Mawu do Ablaxamu kpɔn
22
1 Xena onu mɛ laye jɔ va yi vɔ, Mawu do Ablaxamu kpɔn, mi wɛ e yɔ-ɛ, bo lɔ tun mɔ: «Ablaxamu!» Ablaxamu la bo yi ogbe, bo lɔ tun mɔ: «Ago, Xwetɔ, mɔ xɛn!» 2 Mawu bo lɔ tun mɔ: «Ko ɖe kuku, kplɔ ovi ŋusunglo tɔwe, ovi ɖokpo gee tɔwe, xena o yi owan na, Izaki la, a bo sɔn yi Mɔlija we oto mɛ. Le blɛ, o na sɔ-ɛ do wasi ovɔsinsan fifyɔ le okpó xena ko na jlɛ na we ji.»3 Ablaxamu site le kɛklɛnu dɛɛn, bo bla akpa na osɔkɛtɛ etɔn, bo kplɔ odansɔvi hwanjavi owe kpodo ovyɛ Izaki la do ɛtɛ. E bo fɛn nake na ovɔsinsan la, bo sɔn yi ofi xena Mawu jlɛ ni-i la. 4 Onyihinhɔn atɔngɔ gbe, Ablaxamu kɔ okɔ bo kpɔn ofi la ɖodan daan. 5 E bo lɔ na hwanjavi laye tun mɔ: «Miye kpodo osɔkɛtɛ la kpo, mi nɔ bwɛ, mɔ kpodo ovi tɛye la, mí na yi blɛ daan, a bo va yi sɛn Mawu, e mɛ godo, mí na trɔ va mia kɔn.»
6 Ablaxamu bo kɔ ovɔsinsan fifyɔ we nake laye sɔ ɖo ota na ovyɛ Izaki, emyɔ ŋutɔ bo hɛn ozo la kpodo ohwi la do asi. Ye bo zɔn kpɔkpɔ, bo lo sɔn nɔ. 7 Mi wɛ Izaki yɔ otɔ la, bo lɔ tun mɔ: «Didaye», Ablaxamu bo yi ogbe ni-i tun mɔ: «Ovi tɛye, mɔ xɛn.» Ovi la bo kan-ɛ se tun mɔ: «Ozo la kpodo nake laye xɛn, bɔ lɛ lɛngbɔvi xena o na do wasi ovɔsinsan fifyɔ la le?» 8 Ablaxamu bo ɖo e wu tun mɔ: «Ovi tɛye, Mawu ŋutɔ na na lɛngbɔvi la na ovɔsinsan fifyɔ la.»
Ye ɛmɛ owe laye bo zɔn kpɔkpɔ bo lo sɔn nɔ. 9 Xena ye va yi jɛ ofi xena Mawu jlɛ ni-i la, Ablaxamu wasi ovɔsinsan we agba la do blɛ, bo to nake laye do e ji. E bo bla ovyɛ Izaki bo sɔ ɖo nake laye ji le ovɔsinsan we agba la ji. 10 Ablaxamu bo drɛn alɔ bo sɔ ohwivi la, a do gbo ohlo na ovyɛ la. 11 Vɔ, Xwetɔ Mawu we ɛwɛndotɔ ɖe yɔ-ɛ sɔn jiŋukunsin bo lɔ tun mɔ: «Ablaxamu! Ablaxamu!» E bo yi ogbe tun mɔ: «Ago, mɔ xɛn!» 12 E bo mɔ lɔ tun mɔ: «Ká ɖo alɔ ovi la wu o, a bo ká wa onu ti kpo-e o, ɖo fifi, ko nyɔ-ɛ tun o nɔ vɔ Mawu, o ko gbɛ ovi tɔwe ɖokpo gee la sisɔ ni-i o.»
13 Ablaxamu kɔ okɔ, e na kpɔn kpoŋu, agbo ɖe mɛ azo etɔnye jan ci klili ɖe mɛ, e bo va yi sɔ-ɛ do wasi ovɔsinsan fifyɔ do domɛ na ovyɛ la. 14 Ablaxamu bo ɖo nyikɔ na ofi la tun mɔ: «Xwetɔ Mawu nɔ na.» Mi wɛ ye nɔ do lɔ egbe tun mɔ: «Le Xwetɔ Mawu we okpó ji, Mawu na na.»
15 Xwetɔ Mawu we ɛwɛndotɔ la bo mɔ yɔ Ablaxamu zɔn owegɔ sɔn jiŋukunsin 16 bo lɔ tun mɔ: «Oxo xena Xwetɔ Mawu lɔ xɛn: xena e nyi tun o wasi mɔsinha, o ko gbɛ ovi tɔwe ɖokpo gee la sisɔ na-a, ko ta ɖiye na we, 17 ko na do na we taŋu a bo na na jijimɛvi tɔweye na su gbagbagba ɖi sunhwevi jiŋukunsintɔnye kpodo ɛxuta we okɔ ha. Jijimɛvi tɔweye na yi kɛntɔ yetɔnye we toxoye le ye si. 18 Dogbɔn jijimɛvi tɔweye ji, otogun zɛtɛye xeni le nyixɔ la ji na kpɔn dona, ɖo, o se otonu na-a.» 19 Ablaxamu bo trɔ sɔn yi hwanjavi odansɔvi etɔnye kɔn, ye bo site bo zɔn kpɔkpɔ do sɔn yi Bɛ-Ceba, ɖo, blɛ la wɛ Ablaxamu jɛ oxwe do.
20 Le onu mɛ laye we godo, ye va lɔ na Ablaxamu tun mɔ: «Kpɔn Milika can ji ovi ŋusungloye na nɔvwe Nawɔ. 21 Ovi tantyan la wɛ nyi Wusu, nɔvyɛye bo nyi Buzu kpodo Kemuwɛli xeni nyi Alamu otɔ. 22 Vikpɛ gbokpweye wɛ nyi Kesɛdi, Hazo, Pilidaci, Yidalafu kpodo Betwɛli kpo. 23 Ovi ŋusunglo atrotɔn xeye na Milika ji na Nawɔ Ablaxamu nɔvyɛ, ye mɛ. Betwɛli emyɔ bo ji Hlebeka. 24 Nawɔ we zyavi xena ye nɔ yɔ tun Hlewuma, emyɔ can ji vikpɛye. Ye wɛ nyi Tɛva, Gahamu, Taxaci kpodo Maka.»