Ablamu va hwlɛn Lɔtu gan
14
1 Le hwemɛ la nu xɔlu ɛnɛ ɖeye le, nyikɔ yetɔnye kpodo ofi xeye na ye ɖu xɔlu le ye xɛn: Amilafɛli ɖu xɔlu le Mɛzopotami we kansinmɛ, Aliyɔki bo ɖu xɔlu le Elasa we oto mɛ, Kedɔlawomɛ bo ɖu xɔlu le Elamu we oto mɛ, Tidali bo ɖu xɔlu le Goyimu we oto mɛ. 2 Ye va yi fun ahwan kpodo xɔlu atun ɖeye. Nyikɔ yetɔnye kpodo ofi xeye na ye ɖu xɔlu le ye, xɛn: Bɛla xeni ɖu xɔlu le Sodomu we toxo mɛ, Bilica xeni ɖu xɔlu le Gomɔɔ we toxo mɛ, Cinabu xeni ɖu xɔlu le Adima we toxo mɛ, Cemɛbɛ xeni ɖu xɔlu le Seboyimu we toxo mɛ kpodo Bɛla we toxo we xɔlu, toxo mɛ la wɛ ye mɔ nɔ yɔ tun Sowa. 3 Xɔlu atun mɛ laye, va yi kpli do Sidimu we sisahun mɛ, le ofi xena ɛxu xe mɛ na onu ti ɔn nɔ jɔ ovi le, va le le egbe. 4 Ye nɔ xɔlu Kedɔlawomɛ we ɛcɛ gɔ na oxwe weve, vɔ, oxwe wetɔngɔ la mɛ, ye fɔn ogu. 5 Le oxwe wenɛgɔ la mɛ, Kedɔlawomɛ kpodo xɔlu gbokpwe xeye ni le e ji ye, sɔ ahwan nu, mi wɛ hwexenu na ye sɔn nɔ, ye ɖu le Hlafatɔye ji le Acitalɔtu-Kanayimu we toxo mɛ, mɔsinha ke, ye ɖu le Zuzitɔye ji le Hamu we toxo mɛ, bo mɔ ɖu le Emititɔye ji le Kiliyatayimu we toxo mɛ, 6 bo mɔ ɖu le Hɔtɔye ji, le Seyi we okpóye kansin mɛ. Ye bo nya ye gbɔɔn do yi Ɛli-Palan xeni le zogbeji we aha. 7 E mɛ godo, ye trɔ va Eyinu-Micepa we toxo mɛ, xena ye mɔ nɔ yɔ tun Kadɛsi. Ye bo va yi gba Amalɛkitɔye we oto seŋu, bo gba Amɔlitɔ xeye ni nɔ nɔ Asasɔn-Tamaa we toxo mɛ ye. 8 Hwexenu na ye lo tɛkpɔ nɔ, Sodomu we xɔlu kpo Gomɔɔ we xɔlu kpo Adima we xɔlu kpodo Seboyimu we xɔlu kpo Bɛla xena ye mɔ nɔ yɔ tun Sowa we xɔlu, ɖe ahwanvi yetɔnye tɔn-ɛ, a do wa ahwan le Sidumu we sisahun mɛ, 9 kpan ŋukɔn Xɔlu Kedɔlawomɛ xeni nyi Elamu we xɔlu, kpodo Tidali xeni nyi Goyimu we xɔlu kpodo Amilafɛli xeni nyi Mɛzopotami we xɔlu kpodo Aliyɔki xeni nyi Elasa we xɔlu. Xɔlu atun site kpan ŋukɔn xɔlu ɛnɛ. 10 Le Sidimu we sisahun la mɛ, ogun titito ɖeye le, awɔn bo le ye mɛ. Le hwexenu na xɔlu Sodomutɔn kpo Gomɔɔtɔn kpo lo si sɔn nɔ, ye va yi flɛ jɛ awɔngun laye mɛ. Ɛmɛ gbokpweye bo si sɔn yi okpóye godo. 11 Ɛmɛ xeye ni ɖu oji laye, bɛ dɔkun Sodomu kpodo Gomɔɔ tɔn seŋu, ye bo mɔ bɛ onuɖuɖu yetɔnye xena ye kpli ɖo onyi ye seŋu, bo sɔn. 12 Ablamu we dayiyɔvi Lɔtu la bo le Sodomu hwemɛnu, ye wle-e, bo bɛ dɔkun etɔn zɛtɛye seŋu do sɔn.13 Le ɛmɛ xeye ni si nɔ ye mɛ, ɛmɛ ɖokpo va do ɛwɛn na Ablamu Heblitɔ la, xeni jɛ oxwe do Mamule amɔlitɔ la we hɔncyɔ mɛ. Mamule la kpodo Ɛcikɔlu kpo Anɛ bo nyi nɔvi. Ye ɛmɛ atɔn laye bo wasi okancica kpodo Ablamu. 14 Xena Ablamu se tun ye bo wle dayiyɔvi etɔn, e can ahwanvi etɔn ŋusunglo sandi atɔn ota ɖokpo ŋukun atrotɔn xeye na ye ji le oxwe etɔngbe ye, bo sɔ ahwannu na ye, ye bo nya xɔlu xeye ni wle Lɔtu laye do, gbɔɔn bo jɛ Dan we toxo mɛ. 15 Ablamu ma ahwanvi etɔn laye sonu-sonu, ye bo kpe ahwan kpo kɛntɔ laye le ozan mɛ. E xo kɛntɔ laye, bo nya ye gbɔɔn do yi Hova we oto mɛ le Damasi we toxo we otagbe. 16 E yi dɔkun zɛtɛye xena ye bɛ laye le ye si, bo mɔ yi dayiyɔvi etɔn Lɔtu kpo dɔkun etɔnye, bo yi nyɔnusiye, kpodo ɛmɛ gbokpwe xeye na ye wle laye.
17 Xena Ablamu ɖu le xɔlu Kedɔlawomɛ kpo xɔlu xeye ni le e ji ye ji kpo vɔ, e trɔ va sɔn nɔ, mi wɛ, xɔlu Sodomutɔn va kpe-e le Cave we sisahun mɛ, xena ye mɔ nɔ yɔ tun xɔlu we sisahun mɛ.
Mɛlicisedɛki va kpe Ablamu le omɔ ji
18 Mɛlicisedɛki xeni nyi Salɛmu we toxo we xɔlu bo nyi ovɔsantɔ Mawu Ɖaxotɔn, hɛn kpɔnnɔ kpo vɛn kpo va. 19 E xo fifa we ɛɖɛ na Ablamu, bo lɔ ni-i tun mɔ: «Mawu Ɖaxo xeni wasi jiŋukunsin kpo nyixɔ kpo ni do na we. 20 Ɛkpɛ na Mawu Ɖaxo xeni sɔ kɛntɔ tɔweye sɔ do asi na we.» Mi wɛ Ablamu sɔ onu zɛtɛye xena ye yi do gbɔn laye we maɖowo sɔ na Mɛlicisedɛki. 21 Sodomu we xɔlu lɔ na Ablamu tun mɔ: «Sɔ ɛgbɛtɔ laye na-a, a bo bɛ dɔkun laye do sɔn.» 22 Ablamu ɖo e wu ni-i tun mɔ: «Le Xwetɔ Mawu Ɖaxo, xeni ɖo jiŋukunsin kpodo nyixɔ kpo we ŋumɛ, ko kɔ alɔ tɛye: 23 bo ta onu, ko ɔn sɔ onutɔwe ti kaŋukonu nɔ, ko ɔn sɔ okan tete nɔ gbɔɔn do sɔ afɔkpa kan vɔvɔ nɔ can. E mɛ, o ko mɔ kpewu na va lɔ tun mɔ: “Mɔ wɛ do dɔkun oxwe na Ablamu.” 24 Mɔ ŋutɔ ɔn kan onu ti nɔ, onu xena ko na yi jan wɛ nyi onu xena ɛmɛ tɛyee ɖu, kpodo onu xena, Anɛ, Ɛcikɔlu, kpo Mamule, xeye ni wa ahwan kpo-o ye, ɖo na yi.»