Ablaxamu xɔ ogle bo do ɖi Sala
23
1 Sala nɔ ɛgbɛ na oxwe Sandi ɖokpo ota owe ŋukun acowe. 2 Sala bo ku le Kana we oto mɛ, le Kilyati-Aluba, xena ye mɔ nɔ yɔ tun Eblɔn. Mi wɛ Ablaxamu wasi Sala we ocɔnuye, bo fan avin do ota ni-i. 3 E mɛ godo, e lɛ le ofi xena osyɛ we ocɔ le, bo va yi Hɛti we jijimɛ kɔn, bo lɔ na ye tun mɔ: 4 «Jonɔ wɛ ko nyi, bo do le mia mɛ. Mi na-a ocɔɖityɔn ɖe le mia kɔn, na ma kɔ siye we ocɔ, a bo va yi ɖi-i.» 5 Hɛti we jijimɛviye bo ɖo e wu na Ablaxamu tun mɔ: 6 «Ɖo oto mí, ɛmɛ ɖaxo! Mawu sɔ we do ɖo oga le mía mɛ; ɖi siwe do yɔgun míatɔn xeni nyɔ na we mɛ; ɛmɛ ti ɔn gbɛ le mía mɛ nɔ tun myɔ boo ká ɖi siwe do yɔgun etɔn mɛ nɔ o.»7 Ablaxamu site, bo do onu odo na Hɛti we jijimɛviye, yee bɛ le oto la mɛ ye, 8 e bo lɔ na ye tun mɔ: «Na mi yi jlo oxojɔxo tun mɔ boo kɔ siye, a bo ɖi-i do bwɛ, be mi ɖo oto-o: mi ɖe kuku na Eflɔn xeni nyi Sowa vyɛ na-a, 9 e ba do sɔ ogun ɖaxo xeni le ɛkpɛn ɖaxo mɛ le ogle etɔn we oto le Makpela, a sɔ sa na-a. Ni sɔ sa na-a do oho xena e ɖo na nyi ji, e ba do nyi ocɔɖityɔn na-a le mía mɛ.» 10 Eflɔn, Hɛti we jijimɛvi la, bo le onyi xinxlɔn le blɛ la le nɔvyɛye mɛ. E bo ɖo e wu na Ablaxamu le Hɛti we jijimɛvi gbokpweye kpodo ɛmɛ xeye ni kpli do toxo la we agbo mɔnu ye we ŋumɛ tun mɔ: 11 «O o, ɛmɛ ɖaxo tɛye, ɖo oto-o! Ko sɔ ogle la sɔ na we, ko mɔ sɔ ogun ɖaxo xeni le ɛkpɛn ɖaxo la mɛ can, sɔ na we. Ko sɔ na we le otovi laye we ŋumɛ. Ɖi siwe we ocɔ.»
12 Ablaxamu bo do onu odo na oto la mɛtɔye, 13 bo lɔ na Eflɔn le otovi laye we ŋumɛ tun mɔ: «Ko ɖe kuku na we, ɖo oto-o, ko na tu ogle la we oho na we, yi-i le si ye, ko ba va yi ɖi siye we ocɔ do e mɛ.» 14 Mi wɛ Eflɔn ɖo e wu na Ablaxamu tun mɔ: 15 «Ɛmɛɖaxo tɛye, ɖo oto-o, nyixɔ xena ye na sɔ oho sandi ɛnɛ do xɔ, ɛlɛ e nyi le mɔ kpo myɔ kpo do mɛ? Va yi ɖi siwe we ocɔ!»
16 Mi wɛ, Ablaxamu kpodo Eflɔn kpo lɔ, bo gbo, e bo xlɛ oho sandi ɛnɛ la na Eflɔn ɖi lena e lɔ le ŋumɛ na Hɛti we jijimɛvi gbokpweye ɖo ha. Oho xena oxwisinɔye nɔ zan le hwemɛnu, wɛ e do tu axɔ ni-i. 17 Mi wɛ Eflɔn we ogle xeni le Makpela, bo kpan ŋukɔn Mamule, kpodo ogun ɖaxo xeni le ɛkpɛn ɖaxo la mɛ, kpodo otin zɛtɛye xeye ni le e ji ye kpodo xeye ni gbɔn ogle la we odo zɛtɛye ji ye, 18 bo trɔ zun Ablaxamutɔn le Hɛti we jijimɛvi kpodo ɛmɛ zɛtɛye xeni va kpli le toxo la we agbo mɔnu ye, we ŋumɛ.
19 E mɛ godo Ablaxamu ɖi osyɛ Sala do ogun ɖaxo xeni le ɛkpɛn ɖaxo la mɛ, le ogle la ji, le Makpela. Makpela la bo kpan ŋukɔn Mamule xeni nɔ nyi Eblɔn le Kana we oto mɛ. 20 Ogle la kpodo ogun ɖaxo xeni le ɛkpɛn ɖaxo la mɛ, le ogle la ji, bo trɔ zun ocɔɖityɔn Ablaxamutɔn. E ko mɔ nyi Hɛti we jijimɛviye tɔn o.