Ablaxamu ɖe nyɔnu na Izaki
24
1 Ablaxamu ku nyɔxo, bo hwɛn taŋu, Xwetɔ Mawu bo do ni-i le onu zɛtɛye mɛ. 2 Ablaxamu lɔ na odansɔvi xeni nyi ɛmɛ xixo sɔ hugan ɛmɛ gbokpweye le oxwe etɔn gbe, bo nɔ kpɔn dɔkun etɔn zɛtɛye ji, tun mɔ: «Ko ɖe kuku, sɔ alɔ tɔwe sɔ ɖo atagboa tɛye gɔ, 3 a bo ta Xwetɔ Mawu jiŋukunsintɔn, Mawu nyixɔ ji tɔn, tun mɔ, o ɔn ɖe nyɔnu na ovi tɛye nɔ le Kanatɔ xeye mɛ na ko jɛ oxwe do ye we vikpɛ nyɔnuviye mɛ nɔ o, 4 vɔ, o na yi oto tɛye mɛ le xwedo tɛye mɛ, a bo va yi ɖe nyɔnu ɖokpo na ovi tɛye Izaki». 5 Odansɔvi la bo ɖo e wu ni-i tun mɔ: «Tanyɔ, nyɔnu la ɔn yi ogbe nɔ, a do kplɔ-ɔ do, do va oto xe mɛ nɔ; ko ɖo na kplɔ ovi tɔwe la do yi oto xe mɛ na o sɔn la wɛɛ?» 6 Ablaxamu bo ɖo e wu ni-i tun mɔ: «Caŋu-caŋu, ká kplɔ ovi tɛye do yi o. 7 Xwetɔ Mawu, jiŋukunsin we Mawu, xeni na na ko lɛ le didaye we oxwegbe kpodo oto xe mɛ na ko jɔ le, lɔ oxo na-a, bo fyan ajɔgbe na-a tun he bo na sɔ oto xe sɔ na jijimɛvi mɔ tɛyee. Emyɔ ŋutɔ na na na ɛwɛndotɔ etɔn na jɛ ŋukɔn na we, blɛ la bɛ o na ɖe nyɔnu le na ovi tɛye. 8 Na nyɔnu la ɔn va yi ogbe, a do kplɔ we do, be ajɔgbe xena o fyan na-a xe la, ɔn mɔ kan we, vɔ, ká kplɔ ovi tɛye yi blɛ la kpɔn gbeɖe.» 9 Mi wɛ, odansɔvi la bo sɔ alɔ sɔ ɖo atagbo gɔ na xwetɔ etɔn Ablaxamu bo fyan ajɔgbe ni-i tun he bo na wasi do oxo etɔn ji. 10 Odansɔvi la sɔ xwetɔ etɔn we osɔkpotɔnɔ owo, bo sɔ dɔkun hamɛ-hamɛ adodwe xeye ni nyi xwetɔ etɔn tɔn bo do sɔn. E bo jɛ omɔ a do yi toxo xena ye nɔ yɔ tun Nawɔ mɛ le otagbe le Mɛzopotami we oto mɛ.11 Xena e va yi jɛ dotwɛ ɖe kɔn le toxo la we ŋukɔn, e na na osɔkpotɔnɔ laye jɛ klita, e ba do jɛ ote. Hwedo bɛ, le ogan xe mɛ na nyɔnusiye nɔ va dun ɛsin le. 12 E bo lɔ tun mɔ: «Xwetɔ Mawu, xwetɔ tɛye Ablaxamu we Mawu, ko ɖe kuku, ɖe omɔ na-a, na onu xe gbe na ko tɔn ma kpɔn-ɛ le egbe. O ba ɖe dɔmɛnywɛ tɔwe sɔ xlɛ xwetɔ tɛye Ablaxamu la. 13 Mɔ xɛn le dotwɛ kɔn, toxo la mɛ tɔye we vikpɛ nyɔnuviye bo na tɔn a do va dun ɛsin. 14 Nyɔnuvi xena ko na lɔ na tun ni boo dɛ ɛsinzɛn etɔn na-a, na ma nu ɛsin, e ba ɖo e wu na-a tun mɔ: “Nu, ko na na ɛsin osɔkpotɔnɔ tɔweye can,” nyɔnuvi mɛ la wɛ na nyi nyɔnu xena o sɔ ɖo onyi na odansɔvi tɔwe Izaki. Dogbɔn e mɛ la mɛ, ko na nyɔ-ɛ tun myɔ bo ɖe dɔmɛnywɛ sɔ xlɛ xwetɔ tɛye.» 15 E ɔn lɔ oxo vɔ can, mi wɛ Hlebeka va tɔn kpodo ɛsinzɛn le abɔta. Hlebeka la bo nyi Betwɛli vyɛ nyɔnuvi, bo do nyi Ablaxamu nɔvyɛ Nawɔ kpodo osyɛ Milika we dagboyɔvi. 16 Nyɔnuvi la nyɔhwyan taŋu, bo le alɔji, ŋusunglo ti ko ɖo oxo kpo-e kpɔn. E va dotwɛ la to, bo dun ɛsin do ozɛn etɔn mɛ gbɔɔn e bo gɔ, bo jɛ omɔ.
17 Odansɔvi la bo do odun bo va yi kpe-e, bo lɔ ni-i tun mɔ: «Ko ɖe kuku, na-a ɛsin ovii ɖe le ɛsinzɛn tɔwe mɛ, na ma nu.» 18 E bo hwlɛndo bo ɖiɖi ɛsinzɛn la do abɔ mɛ, bo dɛ-ɛ na ni a nu. E bo lɔ ni-i tun mɔ: «Ɛmɛ ɖaxo nu.» 19 Xena e ni-i ɛsin e nu vɔ, e lɔ tun mɔ: «Ko na dun na osɔkpotɔnɔ tɔweye can, ye ba nu gbɔɔn e ba kpe ye.» 20 E bo hwlɛndo bo ɖɔli ɛsin xeni le ɛsinzɛn etɔn mɛ la kɔn do onu xe mɛ na kanlinye nɔ nu ɛsin le, bo mɔ do odun a do va yi dun ɛsin le dotwɛ la nu, e bo dun ɛsin na osɔkpotɔnɔ zɛtɛye seŋu. 21 Dahwe la bo le onubɔnyi xwii bo lo kpɔn-ɛ nɔ, a do kpɔn tun ɛɛn alo o o, Mavɔmavɔ na na na omɔ ji yiyi etɔn la na kpa-ɛ jaa.
22 Xena osɔkpotɔnɔ laye nu ɛsin la vɔ, dahwe la sɔ ŋɔtinganvi sikatɔn xeni vɛ oho kpodo alɔgan sikatɔn owe xeye ni vɛ oho taŋu ye, bo sɔ ni-i. 23 E bo kan-ɛ se tun mɔ: «Onu vyɛ lɛ o nyi? Ko ɖe kuku, na na ma nyɔ-ɛ. Tɛnxo le didawe we oxwegbe na mɔ kpodo ɛmɛ xeye ni kplɔ-ɔ do ye a nɔ blɛ le ozan xe mɛ?» 24 E bo ɖo e wu ni-i tun mɔ: «Betwɛli vyɛ wɛ ko nyi. Milika bɛ ji Betwɛli la na Nawɔ.» 25 E bo mɔ lɔ tun mɔ: «Ɛjinukun we getinye kpodo kanlin we onuɖuɖuye le gbagbagba le mía xwe, ofi xena ɛmɛ na dɔ can bo mɔ le.»
26 Dahwe la bo jɛ klita, bo do onu odo na Xwetɔ Mawu, 27 bo lɔ tun mɔ: «Ɛkpɛ na Xwetɔ Mawu, xwetɔ tɛye Ablaxamu we Mawu, e ɔn dokpo dɔmɛnywɛ etɔn kpodo ogbeji ninɔ etɔn sɔ xlɛ-ɛ o! Xwetɔ Mawu kplɔ-ɔ le omɔ ji yiyi tɛyɛ mɛ, gbɔɔn do va jɛ xwetɔ tɛye nɔvyɛye we oxwegbe.»
28 Nyɔnuvi la do odun bo va yi lɔ oxo la zɛtɛye na onɔ le oxwegbe. 29 Vɔ, Hlebeka ɖo fofo ɖokpo, ye bo nɔ yɔ-ɛ tun Laban. Laban la hwlɛndo, bo yi dahwe la kɔn le dotwɛ la to. 30 E o kpɔn ŋɔtinganvi la kpodo alɔgan laye le alɔ na nɔvyɛ, e bo o se nɔvyɛ Hlebeka we ogbe xeni va ɖo do oxo xena dahwe la lɔ ni-i wu. Mi wɛ, e va e kɔn, dahwe la bo le ote le osɔkpotɔnɔ laye kɔn le dotwɛ la to. 31 E bo lɔ ni-i tun mɔ: «Va, myɔ ɛmɛ xena Xwetɔ Mawu do na! Ɛlɛ jɔ o do ci gaji? Ko jla oxwe la gbe ɖo, bo ɖo tɛnxo onyi na osɔkpotɔnɔ laye.»
32 Dahwe la ɖyɛ oxwe la gbe. Laban bo ɖe agbanye jɛ ote le osɔkpotɔnɔ laye ji, bo na ye onuɖuɖu, bo sɔ ɛjinukun we getinye do ɖo tɛnxo na ye, bo na ɛsin, na dahwe la kpodo ɛmɛ xeye ni kplɔ-ɛ do ye, a do klɔ afɔ. 33 Ye bo hɛn onuɖuɖu va ni-i, vɔ, e bo lɔ tun mɔ: «Na ko ɔn lɔ oxo xena ko ɖo bo ka lɔ nɔ, ko ɔn ɖu onu nɔ.» Laban bo lɔ ni-i tun mɔ: «Lɔ oxo.» 34 Mi wɛ e lɔ tun mɔ: «Ablaxamu we odansɔvi wɛ ko nyi. 35 Xwetɔ Mawu do na xwetɔ tɛye taŋu, e bo trɔ zun dɔkunɔ ɖaxo. E ni-i ogbɔye, lɛngbɔye, onyiye, oganwe kpodo sika, odansɔvi ŋusunglo kpodo nyɔnusi kpo, osɔkpotɔnɔye kpodo osɔkɛtɛye. 36 Sala, xwetɔ tɛye syɛ, ku nyɔxo ganke, bo ji ovi ŋusunglo ɖokpo na xwetɔ tɛye la. Ovi mɛ la wɛ xwetɔ tɛye la sɔ dɔkun etɔn zɛtɛye sɔ na. 37 Xwetɔ tɛye bo na na ko ta onu, e bo lɔ na-a tun mɔ boo ká ɖe nyɔnu na heviye le Kanatɔ xeye mɛ na he bo jɛ oxwe do ye we vikpɛ nyɔnuviye mɛ o, 38 vɔ, mɔ boo yi hedidaye we oxwegbe mɛ, le xwedo hetɛye mɛ, a bo va yi ɖe nyɔnu ɖokpo na heviye. 39 Mi wɛ ko lɔ na xwetɔ tɛye tun mɔ: vlavo, na nyɔnu la va yi gbɛ tun he bo ɔn kplɔ-ɔ do nɔ ɖe? 40 E bo ɖo e wu na-a tun mɔ: “Xwetɔ Mawu xena ko nɔ se otonu na, na dɔn ɛwɛndotɔ etɔn, e ba le kpo we, e bo na na na omɔ ji yiyi tɔwe na kpa we, o bo na ɖe nyɔnu ɖokpo na ovi tɛye le xwedo tɛye mɛ, le didaye we oxwegbe. 41 Xwedo tɛye mɛ jan wɛ o na yi gbɔxwe na ajɔgbe xe la na tɔn le okɔ na we. Na o yi, ye ko jo nyɔnuvi la do na we, hwemɛnu ajɔgbe xe la ɔn mɔ le okɔ na we o.” 42 Hwexenu na ko va dotwɛ la to le egbe, ko lɔ oxo xe: Xwetɔ Mawu, xwetɔ tɛye Ablaxamu we Mawu, na na omɔ ji xena ko yi nɔ xe, a kpa-a. 43 Mɔ xɛn le dotwɛ to, nyɔnuvi xeni na tɔn a do va dun ɛsin, xena ko na lɔ na tun, ko ɖe kuku, na-a ɛsin ovii ɖe ma nu le ɛsinzɛn tɔwe mɛ, 44 e bo na ɖo e wu na-a tun, “nu myɔ ŋutɔ, ko bo na dun ɛsin na osɔkpotɔnɔ tɔweye can,” nyɔnuvi mɛ la wɛ na nyi nyɔnu xena Xwetɔ Mawu sɔ ɖo onyi na xwetɔ tɛye vyɛ. 45 Ko ɔn lɔ oxo la vɔ le oji tɛye mɛ can, mi wɛ Hlebeka va tɔn, ɛsinzɛn bo le abɔta, e bo va dotwɛ nu, bo dun ɛsin. Mi wɛ, ko bo lɔ ni-i tun: ko ɖe kuku, na-a ɛsin ma nu. 46 E hwlɛndo, bo ɖiɖi ɛsinzɛn la do abɔ mɛ, bo lɔ tun mɔ: “Nu, ko bo na na ɛsin osɔkpotɔnɔ tɔweye can.” Ko bo nu, e bo na ɛsin osɔkpotɔnɔ laye can. 47 Ko bo kan-ɛ se tun mɔ: onu vyɛ lɛ o nyi? E bo ɖo e wu tun: “Betwɛli vyɛ wɛ ko nyi. Betwɛli la wɛ Milika ji na Nawɔ.” Mi wɛ, Ko bo do ŋɔtinganvi ŋɔtin ni-i, bo do alɔganye alɔtinuye ni-i. 48 E mɛ godo, ko jɛ klita bo do onu odo na Xwetɔ Mawu, bo do ɛkpɛ na xwetɔ tɛye Ablaxamu we Mawu, xeni kplɔ-ɔ nywɛɖe le omɔ ji yiyi tɛye mɛ na ma do ɖe xwetɔ tɛye we dayiyɔvi na ovyɛ. 49 Fifi, na mi jlo na ɖe dɔmɛnywɛ kpodo ogbeji ninɔ sɔ xlɛ xwetɔ tɛye, mi lɔ na-a; na e ɔn mɔ nyi mɔsinha, mi mɔ lɔ na-a, na ma kan ofi ɖe, a bo gbɔn.»
50 Laban kpodo betwɛli kpo bo ɖo e wu tun mɔ: «Oxo xe, Xwetɔ Mawu kɔn wɛ e sɔn, oxo nyanyla alo oxo nywɛ ŋukɔ lɛ mí na lɔ do e wu fifi? 51 Hlebeka mɛ le ŋukɔn na we. Kplɔ-ɛ do sɔ sɔn. Ni va yi trɔ zun nyɔnu na xwetɔ tɔwe vyɛ, ɖi lena Xwetɔ Mawu lɔ ɖo ha.» 52 Xena Ablaxamu we odansɔvi la se oxo mɛ laye, e do onu odo na Xwetɔ Mawu. 53 Odansɔvi la ɖe oganwe we onuye, sikanuye, kpodo onudidoye tɔn-ɛ, bo sɔ na Hlebeka, bo na onu xeye ni vɛ oho taŋu ye fofo etɔn kpodo onɔ. 54 Odansɔvi la kpodo ɛmɛ xeye ni kplɔ-ɛ do ye, ɖu, bo nu, bo hlɔn blɛ le ozan la mɛ.
Le onyihinhɔngbe etɔn kɛklɛnu, hwexenu na ye fɔn, e lɔ tun mɔ: «Mi ɖe omɔ na-a, na ma sɔn yi xwetɔ tɛye kɔn.» 55 Nyɔnuvi la we fofo kpodo onɔ, bo lɔ tun mɔ: «Ni nɔ mía kɔn viɖe, na onyihinhɔn owo mɔsinha, e mɛ godo, e ba sɔn.» 56 E bo ɖo e wu na ye tun mɔ: «Mi ká mɔ dɛn ganmɛ na-a o, Xwetɔ Mawu o na na omɔ ji yiyi tɛye kpa-a, mi jo-o do ma sɔn yi xwetɔ tɛye kɔn.» 57 Ye bo lɔ tun: «Mí a yɔ nyɔnuvi la, a bo kan-ɛ se.»
58 Ye bo yɔ Hlebeka, bo kan-ɛ se tun mɔ: «O jlo na kplɔ dahwe xe do?» E bo ɖo e wu tun mɔ: «Ɛɛn, ko na kplɔ-ɛ do.» 59 Mi wɛ, ye ɖe omɔ na ye nɔvyɛ Hlebeka kpodo nyɔnu xeni nɔ kpe ŋukunsin do e wu sɔn vikpɛvi mɛ etɔn gbɔɔn, kpodo Ablaxamu we odansɔvi la kpodo ɛmɛ etɔnye, ye bo sɔn. 60 Ye bo xo fifa we ɛɖɛ na Hlebeka, bo lɔ tun mɔ:
«Myɔ mía nɔvyɛ,
O na nyi onɔ na ɛmɛ akpo nɛmu-nɛmu ɖe
Jijimɛvi tɔweye
Ni yi kɛntɔ yetɔnye we toxoye le ye si.»
61 Hlebeka kpodo nyɔnu odansɔvi etɔnye, xɛ osɔkpotɔnɔ laye ji, bo kplɔ dahwe la do. Mɔsinha wɛ odansɔvi la kplɔ Hlebeka do sɔn ɖo mɛ.
62 Izaki bo lɛkɔ sɔn Laxayi-Hlɔyi we dotwɛ kɔn. Izaki la bo nɔ nɔ Nɛgɛvu we kansinmɛ. 63 Hwedo gbeɖokpo, Izaki tɔn a do va yi ɖi asa le gbefaji, e kɔ okɔ bo kpɔn osɔkpotɔnɔye lo gbɔn nɔ. 64 Hlebeka can kɔ okɔ, bo kpɔn Izaki, bo zɔn jɛ ote le osɔkpotɔnɔ la ji, 65 bo kan Ablaxamu we odansɔvi la se tun mɔ: «Dahwe ŋukɔ lɛ nyi e mɛ ni gbɔn nɔ sɔn gbefaji bo ka va kpe mí nɔ mɛ?» Odansɔvi la bo ɖo e wu tun: «Xwetɔ tɛye wɛ.» Mi wɛ Hlebeka sɔ dukwivi etɔn bo sɔ cɔn ŋumɛ. 66 Odansɔvi la bo lɔ onu zɛtɛye xena e wasi, na Izaki. 67 Izaki kplɔ Hlebeka, bo ɖyɛ avɔva xe mɛ na onɔ Sala nɔ nɔ saa, e bo trɔ zun osyɛ; e bo yi owan ni-i, e mɛ la wɛ nyi akɔnfifa ni-i le onɔ we oku godo.