Izaki va yi jɛ oxwe do xɔlu Abimɛlɛki we oto mɛ
26
1 Xovɛ ɖe va tɔn le oto la mɛ, e bo gbɔn ovo na xovɛ tantyan xeni tɔn le Ablaxamu we hwenu, mi wɛ, Izaki sɔn yi Gela le Abimɛlɛki Filisitɔye we xɔlu kɔn. 2 Xwetɔ Mawu bo ze do ŋumɛ ni-i, bo lɔ ni-i tun mɔ: «Ká mɔ yi Ejiputi o, vɔ, oto xe we oxo na ko na lɔ na we, mɛ wɛ o na nɔ. 3 Nɔ oto xe la mɛ viɖe, ko bo na le kpo we, a bo do na we. Ɖo, myɔ kpodo jijimɛvi tɔweye wɛ ko na sɔ oto mɛ zɛtɛye sɔ na. Ko na wasi do ajɔgbe xena ko fyan na didawe Ablaxamu ji. 4 Ko na na na jijimɛvi tɔweye na su ɖi jiŋukunsin we sunhweviye ha; ko na sɔ oto mɛ zɛtɛye sɔ na jijimɛvi tɔweye, otogun zɛtɛye xeni le nyixɔ la ji, bo na kpɔn dona gbɔn jijimɛvi tɔweye ji, 5 ɖo, Ablaxamu se otonu na-a, bo wasi onu xena ko dɔn-ɛ ye, bo zɔn do ogbeɖiɖe tɛyee ji, bo wasi do ogbeta xeye na ko sɔ ye ji, bo zɔn do osɛn tɛyee ji.»6 Mi wɛ Izaki nɔ Gela. 7 Toxo la mɛ tɔye bo kan oxo-e se do osyɛ wu. E bo ɖo e wu na ye tun mɔ: «Nɔvye nyɔnusi wɛ.» E vɔ lilɔ nɔ tun hesye bɛ, na toxo la mɛ tɔye ko mɔ do hu-i nɔ o, ɖo, Hlebeka nyɔhwyan taŋu.
8 E nɔ blɛ la na azan susu. Gbeɖokpo, Filisitɔye we xɔlu Abimɛlɛki la, ɖe okɔ kpɔn odo gbɔn flɛsɛnu, e na kpɔn kpoŋu, e kpɔn Izaki lo da ɛgbɛ kpodo osyɛ Hlebeka nɔ. 9 Xena Abimɛlɛki kpɔn ye ɖo mɔsinha, e yɔ Izaki bo lɔ ni-i tun mɔ: «Kpɔn, ko kan do e ji tun Siwe wɛ. Ɛlɛ jɔ o do lɔ tun henɔvye nyɔnusi bɛ?» Izaki bo ɖo e wu tun mɔ: «Ko lɔ mɔsinha, ɖo, ko vɔ nɔ tun ye na hu-u do e nu.» 10 Abimɛlɛki bo mɔ yi oxo bo lɔ tun mɔ: «Ɛlɛ nyi e mɛ na o wa kpo mí mɛ? Viɖe jan wɛ drɔn, otovi ŋusunglo ɖe ba ɖo oxo kpo siwe, o bo na do dɔn mí do ɛhwɛ mɛ.»
11 Mi wɛ Abimɛlɛki ɖe ogbeta tɔn na otogun la seŋu, bo lɔ tun mɔ: «Ɛmɛ ɖekpekpe xeni na ɖo alɔ dahwe xe alo osyɛ wu, ye na hu-i.»
Ye ɖe ofun na Izaki
12 Oxwe mɛ la mɛ, Izaki xwa ɛjinukun le oto la mɛ, bo ɖe onu xena e xwa la we donu sandi ɖokpo, ɖo, Xwetɔ Mawu do ni-i. 13 E trɔ zun dɔkunnɔ, dɔkun etɔnye bo jɛ e ji ni-i nɔ gbɔɔn e bo va trɔ zun dɔkunnɔ ɖaxo kpligidi. 14 E ɖo gbɔgbwɛye, lɛngbɔye, nyibuye, bo ɖo odansɔviye gbagbagba. Filisitɔye bo bɛ ɛwuhwan. 15 Filisitɔ laye bɛ okɔ do tu dotwɛ zɛtɛye xena otɔ we odansɔviye kun le otɔ Ablaxamu la we hwenu ye. 16 Mi wɛ Abimɛlɛki lɔ na Izaki tun mɔ: «Lɛ le oto míatɔn mɛ, ɖo, o va trɔ zun ɛmɛ ɖaxo taŋu hugan mí.»
17 Izaki bo lɛ le blɛ la, bo va yi do avɔva etɔnye do Gela we sisahun mɛ, bo jɛ oxwe do blɛ. 18 Dotwɛ xeye na ye o kun le otɔ Ablaxamu we hwenu ye, Filisitɔye bo va tu dotwɛ mɛ laye le Ablaxamu la we oku godo ye, e trɔ kun ye. Nyikɔ xeye na otɔ o ɖo na dotwɛ laye saa, nyikɔ mɛ laye ke wɛ e mɔ ɖo na ye.
19 Izaki we odansɔviye mɔ kun dotwɛ le Gela we sisahun la mɛ, bo wɔ dotwɛ la do ɛsinhun ji. 20 Gelatomɛ we ogbɔkplɔtɔye bo wa ojlɛ kpo Izaki we ogbɔkplɔtɔye, bo lɔ na ye tun mɔ: «Míatɔn wɛ nyi ɛsin la.» Izaki bo yɔ dotwɛ mɛ la tun Esɛkia, ɖo, ye dɔn onu kpo-e do e wu. 21 Izaki we odansɔviye mɔ ɖe dotwɛ bu ke, ojlɛ bo mɔ va nɔ onyi do e mɛ la can wu. Izaki bo ɖo nyikɔ ni-i tun Sitinab. 22 E bɛ agban, bo lɛ le blɛ, bo va yi ɖe dotwɛ bu, ojlɛ ko mɔ va nɔ onyi do e mɛ la wu, e bo ɖo nyikɔ ni-i tun Hlexobɔtuc, ɖo, e lɔ tun mɔ: «Xwetɔ Mawu hun omɔ na mí fifi hɛn, onu míatɔnye bo na yi ŋukɔn le oto la mɛ.»
23 Mi wɛ e lɛ le blɛ, bo sɔn yi Bɛ-Ceba. 24 Le ozan mɛ la mɛ, Xwetɔ Mawu ze do ŋumɛ ni-i bo lɔ tun mɔ: «Mɔ wɛ nyi didawe Ablaxamu we Mawu, ká mɔ vɔ, ɖo, ko le kpo we, ko bo na do na we, bo na na na jijimɛvi tɔweye na su do odansɔvi tɛye Ablaxamu wu.» 25 Mi wɛ, Izaki wasi ovɔsinsan we agba ɖe do blɛ, bo yɔ Xwetɔ Mawu we nyikɔ. E do avɔva etɔn do blɛ la, odansɔvi etɔnye bo ɖe dotwɛ do blɛ la.
Izaki wasi okancica kpodo Abimɛlɛki
26 Abimɛlɛki sɔn Gela gbɔɔn, emyɔ kpodo hadwe etɔn Ahuzatu kpodo ahwanga etɔn Pikɔlu, ye bo va Izaki kɔn. 27 Izaki bo kan ye se tun mɔ: «Ɛlɛ dɔn mi do va kɔn ye? Owan hɛn mi gbɛ na-a bo nya-a le mia kɔn wɛɛ?» 28 Ye bo ɖo e wu tun: «Mí do josi-i ceɖe-ceɖe tun Xwetɔ Mawu bo le kpo we. Mi wɛ dɔn, mí ɖe kuku bo lo lɔ nɔ tun, ajɔgbe fifyan ɖe ni nɔ mía domɛ, mí ba wasi okancica kpo we. 29 Ta onu na mí tun myɔ boo ɔn wa onu nyanyla ɖe kpo mí nɔ o, ɖi lena míye can, mí ɔn do aya na we ɖo ha, mí bo wa onywɛ ɖoɖyo na we, bo jo we do, o bo sɔn le fifa mɛ, myɔ bɛ xɛn Xwetɔ Mawu do na fifi.» 30 Izaki bo ɖu agɔ kpo ye, ye bo ɖu, bo nu. 31 Ye bo fɔn le kɛklɛnu dɛɛn, bo fyan ajɔgbe na yenɔniɔye. Izaki bo ɖo ye, ye bo lɛ le e kɔn le fifa mɛ.
32 Le gbegbe mɛ la, Izaki we odansɔviye va ɖo ogbe ni-i do dotwɛ xena ye kun la wu, ye bo lɔ ni-i tun mɔ: «Mí kpɔn ɛsin.» 33 E bo ɖo nyikɔ na dotwɛ mɛ la tun Cibad. Mi wɛ dɔn na gbɔɔn do va jɛ egbe, toxo la we nyikɔ nɔ nyi Bɛ-Cebae.
Esawi ɖe nyɔnu