Sala ji Izaki na Ablaxamu
21
1 Xwetɔ Mawu ɖe dɔmɛnywɛ etɔn sɔ xlɛ Sala ɖi lena e lɔ-ɛ ɖo ha, ogbe xena e xo ni-i, e wasi do e ji. 2 Mi wɛ Sala bo yi gomi, bo ji ŋusunglovi ɖokpo na Ablaxamu le nyɔxo mɛ etɔn, le hwexenu na Xwetɔ Mawu lɔ na Ablaxamu la. 3 Ablaxamu bo ɖo nyikɔ na ŋusunglovi xena Sala ji ni-i la tun Izaki. 4 Xena Izaki ɖo onyihinhɔn atrotɔn, Ablaxamu gbo ada ni-i ɖi lena Mawu ɖe ogbe etɔn ni-i ɖo ha. 5 Hwexenu na ye ji Izaki la, Ablaxamu ɖo oxwe kanweko. 6 Mi wɛ Sala do axwa bo lɔ tun mɔ: «Mawu do ɛdɛ na-a. Ɛmɛ zɛtɛye xeni na se ye, ye na ko ɛdɛ do-o.» 7 E bo mɔ lɔ ke tun mɔ: «Onu lɛ kpewu na lɔ na Ablaxamu le saa tun mɔ, mɔ Sala bo na va na anɔ ovi? Ganke, ko ji ovi ŋusunglovi ɖokpo ni-i le nyɔxo mɛ etɔn.»Ablaxamu nya Agaa le oxwe etɔn gbe
8 Izaki la bo hwɛn, ye bo ɖe anɔ ni-i. Ablaxamu bo ɖu agɔ ɖaxo ɖe le gbe xe gbe na ye ɖe anɔ na Izaki la. 9 Sala bo kpɔn ŋusunglovi xena Agaa Ejiputitɔ la ji na Ablaxamu la, lo da ɛgbɛ nɔ. 10 E bo lɔ na Ablaxamu tun mɔ: «Nya nyɔnu ɛmɛxixɔ mɛ kpodo ovyɛ ŋusunglo mɛ, ɖo ɛmɛxixɔ vyɛ mɛ la, ɔn ma cinɔ kpodo ŋusunglovi tɛye Izaki nɔ.»
11 Oxo mɛ la ɔn jɛ e ji na Ablaxamu kulaa, ɖo ovyɛ ke wɛ. 12 Vɔ, Mawu bo lɔ na Ablaxamu tun mɔ: «Oxo xena Sala lɔ do hwanjavi tɔwe kpodo ɛmɛxixɔ tɔwe la wu, ni ká vɛ na we o. Onu zɛtɛye xena e byɔ we, wasi ni-i, ɖo, dogbɔn Izaki ji wɛ o na ɖo jijimɛvi xeni na ɖo nyikɔ tɔwe le. 13 Vɔ, ovi ŋusunglo xena ɛmɛxixɔ tɔwe ji na we la, ko na sɔ emyɔ can do wasi otogun, ɖo, okunkan tɔwe ke wɛ.»
14 Ablaxamu bo site le kɛklɛnu dɛɛn, bo sɔ kpɔnnɔ kpodo olangbaza we oglo xe mɛ na ɛsin le, sɔ na Agaa. E bo kɔ ovi la ɖo abɔta ni-i, bo nya-ɛ. Agaa la bo sɔn, bo va yi flu nɔ le Bɛ-Ceba we zogbeji.
15 Xena ɛsin vɔ le olangbaza we oglo la mɛ, e sɔ ovi la flɛn do otinvi ɖe gɔ. 16 E bo va yi xlɔn onyi le dindyɔnnu, le ofi xena oda xena ye tɛ na va yi jɛ ha. Ɖo, e lɔ nɔ tun mɔ: «Ko ɔn kpɔn ovi tɛye we kuku mɛ nɔ o.» E bo xlɔn onyi le azɔga, bo jɛ avin finfan ji hɛhɛhɛ. 17 Vɔ, Mawu bo se hwanjavi la we ogbe, mi wɛ ɛwɛndotɔ etɔn ɖe yɔ Agaa sɔn jiŋukunsin, bo lɔ ni-i tun mɔ: «Ɛlɛ wa we, Agaa? Ká mɔ vɔ, ɖo, Mawu se hwanjavi la we ogbe le ofi xena e le. 18 Site, kɔ hwanjavi la, a bo hɛn e wu ganji, ɖo, ko na sɔ-ɛ do wasi otogun ɖaxo ɖe.» 19 Mawu bo hun ŋukunsin ni-i, e bo kpɔn dotwɛ ɖe. E bo va yi yi ɛsin do olangbaza we oglo la mɛ gbɔɔn e bo gɔ, e bo na hwanjavi la, e bo nu.
20 Mawu bo le kpo hwanjavi la, e bo hwɛn bo va yi jɛ oxwe do zogbeji. Odatɛtɔ wɛ e nyi. 21 E bo nɔ zogbe mɛ la xena ye nɔ yɔ tun Palan ji, onɔ bo na na ye va yi ɖe nyɔnu ni-i le Ejiputi we oto mɛ.
Ablaxamu wasi okancica kpodo Abimɛlɛki
22 Le hwemɛnu, Abimɛlɛki kpodo Pikɔlu ahwanga etɔn, va Ablaxamu kɔn, mi wɛ Abimɛlɛki lɔ ni-i tun mɔ: «Mawu le kpo we le onu zɛtɛye xena o nɔ wasi ye mɛ. 23 Ta Mawu, a bo lɔ na-a, le bwɛ fifi trololo tun, myɔ boo ɔn blɛ mɔ kpodo vikpɛ tɛyee kpodo jijimɛvi tɛyee ɖu nɔ o. Owanyiyi xena ko ɖe sɔ xlɛ we, myɔ can bo na ɖe afɔ etɔn ha sɔ xlɛ mɔ kpodo oto xe mɛ na o nɔ viɖe saa tɔye.» 24 Ablaxamu bo ɖo e wu tun mɔ: «Ko ta Mawu.»
25 Ablaxamu bo jɛ ɛhwɛ na Abimɛlɛki do dotwɛ xena odansɔvi etɔnye yi gannu-gannu wu. 26 Abimɛlɛki bo ɖo e wu tun mɔ: «Ko ɔn nyɔ ɛmɛ xeni wa onu mɛ la, myɔ ŋutɔ can o ko lɔ na saa, mɔ can, fifi jan bɛ ko lo se nɔ.» 27 Mi wɛ Ablaxamu sɔ ogbɔ, gbɔgbwɛ kpodo onyi sɔ na Abimɛlɛki, ye ɛmɛ owe laye bo wasi okancica ɖe. 28 Ablaxamu bo sɔ lɛngbɔ acowe le okpwe etɔn mɛ, bo sɔ ɖo ovo. 29 Mi wɛ Abimɛlɛki kan-ɛ se tun mɔ: «Lɛngbɔ ŋukɔye lɛ mɔ nyi acowe xeye na o ɖe ɖo ovo mɛ ye?» 30 E bo ɖo e wu ni-i tun mɔ: «O na yi lɛngbɔ acowe mɛ laye le si ye, e ba do ɖe xlɛ tun mɔ bɛ bo ɖe dotwɛ la.» 31 Mi wɛ dɔn ye do yɔ blɛ la tun Bɛ-Ceba, ɖo, blɛ la wɛ ye xo ogbe na yenɔniɔye le.
32 Ye bo wasi okancica ɖe le Bɛ-Ceba la. E mɛ godo, Abimɛlɛki site, mi wɛ emyɔ kpodo Pikɔlu ahwanga etɔn trɔ sɔn yi Filisitɔye we oto mɛ. 33 Ablaxamu bo do otin xena ye nɔ yɔ tun Tamalisi do Bɛ-Ceba la. E bo xo ɛɖɛ na Mawu tɛgbɛ-tɛgbɛtɔn bo yɔ-ɛ tun Mawu Mavɔmavɔ. 34 Ablaxamu bo nɔ Filisitɔye we oto mɛ na azan susu.