Ablaxamu lɔ na Abimɛlɛki tun Sala bo nyi he nɔvye
20
1 Ablaxamu lɛ le ofi xena e le, bo sɔn yi Nɛgɛvu we kansimɛ. E bo va yi jɛ oxwe do Kadɛsi kpo Culu gblamɛ. E mɛ godo, e va nɔ Gela viɖe. 2 Ablaxamu lɔ do osyɛ Sala wu tun e bo nyi he nɔvye. Abimɛlɛki xeni nyi xɔlu Gelatɔn dɔn ɛmɛye ɖodan, ye bo va yi kplɔ Sala va ni-i. 3 Vɔ, Mawu va kpe kpodo Abimɛlɛki le odrɔ mɛ, le ozan mɛ, bo lɔ ni-i tun mɔ: «O na ku, do nyɔnu xena o dɔn tun ye boo kplɔ va na we la wu, ɖo, e ɖo osu.» 4 Abimɛlɛki ɔn tɛkpɔ nyɔnu la hɔnɖyo can, mi wɛ e do axwa bo lɔ tun mɔ: «Xwetɔ tɛye! O na crɔn otogun xeni nyi otogun jijwɛ can wɛɛ? 5 Emyɔ ŋutɔ hɛn lɔ na-a tun he nɔvye bɛ wɛɛ? Nyɔnu la can ɔn lɔ tun fofo hetɛye bɛ wɛɛ? Onu xena ko wasi, ɛhwɛ jijɔ ji wɛ ko wasi-i do, ayixa tɛye ko do ɛhwɛ ɖe na-a nɔ o.» 6 Mawu bo ɖo e wu ni-i le odrɔ mɛ tun mɔ: «Mɔ can ko nyɔ-ɛ tun myɔ bo wa onu do ɛhwɛ jijɔ ji, mɔ ke wɛ dɔn na o ɔn do wa onu nyanyla do-o, mi wɛ dɔn ko ɔn do jo we do na o do tɛkpɔ-ɛ. 7 Fifi, sɔ nyɔnu la na dahwe la, ɖo, oxolɔɖonyitɔ wɛ e nyi, e bo na xo ɛɖɛ na we, o ba do nɔ ɛgbɛ. Vɔ, na o ɔn sɔ nyɔnu la sɔ na, nyɔ-ɛ tun o na ku jan wɛ, myɔ kpodo ɛmɛ tɔweye seŋu.»8 Abimɛlɛki fɔn le kɛklɛnu fuu, bo yɔ odansɔvi etɔn zɛtɛye, bo to oxo la na ye seŋu, vivɔ ɖaxo ɖe bo jɛ ye ji. 9 E mɛ godo, Abimɛlɛki yɔ Ablaxamu, bo lɔ ni-i tun mɔ: «Ɛlɛ nyi e mɛ na o wasi kpodo mí! Onu nyanyla ŋukɔ lɛ ko wa do we, na o ka do zin mɔ kpodo xɔluɖuto tɛye kpo do onu nyanyla ɖaxo mɛ nɔ? Onu xena ye ɔn nɔ wasi kpodo ɛmɛ, e mi mɛ o wasi kpo-o.» 10 Abimɛlɛki mɔ lɔ tun mɔ: «Susu ŋukɔ lɛ o ɖo bo do wasi mɔsinha?» 11 Ablaxamu ɖo e wu tun mɔ: «Oxo xena ko lɔ le ayixa tɛye mɛ xɛn: ko kan do e ji tun ɛmɛ xeye ni le bwɛ ye, bo ɔn ɖo sisi ti na Mawu, ye bo na hu-u do siye nu. 12 Ko na do lɔ can, Sala la nɔvye wɛ e nyi le oxojɔxo mɛ, mɔ kpo emyɔ kpo, otɔ ɖokpo vikpɛye wɛ mí nyi, vɔ, onɔ bo klan, mi wɛ e va trɔ zun siye. 13 Le hwexenu na Mawu lɔ tun, mɔ boo lɛ le didaye we oxwegbe, ko lɔ na siye tun ni boo wasi dɔmɛnywɛ na-a, a bo lɔ le ofi ɖekpekpe xena mí na yi tun, fofo etɔn bɛ ko bo nyi.» 14 Mi wɛ, Abimɛlɛki bo sɔ ogbɔye, gbɔgbwɛye, nyibuye, odansɔvi nyɔnusiye kpodo ŋusungloye, bo sɔ na Ablaxamu, bo sɔ osyɛ Sala la sɔ ni-i. 15 Abimɛlɛki bo mɔ lɔ tun mɔ: «Kpɔn, oto tɛye la, e mi mɛ le ŋumɛ na we, jɛ oxwe do ofi ɖekpekpe xeni jlo we. 16 E mɛ godo, e bo lɔ na Sala tun mɔ: kpɔn, ko sɔ ohogan akpo ɖokpo sɔ na fofo tɔwe, e mɛ la wɛ na ɖe xlɛ tun ɖe bo ɔn nyi tɔwe le xo xe mɛ, le ŋumɛ na ɛmɛ zɛtɛye xeni le kpo we ye, e mɛ, ɛmɛ ti ɔn mɔ do ɛhwɛ na we nɔ o.»