Mawu crɔn Sodomu kpo Gomɔɔ kpo
19
1 Mawu we ɛwɛndotɔ owe laye bo va Sodomu we toxo mɛ le hwedo, hwemɛnu, Lɔtu bo le onyi xinxlɔn le toxo la we agbo mɔnu. Xena e kpɔn ye, e site bo va yi kpe ye, bo do onu odo na ye. 2 E bo lɔ tun mɔ: «Ko ɖe kuku na mi, ɛmɛ ɖaxo tɛyee, mi lɛkɔ a bo zɛ mɔ odansɔvi míatɔn we oxwe gbe, mi ba klɔ afɔye, a bo dɔ blɛ. Kɛklɛnu dɛɛn, mi na fɔn, a bo mɔ jɛ omɔ miatɔn, a bo sɔn.» Ye bo lɔ ni-i tun mɔ: «O o! Mí na dɔ dogba ji.» 3 Vɔ, Lɔtu bo zin do ye ji gbɔɔn ye bo lɛkɔ bo zɛ oxwe etɔn gbe. E bo ɖa onuɖuɖu na ye, bo na na ye mɛ kpɔnnɔ ma ɖo tinkɛn na ye, ye bo ɖu.4 Ye ɔn ka hlɔn onyi can, mi wɛ toxo la mɛtɔye, Sodomu we ŋusungloye, lɛdo oxwe la, sɔn hwanjaviye ji gbɔɔn do yi nyɔxonɔye ji, otogun la zɛtɛye seŋu wɛ tɔn, ɛmɛ ti ɔn hwe. 5 Ye bo yɔ Lɔtu bo lɔ ni-i tun mɔ: «Bɔ lɛ ŋusunglo xeye ni ɖyɛ oxwe tɔwe gbe le ozan xe mɛ ye le? Ɖe ye tɔn-ɛ na mí, na mí a ɖo oxo kpo ye.»
6 Lɔtu tɔn va ye kɔn le gaji, bo tu ohɔn la do godo etɔn. 7 E bo lɔ na ye tun mɔ: «Nɔvyee, ko ɖe kuku na mi, mi ká wa onu nyanyla o. 8 Ko ɖo nyɔnuvi owe xeye ni ɔn nyɔ ŋusunglo kpɔn, ko ɖe kuku na mi, ko na ɖe ye tɔn-ɛ na mi, mi ba wasi onu xeni jlo mi kpo ye. Vɔ, ɛmɛ mɛ ye, mi ká wa onu nyanyla ti kpo ye o, ɖo, ye o ɖyɛ oxɔ tɛye mɛ.» 9 Ye bo lɔ tun mɔ: «Dun yi le blɛ!» Ye bo mɔ lɔ ke tun mɔ: «Myɔ o nyi jonɔ, a bo va kpa ɛcɛ na míye le toxo míatɔn mɛ. Kpɔn, mí na wa onu nyanyla kpo we sɔ hugan ɛmɛ laye tɔn!» Ye bo tintin Lɔtu kpo hɔnhlɔn kpo, bo dri nɔ a do fo ohɔn la. 10 Vɔ, ɛwɛndotɔ owe laye bo drɛn alɔ, bo dɔn Lɔtu do oxɔ la mɛ, bo tu ohɔn la. 11 Ye bo gba ŋukunsin na ɛmɛ xeye ni le oxɔ la mɔnu ye, sɔn vikpɛvi ji gbɔɔn do va yi jɛ ɛmɛhyɔn ji, ye ko mɔ do kpewu kpɔn ohɔn la nɔ.
12 Ɛwɛndotɔ owe laye bo lɔ na Lɔtu tun mɔ: «Onu lɛ o mɔ ɖo le bwɛ? Ovi su ɖe wɛ, ovi ŋusunglo alo nyɔnusi tɔweye wɛ, kpodo ɛmɛ ɖekpekpe xeni gbɛ nyi tɔwe le toxo la mɛ, ɖe ye tɔn-ɛ le toxo xe mɛ. 13 Mí na crɔn toxo la, ɖo, ɛhwɛ xena ye do na toxo la mɛtɔye nɔ, e hugan onyi le ŋumɛ na Xwetɔ Mawu. E bo sɔ mí ɖodan, na mí a do crɔn toxo la.» 14 Lɔtu bo tɔn, a do va yi lɔ oxo la na viswaye, e bo lɔ na ye tun mɔ: «Mi site, a bo tɔn le toxo xe mɛ, ɖo, Xwetɔ Mawu na crɔn toxo la.» Vɔ, hwanjavi laye bo kpɔn nɔ tun e bo lo ɖɔ ohwan nɔ.
15 Gbɔɔn na ɛgbɛ mɛ na vo, ɛwɛndotɔ laye bo tɛ ɛɖɛ e ji na Lɔtu tun mɔ: «Site, a bo kplɔ siwe kpodo vikpɛ nyɔnuvi owe xeye ni le bwɛ ye, na o ko mɔ do ku nɔ le hwexenu na mí na crɔn toxo la nɔ.» 16 Vɔ, Lɔtu bo dɛn nɔ; mi wɛ ɛwɛndotɔ owe laye jɛ alɔtin nu ji ni-i, emyɔ la kpodo osyɛ kpodo vikpɛ nyɔnuvi owe etɔnye, bo ɖe ye tɔn-ɛ le toxo la mɛ, ɖo, Xwetɔ Mawu kpɔn dɔŋuɖunu ni-i.
17 Xena ye dɔn ye tɔn-ɛ vɔ, ɛwɛndotɔ ɖokpo lɔ na Lɔtu tun mɔ: «Si a bo hwlɛn ɛgbɛ tɔwe gan, ká kpɔn godo, a bo ká tre le ofi ti le kansin la mɛ o! Si a bo sɔn yi okpó ji, o ko mɔ do crɔn nɔ.» 18 Lɔtu bo lɔ na ye tun mɔ: «O o! Ko ɖe kuku ɛmɛ ɖaxo! 19 Ko ɖe kuku, mɔ odansɔvi tɔwe kpɔn dɔmɛnywɛ tɔwe, o bo ɖe owan yiyi ɖaxo tɔwe sɔ xlɛ-ɔ, bo do hwlɛn ɛgbɛ tɛye gan; vɔ, gbɔɔn na ko na si nɔ gbɔɔn a bo va yi jɛ okpó la ji, onu nyanyla na va jɛ ji ye, ko ba ku. 20 Ko ɖe kuku, o kpɔn toxo mɛ, e tɛkpɔ bwɛ nywɛɖe, ko na kpewu si yi blɛ, e bo mɔ nyi toxo ovi. Ko ɖe kuku, ɖe omɔ na-a, na ma va yi bɛ le blɛ ɖo toxo ovi wɛ, ko ba do gan.» 21 E bo ɖo e wu ni-i tun mɔ: «E nyɔ, ko mɔ wasi dɔmɛnywɛ mɛ la can na we, ko ko crɔn toxo xe we oxo na o lɔ na-a nɔ la. 22 Yawu, a bo va yi bɛ le blɛ, ɖo, ko ɔn kpe onu ti wu bo na wa gbɔɔn do yi hwexenu na o na jɛ blɛ la.» Mi wɛ dɔn ye nɔ do yɔ toxo mɛ la tun Sowaa.
23 Hwexenu na ohwe lo zɛ nɔ, wɛ Lɔtu ɖyɛ Sowa. 24 Hwemɛnu wɛ Xwetɔ Mawu na na hwemi kpodo ozo kpo ja sɔn emyɔ ŋutɔ kɔn le jiŋukunsin ɖi oju ha kɔn do Sodomu kpodo Gomɔɔ we toxoye ji. 25 E bo crɔn toxo mɛ laye, kansin la seŋu, toxo la mɛtɔ zɛtɛye kpodo onu xeni gbɛ wu le nyixɔ la ji. 26 Vɔ, Lɔtu syɛ bo kpɔn godo, bo trɔ zun ojɛ we ɛkpɛn tita le ote.
27 Ablaxamu bo site le kɛklɛnu dɛɛn, bo yi ofi xena Xwetɔ Mawu nɔ ote le e kɔn saa la. 28 Xena e kɔ ŋukunsin bo kpɔn Sodomu kpo Gomɔɔ kpodo kansin la zɛtɛye seŋu danhɔn, e na kpɔn kpoŋu, azɔ ɖe mɛ lo tun nɔ sɔn nyixɔ ji ɖi ozo ɖaxo ɖe we azɔ ha.
29 Xena Mawu crɔn toxo xeye ni le kansin xe mɛ na Lɔtu le la, e ɖoŋudo Ablaxamu wu, bo ɖe Lɔtu tɔn-ɛ le afɔku ɖaxo mɛ la mɛ.
Lɔtu vikpɛye da ale
30 Lɔtu lɛ le Sowa we toxo la mɛ, bo va yi ci ofi xena okpóye le, emyɔ kpodo vikpɛ nyɔnuvi owe etɔnye, ɖo, e vɔ Sowa we toxo la mɛ ninɔ nɔ. Emyɔ kpodo vikpɛ nyɔnuvi owe etɔnye, bo va yi jɛ oxwe do ogun ɖaxo ɖe mɛ, le ɛkpɛn ɖaxo ɖe mɛ. 31 Mi wɛ ovi mɛhyɔn la lɔ na nɔvyɛ kpɛ tun mɔ: «Míatɔ ku nyɔxo, ŋusunglo ɖe ko le oto xe mɛ, bo na va nɔ kpo mí ɖi lena e nɔ jɔ ɖo le ofi zɛtɛye ha. 32 Va, na mí a na vɛn míatɔ e ba nu mu, e ba do ɖo oxo kpo mí, mí ba do ɖo jijimɛvi na míatɔ.»
33 Mi wɛ, ye na vɛn yetɔ la, e bo nu mu, le gbegbe mɛ la we ozan mɛ. Ɛmɛhyɔn la bo va yi dɔ kpo yetɔ la, e ko nyɔ hwexenu na e hlɔn aha ni-i gbɔɔn do nyɔ hwexenu na e sɔn le e kɔn can. 34 Onyihinhɔngbe etɔn, nyɔnuvi mɛhyɔn la lɔ na nɔvyɛ kpɛ tun mɔ, kpɔn, ko va yi dɔ kpo didaye le egbe we ozan mɛ; na ozan mɔ do, mí a mɔ ni-i vɛn e ba nu mu, o ba va yi dɔ kpo-e, mí ba do ɖo jijimɛvi ɖe na míatɔ la. 35 Ye bo mɔ na vɛn yetɔ la ke le ozan mɛ la mɛ, nɔvyɛ kpɛ la bo va yi dɔ kpodo-e; e ko nyɔ hwexenu na e va hlɔn onyi le aha ni-i gbɔɔn do nyɔ hwexenu na e sɔn can.
36 Lɔtu vikpɛ nyɔnuvi owe laye bo yi gomi na yetɔ. 37 Nyɔnuvi mɛhyɔn la ji ŋusunglovi bo ɖo nyikɔ ni-i tun Mɔwabu. Emyɔ wɛ nyi dagbo-dagbo na Mɔwabutɔye gbɔɔn do va jɛ egbe. 38 Vikpɛvi la can bo ji ŋusunglovi, e bo ɖo nyikɔ ni-i tun Bɛnu-Ami. Emyɔ wɛ nyi dagbo-dagbo na Amɔnititɔye gbɔɔn do va jɛ egbe.