, e mɛ godo, ko na hu nɔvye Jakɔbu.» 42 Oxo xena ovi tantyan Hlebekatɔn Esawi lɔ, ye va to-e ni-i. Mi wɛ, e dɔn ɛmɛ, ye bo yɔ Jakɔbu, ovi owegɔ etɔn la, do va, e bo lɔ ni-i tun mɔ: «Kpɔn, fofo tɔwe ka ɖe ohlɔn nɔ, a bo hu we. 43 Fifi, ovi tɛye, ɖo oto-o, site, a bo si sɔn yi fofo tɛye Laban kɔn le Alanu. 44 O ba nɔ e kɔn na azan viɖe, gbɔɔn do yi hwexenu na fofo tɔwe we aɖi na fa do. 45 Hwexenu na fofo tɔwe na jo aɖi xena e do do we nɔ la do vɔ, e ba wɔn onu xena o wa kpo-e, ko na dɔn ɛmɛ, ye bo na va kplɔ we gbɔn sɔn blɛ la. Ɛlɛ jɔ na mi ɛmɛ owe laye na do ku do-o le gbeɖokpoc?»
46 Hlebeka lɔ na Izaki tun mɔ: «Ɛgbɛ la ti okɔ na-a do viyesi Hɛti we jijimɛvi mɛ ye wu. Na Jakɔbu can mɔ va yi ɖe Hɛti we jijimɛvi ɖe, le oto xe we nyɔnuviye mɛ, ɖi e mɛ ye ha, ɛlɛ ko na mɔ le ɛgbɛ na?»