Mawu ɖɔli nyikɔ na Ablamu
17
1 Xena Ablamu ɖo oxwe kanweko e hwe ɖokpo, Xwetɔ Mawu ze do ŋumɛ ni-i bo lɔ ni-i tun mɔ: «Mɔ wɛ nyi Mawu hɔnhlɔn zɛtɛyetɔ. Zɔn gbɔn omɔ tɛye ji, na ko ko mɔ kpɔn oxo ɖe a lɔ do wu we nɔ o. 2 Mɔ, ko na wasi okancica kpo we, ko na na o na gba okun a bo gbɔn ojlɛ wu.» 3 Mi wɛ Ablamu do onu odo na Mawu, e bo mɔ lɔ ni-i tun mɔ: 4 «Okancica xena mɔ ko wasi kpo we nɔ xɛn: o na nyi dagbo-dagbo na otogun susu gbagbagba. 5 Ye ɔn mɔ yɔ nyikɔ xeni nyi Ablamu na we nɔ, vɔ, nyikɔ tɔwe na nyi Ablaxamu, ɖo, ko sɔ we do ɖo dagbo-dagbo na otogun susu gbagbagba. 6 Ko na na o na gba okun taŋu, otogunye na tɔn sɔn myɔ mɛ, xɔluye bo na tɔn sɔn myɔ mɛ. 7 Ko na wasi okancica kpodo myɔ kpodo jijimɛvi tɔwe xeye ni na va jɔ kplɔ we do ye, ɖe kplɔ ɖe do. E na nyi okancica mavɔmavɔ, e mɛ la wɛ na na na ko na do nyi Mawu tɔwe kpodo jijimɛvi xeye ni na va jɔ kplɔ we do ye tɔn. 8 Oto xe mɛ na o nyi jonɔ le xe, Kana we oto xe la zɛtɛye seŋu, ko na sɔ na ɖi cinɔ mavɔmavɔ ha, na myɔ kpodo jijimɛvi tɔwe xeye ni na va jɔ kplɔ we do ye. Ko bo na nyi Mawu yetɔn.»Okancica xena Mawu wasi kpodo Ablaxamu we josi
9 Mawu bo lɔ na Ablaxamu tun mɔ: «Myɔ, o na hɛn okancica tɛye wu, myɔ kpodo jijimɛvi tɔwe xeye ni na va jɔ kplɔ we do ye, ɖe kplɔ ɖe do. 10 Kpɔn lena myɔ kpodo jijimɛvi tɔwe xeye ni na va jɔ kplɔ we do ye, mi na hɛn okancica xena ko wasi kpo mi nɔ la ɖo xɛn: ye ɖo na gbo ada na ŋusunglo ɖekpekpe le mia mɛ. 11 Mi na gbo ada na miaɖe, e ba nyi okancica la we josi le mɔ kpodo miye kpo mɛ. 12 Na ŋusunglovi míatɔn ɖe gbɛ ɖo onyihinhɔn atrotɔn, ye ɖo na gbo ada ni-i. Mɔsinha wɛ ye na nɔ wasi na ye, sɔn jijimɛvi ɖe ji gbɔɔn do yi ɖe ji. Mɔsinha ke wɛ e na nyi na ɛmɛxixɔ we ŋusunglovi xeye na ye ji le oxwe tɔwe gbe ye kpodo ŋusunglo xena ye sɔ oho do xɔ le jonɔ si, e ko nyi jijimɛvi tɔwe. 13 Ɛmɛ xixɔ xena ye ji le oxwe tɔwe gbe wɛ alo xena ye xɔ kpodo oho wɛ, ye ɖo na gbo ada ni-i. E mɛ, le agbaza míatɔn wu, e na nyi okancica mavɔmavɔ we josi. 14 Vɔ, ŋusunglo xena ye ɔn gbo ayru etɔn tɛ nɔ, ye na ɖe-e tɛ le otogun etɔn mɛ. Ɖo, e da le okancica tɛye ji.»
15 Mawu bo mɔ lɔ na Ablaxamu tun mɔ: «Xeni nyi siwe Salayitɔn, o ɔn mɔ yɔ-ɛ nɔ tun Salayi, vɔ, nyikɔ etɔn na nyi Sala. 16 Ko na do ni-i, ko bo na na we ŋusunglovi ɖokpo gbɔn e ji; ko na do ni-i, e bo na nyi mama-mama na otogunye. Oto susu we xɔluye na tɔn sɔn e mɛ.» 17 Ablaxamu do onu odo, bo ko ɛdɛ, bo lɔ le oji etɔn mɛ tun mɔ: «Ŋusunglo xeni o ɖo oxwe sandi ɖokpo na mɔ kpewu ji ovi wɛɛ? Alo Sala xeni ɖo oxwe kanwe owo na mɔ kpewu ji ovi wɛɛ?» 18 Ablaxamu bo lɔ na Mawu tun mɔ: «Isimayɛli ni gbɛ nɔ ɛgbɛ, dona tɔweye ba kplɔ-ɛ do kpoŋu! E bo o na kpe.» 19 Mawu bo lɔ tun mɔ: «O o! Siwe Sala na ji ŋusunglovi ɖokpo na we, o bo na ɖo nyikɔ ni-i tun Izaki. Ko na wasi okancica tɛye kpo-e, e bo na nyi okancica mavɔmavɔ na emyɔ kpodo jijimɛvi etɔn xeye ni na va jɔ kplɔ-ɛ do ye. 20 Ko se oxo xena o lɔ do Isimayɛli wu. Ko na do ni-i, ko na na e na ji, ko bo na na e na gba okun gbɔɔn a bo gbɔn ojlɛ wu. E na ji xɔluvi weve, ko bo na na na otogun ɖaxo na tɔn sɔn e mɛ. 21 Vɔ, okancica tɛye xe we oxo na ko lɔ nɔ, ko na wasi-i kpodo Izaki xena Sala na ji na we le oganxixo xeye ha mɛ le oxwe xeni gbɔn nɔ mɛ.»
22 Xena Mawu lɔ oxo na Ablaxamu vɔ, e lɛ le e kɔn. 23 Ablaxamu bo kplɔ ovyɛ Isimayɛli kpodo ɛmɛxixɔ zɛtɛye xena ye ji le oxwe etɔn gbe ye, kpodo xena e xɔ zɛtɛye, ɛmɛ xeni gbɛ nyi ŋusunglo le oxwe etɔn gbe, e gbo ada na ye le gbegbe mɛ la ɖi lena Mawu lɔ ni-i ɖo ha. 24 Oxwe kanweko e hwe ɖokpo, wɛ Ablaxamu ɖo, bo do gbo ada. 25 Ovyɛ Isimayɛli bo ɖo oxwe wetɔn, bo do gbo ada. 26 Azan ɖokpo ji wɛ Ablaxamu kpodo ovyɛ Isimayɛli gbo ada. 27 Mɔsinha ke wɛ, ŋusunglo zɛtɛye xeni le oxwe etɔn gbe ye kpodo ɛmɛxixɔ xeye na ye ji le oxwe la gbe ye kpodo xeye na ye xɔ kpo oho le jonɔye si ye, yee kpo emyɔ kpo wɛ gbo ada seŋu.