Agaa ji Isimayɛli
16
1 Salayi, Ablamu syɛ, ɔn ji ovi ti ni-i. Osyɛ la bo ɖo ɛmɛxixɔ nyɔnuvi Ejiputitɔ ɖe, xena ye nɔ yɔ tun Agaa. 2 Salayi bo lɔ na Ablamu tun mɔ: «Kpɔn, Xwetɔ Mawu ɔn ɖe omɔ na-a na ko do ji ovi, ko ɖe kuku na we, gbɔjwɛ va yi ɖo oxoa kpodo ɛmɛxixɔ nyɔnuvi tɛye, tanyɔ dogbɔn emyɔ ji, ko ba ɖo ŋusunglovi ɖokpo.» Ablamu yi ogbe na Salayi we oxo la. 3 Salayi sɔ ɛmɛxixɔ nyɔnuvi etɔn Agaa Ejiputitɔ la, bo sɔ na Ablamu oswa la, ni a do ɖo nyɔnu. Ablamu o wasi oxwe owo le Kana we oto la mɛ nɔ, le hwemɛ la nu. 4 Ablamu ɖo oxo kpodo Agaa, e bo yi gomi. Xena e kpɔn tun he bo yi gomi, e ɔn mɔ nɔ sɔ xwenɔ etɔn Salayi do yɔ onu ti. 5 Mi wɛ Salayi lɔ na Ablamu tun mɔ: «Zun na Agaa lo zun-u nɔ, e va ji onu ɖe, o na sɔ kpan. Mɔ wɛ sɔ ɛmɛxixɔ nyɔnuvi tɛye sɔ na we, xena e kpɔn tun he bo yi gomi, e ɔn mɔ nɔ sɔ-ɔ do yɔ onu ti. Xwetɔ Mawu wɛ na gbo ɛhwɛ la na mɔ kpodo myɔ kpo.» 6 Ablamu ɖo e wu na Salayi tun mɔ: «E nyɔ, Ɛmɛ xixɔ nyɔnuvi tɔwe wɛ e nyi, bo le ɛcɛ tɔwe gɔ. Onu xeni jlo we, wasi kpo-e.»Mi wɛ Salayi do aya na Agaa gbɔɔn, e bo si le e kɔn. 7 Xwetɔ Mawu we ɛwɛndotɔb va yi kpɔn-ɛ le otɔ ɖe to le zogbeji, otɔ la le Culu we omɔ ji. 8 E bo kan-ɛ se tun mɔ: «Agaa Salayi we ɛmɛxixɔ, bɔ lɛ o sɔn? Bɔ lɛ o lo yi nɔ?» E bo ɖo e wu tun mɔ: «Xwenɔ tɛye Salayi, wɛ ko si na nɔ.» 9 Ɛwɛndotɔ la bo lɔ ni-i tun mɔ: «Trɔ sɔn yi xwenɔ tɔwe kɔn, o ba hwe ɖiwe ni-i.» 10 Xwetɔ Mawu we ɛwɛndotɔ la bo mɔ lɔ ni-i tun mɔ: «Ko na na jijimɛvi tɔweye na su gbɔɔn na ye ɔn kpewu na xlɛ ye can. 11 Gomi mɛ le si we, o na ji ŋusunglovi ɖokpo, a bo ɖo nyikɔ ni-i tun Isimayɛli ɖo, Xwetɔ Mawu se ale nina tɔwe. 12 Ovi tɔwe la, na va le ɖi osɔkɛtɛ hɔntuntɔn ha. E na tɔn ahwan ɛmɛ zɛtɛye, ɛmɛ zɛtɛye bo na fɔn ahwan do e ji. E na jɛ oxwe etɔn do azɔga na ɛmɛ etɔnye.» 13 Agaa ɖo nyikɔ na Xwetɔ Mawu, bo lɔ tun mɔ: «O nyi Ɛli Hlɔyi», ɖo, Agaa kan eɖe se tun mɔ: «Ɛmɛ xeni kpɔn-ɔ la, ko kpɔn-ɛ doo?» 14 Mi wɛ dɔn ye nɔ do yɔ dotwɛ xeni le Kadɛsi kpodo Belɛdi we gblamɛ la tun mɔ: «Laxayi-Hlɔyi we dotwɛ». 15 Agaa ji ŋusunglovi ɖokpo na Ablamu. Ablamu bo ɖo nyikɔ na ovi xena Agaa ji ni-i la tun Isimayɛli. 16 Oxwe kanwe ɛdɛn wɛ Ablamu ɖo na Agaa do ji ovi ŋusunglo mɛ la ni-i.