13
1 Ablamu kplɔ osyɛ, e bo bɛ onu xena e ɖo zɛtɛye seŋu, bo lɛ le Ejiputi we oto mɛ, bo trɔ sɔn yi Nɛgɛvu we kansinmɛ. Lɔtu bo kplɔ-ɛ do.Lɔtu jɛ ovo le Ablamu wu
2 Ablamu nyi dɔkunnɔ ɖaxo, bo ɖo kanlin susu kpodo oganwe kpodo sika. 3 E lɛ le Nɛgɛvu, bo sɔn nɔ, na e kpɔn ofi ɖe, e ba jɛ oxwe do blɛ. Mɔsinha wɛ e wasi nɔ gbɔɔn bo va yi jɛ kaka Betɛli we toxo mɛ, le ofi xena e o jɛ oxwe do saa, le Betɛli kpodo Ayi we toxoye we dodomɛ, 4 le ofi xena e wasi ovɔsinsan we agba do saa. Le blɛ la, Ablamu xo ɛɖɛ bo yɔ Xwetɔ Mawu we nyikɔ.
5 Lɔtu xeni kplɔ Ablamu do, emyɔ can ɖo ogbɔye kpodo nyibuye, avɔvaye can bo le e si. 6 Oto la bo hwedo ye, na ye a do nɔ kpɔkpɔ, ɖo, dɔkun yetɔnye su gbɔɔn na ye ɔn mɔ kpewu na nɔ okpɔ. 7 Mɔ bɔ do e wu, Kanatɔye kpodo Felɛzutɔye can bo o nɔ nɔ oto la mɛ. Mi wɛ, ojlɛ va jɔ le Ablamu we kanlin kplɔtɔye kpodo Lɔtu we kanlin kplɔtɔye mɛ. 8 Ablamu bo lɔ na Lɔtu tun mɔ: «Ko ɖe kuku na we, ko ɔn jlo tun onu dindɔn a nɔ mɔ kpodo myɔ kpo mɛ, gbɔɔn a bo do nɔ kanlin kplɔtɔ míatɔnye mɛ can, ɖo, nɔvi wɛ mí nyi. 9 Oto la zɛtɛye le ŋumɛ na we. Mí a ma míaɖe. Na o yi aɖusi mɛ, ko ba yi amyɔ mɛ; alo na o yi amyɔ mɛ, ko ba yi aɖusi mɛ.»
10 Lɔtu bo kɔ ŋukunsin bo kpɔn nyixɔ zɛtɛye xeni lɛdo Judɛn we otɔ la, ɛsin bo le nyixɔ la ji ganji. Blɛ mɛ laye, gbɔɔn do va yi jɛ Sowa we toxo mɛ, le ɖi ɛjikpa Mavɔmavɔ Mawutɔn ha, bo mɔ le ɖi Ejiputi we oto ha. Mɔsinha wɛ e le ɖo, gbɔxwe Xwetɔ Mawu do va crɔn Sodomu kpodo Gomɔɔ we toxoye. 11 Lɔtu bo can ofi zɛtɛye xeni lɛdo Judɛn we otɔ la, e bo sɔn yi hwezɛdo. Lena ye ma le yenɔniɔye wu ɖo, e mi mɛ. 12 Ablamu bo nɔ Kana we oto mɛ, Lɔtu emyɔ, bo va yi ci toxo xeye ni lɛdo Judɛn we otɔ la ye mɛ, e bo va yi ɖo avɔva etɔnye do kaka Sodomu gbɔɔn. 13 Sodomu we toxomɛtɔye bo nɔ wa danu taŋu kpodo onu nyanyla susu do kpan ŋukɔn Xwetɔ Mawu.
Xwetɔ Mawu fyan ajɔgbeye na Ablamu
14 Xena Lɔtu va yi jɛ ovo le Ablamu wu vɔ, Xwetɔ Mawu lɔ na Ablamu tun mɔ: «Le ofi xena o le la, kɔ ŋukunsin na kpɔn, otagbe, afɔgbe, hwezɛdo kpodo hweyixɔ kpo, 15 ɖo, oto xena o kpɔn nɔ mɛ seŋu, ko na sɔ na myɔ kpodo jijimɛvi tɔweye kpo gbɔɔn do yi mavɔmavɔ. 16 Ko na na na jijimɛvi tɔweye na su ɖi okɔ ha gbɔɔn na ɛmɛ ti ɔn kpewu xlɛ ye nɔ ɖi lena ye ɔn nɔ kpewu xlɛ okɔ ɖo ha. 17 Site, a bo ɖi asa gbɔn ofi ɖekpekpe le oto la mɛ seŋu, ɖo, myɔ wɛ ko na sɔ-ɛ sɔ na.»
18 Ablamu bo ɖe avɔva etɔnye, e bo va yi jɛ oxwe do dahwe Mamule we hɔncyɔtun le aha na Eblɔn we toxo. E bo wasi ovɔsinsan we agba do blɛ na Xwetɔ Mawu.