Xwetɔ Mawu wasi okancica kpodo Ablamu
15
1 Xena onu mɛ laye jɔ va yi vɔ, Xwetɔ Mawu lɔ na Ablamu le ɖiɖexlɛ ɖe mɛ tun mɔ: «Ablamu! Ká mɔ vɔ, mɔ ŋutɔ wɛ nyi ahwanglɔnnu tɔwe, axɔ xena ko na tu na we, na glo diin.» 2 Ablamu bo ɖo e wu tun mɔ: «Xwetɔ Mavɔmavɔ, onu xena o na na-a la, ɛlɛ ko na do wa? Mɔ xɛn lo ku nyɔxo nɔ, ovi ti ma ɖo, Elyezɛ xeni sɔn Damasi we toxo mɛ wɛ na sɔ cinɔ tɛye. 3 Ablamu bo mɔ lɔ tun mɔ: o ɔn na jijimɛvi ti wu, odansɔvi xeni le oxwe tɛye gbe, wɛ na va sɔ cinɔ tɛye.» 4 Xwetɔ Mawu bo lɔ ni-i tun mɔ: «Emyɔ hɛn na sɔ cinɔ tɔwe, vɔ, ovi xeni na tɔn sɔn ɛhun tɔwe mɛ, wɛ na sɔ cinɔ tɔwe.» 5 Xwetɔ Mawu bo kplɔ-ɛ do yi gaji, bo lɔ ni-i tun mɔ: «Kpɔn sunhwevi xeye ni le jiŋukunsin mɛ ye ganji, o na kpewu na xlɛ ye wɛɛ?» E bo mɔ lɔ ni-i ke tun mɔ: «Mɔsinha wɛ jijimɛvi tɔweye na le ɖo mɛ.»6 Ablamu bo kan do Xwetɔ Mawu ji. Mi wɛ dɔn, Xwetɔ Mawu do sɔ-ɛ do kpɔn ɛmɛ jijwɛ. 7 E bo lɔ ni-i tun mɔ: «Mɔ wɛ nyi Xwetɔ Mawu xeni ɖe we tɔn-ɛ le Ulu le Caludetɔye we toxo mɛ, a bo do sɔ oto xe mɛ na o le xe, a sɔ na we, e ba nyi tɔwe.» 8 Ablamu bo kan se tun mɔ: «Xwetɔ Mawu, josi ŋukɔ lɛ na ɖe xlɛ-ɔ tun e bo na nyi tɛye?» 9 Xwetɔ Mawu bo ɖo e wu ni-i tun mɔ: «Sɔ onyi osi ɖokpo xeni ɖo oxwe atɔn, kpodo gbɔgbwɛ ɖokpo xeni ɖo oxwe atɔn, kpodo agbo ɖokpo xeni ɖo oxwe atɔn, kpodo kpanxwele ɖokpo kpodo hɔnnɛ ɖokpo.» 10 Ablamu bo sɔ kanlin mɛ laye seŋu bo ma ye gbeswɛ ɖo owe-owe, akpaɖe bo nɔ kpan ŋukɔn akpa owegɔ la, vɔ, e ɔn ma oxɛ laye do owe-owe o. 11 Aklansuye bo zɔn va kanlin kuku laye ji, vɔ, Ablamu bo nya ye.
12 Xena ohwe lo yi oxɔ nɔ, Ablamu ɖyɛ awlɔn mɛ taŋu, vuvlu bo do kpɛnnɛ-kpɛnnɛ, vivɔ ɖaxo ɖe bo jɛ e ji. 13 Xwetɔ Mawu bo lɔ ni-i tun mɔ: «Nyɔ-ɛ tun jijimɛvi tɔweye na va nyi jonɔ le ɛmɛ bu we nyixɔ ji, ye bo na nyi ɛmɛxixɔye, ye bo na do aya na ye na oxwe sandi ɛnɛ. 14 Vɔ, ko na dɔn oto na otogun xena ye na nyi ɛmɛxixɔye na la, ye bo na tɔn le oto la mɛ kpodo dɔkun ɖaxo-ɖaxoye. 15 Myɔ, na ku nyɔxo taŋu, o ba va ku le fifa mɛ, ye bo na ɖi we. 16 Jijimɛvi tɔweye na trɔ gbɔn va bwɛ le jijijmɛvi ɛnɛgɔ tɔwe hwenu, ɖo, Amɔlitɔye ɔn wa onu nyanyla susu hɔnɖyo na ko do nya ye.»
17 Xena ohwe yi oxɔ seŋu vɔ, vuvlu mɔ va do taŋu, zɔnɖokpo kpoŋu, ozo hɛhɛhɛ ɖe xeni tun azɔ nɔ kpodo ozoɖɛ nɔ gbɔn kanlin xeye na Ablamu ma laye mɛ. 18 Gbegbe mɛ la, Xwetɔ Mawu wasi okancica kpodo Ablamu bo lɔ ni-i tun mɔ: «Ko sɔ oto xe sɔ na jijimɛvi tɔweye, sɔn Ejiputi we otɔsisa ji do va yi jɛ otɔsisa ɖaxo Eflati ji. 19 Oto mɛ, Kenitɔye, Kenazutɔye, Kadumɔtɔye, 20 Hititutɔye, Felɛzutɔye, Hlefayitutɔye, 21 Amɔlitɔye, Kanatɔye, Giligasutɔye kpodo Jebuzutɔye tɔn wɛ e nyi.»